Pîrkemal

Dibêjin:“Xwedê teala bi elb û çewalan bi ser hinekan de dibarîne“. Ewqasî ku şans û nesîbê hinekan fireh e. Ez bawerim tenê em Kurdên xwelîliserên bakur, rojava û rojhilat bê şans û nesîb mane. Maşelle Kurdekanên me yên başûrekan sînorê şans û nesîb jî buhurandine. Tew xwedê teala ne bi elb û çewalan, lê bi telîs, xurcik û bîdonan bi ser wan de barandiye. Wan 10 dixwest, xwedê 100 daye wan. Bi qewlê xwedê û saya serê xalê me G.W.Bûşh, canekanim ji tengasiyê derketin firehîyê û kêfa li ser kêfê dikin. Xwedê hîna jî bide wan rebbî…

Axir, mesela me li ser şans û nesîbê fireh bû.

De binerin bê qismetê zarokên xelkê çiqasî fireh e û bi saya malperên xwe çawa bûne milyoner.

Çend malperên ku tenê bi firotina navê xwe bûne milyoner ev in:

Sex.com: Bi 14 milyon dolar hat kirîn û xwedîyê wê yê niha ew derxistiye mazatê, bi 1 milyon dolar mazatê vedike.

Vodka.com: Bi 3 milyon dolar hat firotin.

Toys.com: Bi 5.1 milyon dolar hatibû firotin

Israel.com: Bi 5.88 milyon dolar hat firotin.

Beer.com: Bi 7 milyon dolar hat firotin.

Diamond.com: Bi 7.5 milyon dolar hat firotin.

Business.com: Bi 7.5 milyon dolar hat firotin.

Porn.com: Bi 9.5 milyon dolar hat firotin.

Fund.com: Bi 9.99 milyon dolar hat firotin.
Û wekî din….

Hûn dibînin bê zarokên xelkê çawa jêhatî ne û malperên xwe bi milyon dolaran difroşin ne wilo?

Birastî gelo malperên Kurdî çend qirûşan dikin kes pê zane?

Ji bo ku em pê zanibin bê malperên Kurdî çend qirûşan dikin, emê ji Lotikxane.com ê dest pê bikin û wê bidin ber bazarê cîgerno.

Ji ber vê; em Lotikxane.com ê derdixin mazatê û difroşin gelî xwendevanan.

Vekirina mazata me ji „1000“ hezar dolarî dest pê dike.

Kî herî zêde bide û navekî qerase bi dû xwe xe, emê Lotikxanê jê re bixemilînin, bikin bûka serbixêlî, li ser pişta wî siwar kin û mehra wan bibirin.

De yallaa… Îsa û Mûsa li pişta we bin.

Haaaaaa, em xaltîka Fatê û Sofî Xelef jî belaş, bê pere, wek diyarî di ser re didin we ellawekîl..

Ev fersend carek din nayê haaaaa….

Ev nivîs di 12/03/2010 seet di 11:00an û di beşê Giştî de.