Cemîl Cewher

Xwedê heye, başûrê Kurdistanê bi destê şîrketên Tirk tê avakirin. Xwedîyên piranîya wan şîrketan jî wextekî bi tundî dijminatîya Kurdan dikirin û bawerin gellek ji wan hîn jî wê dijminatîya xwe didomînin. Lê çavê berjewendî û peran kor be, petrol û dewlemendîya başûrê Kurdistanê wilo kiriye ku dijminên Kurdan parçeyek ji Kurdistana mezin bi destê xwe avadan bikin û Kurdekanên me jî çavên xwe ji wan re bigrin, sermaya başûrê Kurdistanê biherikînin xezîna şîrketên Tirk. Di vir de tenê xwedê zane bê çend milyon û milyar dolar dikevin bêrîka gendel û bertîlxuran heta ku ew şîrketên Tirk wan îhaleyên qirase distînin. Naxwe ew milyoner û milyarderên Kurdekan çawa çêbûn? Çawa bûn milyoner û milyarderên dolaran?

Werhasil, xwedê hîn zêdetir çavên wan gendel û bertîlxuran bi dolaran dagire rebbî. Çawa be ji hinekan re Kurdistan murdistan tenê bêrîka wan e û hestên netewî li cem wan pênc qirûşên xerabe nake. Aferîn canekem!

Gelo li bakurê Kurdistanê şîrketên Kurd tunene? Yan şîrketên Kurd ên ku karê avadanîyê dikin wek Tirkan ne zîrek û jêhatî ne? Belê bi serê Îsa û Mûsa hem zîrek in, hem jêhatî ne û hetta karin tirrê ji şîrketên Tirkan jî berdin. Lê çima xwelîliserên Kurdên bakur nikarin ji dewlemendîya parçeyek xaka xwe gezek nan bixwin, ciyê şik û gumanê ye. Lê cîgerim Tirkekan karin îhaleyên bi milyon û milyar dolaran bistînin û tew kakacanên me jî ha ha ji wan re li çepikan dixin, bi hella hella beşdarî merasîmên wan dibin. Dîsa aferîn canekem!

Birastî mesela min ne li ser başûr bû û tew min nedixwest êdî ez behsa başûr û başûrîyan jî bikim. Lê cîgerim Gurkan Uygun hişt ku dîsa ez wan bînim ser zimanê xwe û gunehên xwe girantir bikim.

Li ser bextê gendel û bertîlxurên bajarê Hewlêrê be, dibêjin lîztikvanê rêzeflîmê “Gelîyê Guran – Kurtlar Vadisi” cîgerim Mematî (Gurkan Uygun), li Hewlêrê bûye dikandar û wê dest bi firotina beqlawa “Gulluoglû” bike. Wey li ser xêrê be û xwedê bikim başûrê Kurdistanê bibe “Beqlawexane”ya şîrketa Gulluoglû rebbî.

Hûn dibînin ne wilo gelî xwendevanan?

Hetta bi beqlawefiroşên Tirk jî dixwazin başûr dagîr bikin û bibin şirîkê perên başûrîyan. Yan beqlawefiroşên Kurdên bakur miribûn? Yan beqlawefiroş di nav Kurdên bakur û rojava de tunebûn?

Îcar hesab li cem we gelî lotikvanan.

Lîztikvanekî Tirk bê dikana beqlawê li Hewlêrê veke û walîyê Hewlêrê Newzad Hadî jî rabe beşdarî merasîma vekirina dikana beqlawê bibe!? Yanî ev ne kar û lîztika zarokan be çiye gelo? Qiraseyekî wek walî li şûna ku beşdarî merasîmên wezîr, serokdewlet, general û mareşalan bibe, radibe xwe dixe sewîya lîztikvanekî ku ez bawerim yan “hevalê partîya faşîst MHP” ye û yan jî her ji Kurdan hez nake.

Ma ev karê aqila ye? Yan ez şêt û dîn bûme û xelet difikirm?

Law we dikanek bidaya me lotikxanecîyan,  meyê ji Gulluoglû xweştir û şîrîntir beqlawe ji Hewlêrîyan re çêkira kakacan! Hem jî meyê navê dikana xwe jî bikira “Beqlawe made în Lotikxane!”

Yan nedibû?

Gelo wê kek Newzad Hadî û berpirsên din beşdarî merasîma “Beqlawexaneya Lotikxanê” jî bibûna yan na nizanim, lê ez sedî sed bawerim ku wê dîsa li ser deftera xwe binivîsandina:

Geyayê hewşê tehl e kaka….!!!!

07.02.2010- Hewlêr

Ev nivîs di 7/02/2010 seet di 13:25an û di beşê Giştî de.