Sînema Amûdê dîsa dişewite

 Dem êvar e…

gul tevde li her dera cîhanê karê xewa xwe dikin

lê li Amûdê, îşev xew tuneye

gul tev şiyar in, kes nizane çima

tev bi şewq in, niza li bende çi ne

tev jîr û pel bel in, niza ji bo çi

tev bêdeng in, niza li çi temaşe dikin

heya zilma dinê dîsa rû da

heya evîn dîsa hat serjêkirin

heya hêvî di guldanê de bi xemsarî hat mirandin

çarhawîrdor agir e, qîr û hawar bilind dibe

bangî xwedê dikin…

bilind dibin hawar û gazî

ta ku bi ezmanan dihejînin

canê bi ciwanî hat sûtandin

dike ku êdî xwedê rehmê bide

afrenderê erd û ezman, xwedayê rehma mezin,

rehmê dide:

qaç û binê xênî dike yek perçe

ji bo zarokên nîv sax û nîv mirî

goreke komeleyî mezin çêdike

belê rehmê dide

zarokan ji hev naqetîne

bihna goştê şewitî xwe li Amûdê belav dike…

de hema bera biba roja qiyametê, berî agir bi sînemê bikeve

de bera birca Eyfelê nema ba ji bilindbûnê re, berî derî li zarokan were girtin,

de bera her sê Pîramîdên Misrê, dîroka mirovahiyê,

bi ser hev de hilweşiyana, berî qêrîn bighêje zarokan

de bera dîwarê çînê, nîv-vîv û perçe hûr bibiya,

berî bibiya şahidê vê bûyerê

de bera roj vemiriya, jiyan bihata tarîkirin,

berî kulîlkên Amûdê bihatana qurçimandin

hêle hêlên dayikan erdê diqelêşin

dengê giriyê xweşkan kevir digrîne

bêdengî û bêhêziya bavan agir dide

bêzariya bîneran

pirsîn û lêpirsîna rêwiyan

tirs û metirsiya rizgaran

hawar û gaziyên xwediyan

birê dikin rihê sorgulan bi gulan

ax hey Amûdê

dayika kezebşewitî

tê çi rake û çi raneke

tê heya kengî vê êşê bi xwere bikişîne

Sînema Amûdê dîsa dişewite

About The Author