Hesen Almas

Li ser bextê fitne û fesadan ve, dibêjin dezgeha karûbarên ezmanî ya Amerîkayê NASA,  balafirên xwe yên ku wek Discovery û Endeavour tên binavkirin û 86 caran firyana fezayê, dane ber firotinê. NASA yeka wan bi 29 milyon dolaran dide ber firotinê û kesên ku bixwazin herin li ezmanê heftan, li Hîv, Mars û Satûrnê seyranê bikin, divê vê fersendê nerevînin.

Li ser bextê xelkê be, dibêjin di serî de NASA dixwest yeka wan bi 42 milyon dolaran bifroşe. Lê fesadekî Amerîkî ji rayedarên NASA re gotiye: “Kuro ji xwe tirr di Discovery û Endeavour de nemaye, bûne wek kerên piştkurmî. A baş buhayê wan daxin qe nebe belkî hema xwendevanên Lotikxanê ji xwe re bikirin û herin li ser Marsê Kurdistanek serbixwe damezrînin. Çawa be li dinyayê nikarin Kurdistanek serbixwe û yekgirtî damezrînin, hema bela bifirin ezmanê heftan, Kurdistana xwe ava bikin û ji van qûnreşên Tirk, Ereb û Eceman rizgar bibin” filan û fîstan.

Ez serê we neêşînim gelî gunikreşan, Discovery û Endeavour bi 29 milyon dolaran derdikevin mazatê. Kesên ku bixwazin van bûkên serbixêlî bikirin û herin li Mars û Hîvê Kurdistanek azad damezrînin, serî li Lotikxanê xin.

Haaaaa, qomisyona me %10 e haaa, êdî tiştekî belaş nemaye cîgerlerim. Çawa ku Kurdekanên başûr ji şîrketên Tirkoleran qomisyon û bertîla xwe distînin û xurcikên xwe dadigrin, emê jî ji îro û pêde %10 heqdestê xwe bixwazin ellawekîl..

De haydê, fersend ev fersend e, bibin xwazgînîyên Discovery û Endeavour û herin li ezmanê heftan bi xar û qirûş bilîzin kaka….

Ev nivîs di 11/02/2010 seet di 18:32an û di beşê Giştî de.