Yê li kêlekê rûniştî…

Yê bi tenê li hêlekê ji cimûetê dûr rûniştiye bavê min e. Ne ji ber tirsa wî ji koronayê ye, Xwe perçeyek ji cimûetê nabîne, lewre nakeve nav cimûetê....

Yê bi tenê li hêlekê ji cimûetê dûr rûniştiye bavê min e.

Ne ji ber tirsa wî ji koronayê ye, Xwe perçeyek ji cimûetê nabîne, lewre nakeve nav cimûetê.

Li cimûetekê sê kes hebin naaxive, tenê guhdarî dike. Lê li hizûra wî tenê kesek hebe, kesê hemberî wî ji sohbeta wî têr nabe.

Kêm diaxive, lê her gotineke wî aforîzmayek e. Bi hevokekê mesele safî dike.

Ji ber di jiyanê de rastî gelek bêbextîyan hatiye, bawerîya wî bi mirovan nemaye. Heta karekî wî yê mecbûrî li nav mirovan tune be, nakeve nav mirovan. Ew dostê her kesî ye, lê kesî wek dostê xwe nabîne.

Di xortaniya xwe de, dil dikeve keça meta xwe. Birayên keçmetê anku kurmetên wî bi derbên giran lêdidin.

Nexweş dikeve, dema tê ser hemdê xwe minetê li kesî nake, ji kesî re nabêje merheba.

Li ser gotina gundîyan, rojekê li mizgeftê mele ji cimûetê re dibêje, „kuro rabin tevde lêdin.“
Ew jî dibêje, „bila werin min di jin û makê tevde ga“

Kes pê newêrîye.

Di nav gundîyan de gotin li ser gotinê, peyv li ser peyvê zêde dikin, navê Evdilxaliq dîn derdixin.

Bav mirî, dê li cem birayan. Bê kes bi serê xwe dimîne. Gundî bêbextîyeke din lê dikin, bi zorê dikin erebeyekê, dibin li Elezîzê teslîmî nexweşxaneya dînan dikin.

Hefteyek du hefte li Elezîzê bêhna xwe dide, pişt re diçe cem midurê nexweşxaneyê dibêje: „Bawer bike ez ji te baqiltir im. Lê ez li şûna te li ser wê kursîyê rûniştibûma, min ê jî nekaribûya dîn û baqilan ji hev kifş bikira. Lewre ev dînîtî ne ji te, ji kursîya te ye. Lewre ji kerema xwe re van gotinên min negre ser xwe.“

Piştî wan gotinan ji wir derdikeve, ji xwe re karekî dibîne. Karê kevnecilan dike. Li Edene û Stenbolê ji bazara kêçan yanê ji bazara qereçîyan kincên kevin dikire, dibe li gundên Tetwanê difiroşe xelkê. Xelk bi xêra wî li şûna kincên pînekirî, kincên kevin li xwe dikin. Navê wî jî dibe Evdilxaliqê kevnecilan.

Bi pereyên kevnecilan buhayê qelenê peyda dike û dizewice. Ji zewaca wî, ji xeynî min çar kur û neh keçên wî hene. Ez yê herî mezin im. Ji xeynî min pênc keçên wî zewicî ne û ji malê derketine. Yên din biçûk in, di stûyê wî de mane.

Bi risqê helal zikê zarokên xwe têr dike. Rojek têr, rojek nîv têr, lê rojekê tenê xwe muhtacî kesî nekiriye.

Li gund ji xeynî erda xaniyê me, bihûstek axa me jî tune ye. Lê tevî ew xwe nake nav gundîyan, ji nav gund jî dernakeve.

Xaniyê xwe yê ji kevir û bê siwax û pencere, nade bi qesrê mîr û began.

Min ev wêne li ser rûpeleke fêysbûkê dît. Ji wêneyan hez nake. Ji xeynî nasnameya wî, wêneyekî wî li derekî din tune ye. Di vir de jî baş xuya nake.

Ez kurê vî camêrî me. Hûn niha ji vî camêrî bipirsin li vê dinyayê qet dostekî te heye? Ew ê nekare navê kesekî bide. Belkî bibêje dostê min Xwedê ye, lê ne bawer im haya Xwedê ji vî dostê xwe hebe.

Ez kurê vî camêrî me. Ji serî heta binî wek bavê xwe me. Ji cimûetê dûr, ji dost û pere û mal û milk dûr. Ji Xwedê dûr, Xwedê ji min dûr. Tenê ez û çend camêrên li vir ji kurdîya min re dibêjin merheba…

Categories
Arif TamtaşArşîvKadînNivîskar
  • Ruhê koletîyê Kurdan diduruvîne

    Sîrac Oguz Neyarên Kurd û Kurdistanê, dîsa dest bi fen û fêlbazîyên dîrokî dikin. Dixwezin di nav milletê Kurd da, dubendî û îxanetên mezin pêk bînin. Gava ku milletê...
  • Bê çete jiyan nabe!

    Z.Brîndar Kurd milletekî ecêb in. Serok û rêvebirên Kurdan hîn ecêbtir in. Tew siyasetmedarên wan ji tevan ecêbtir in. Li şûna ku ji bo yekîtî û xurtkirina tevgera rizgarîxwaza...
  • Aş diçe wan daye dû çeqçeqê

    Mirad Bîlgîç ‘Ziman mala hebûnê ye’ Martîn Heîdegger ‘Ziman ne gelek tişt e; ew her tişt e.’ Adar Jiyan Ji bo zimên heta niha gelek tiştên giranbuha hatine gotin...
  • PKK û bangewazîya yekîtîyê

    Metîn Pîranî – Sekreterê Gişti yê Hereketa Azadî PKK û rêxistinên pê re ji mêj ve ye ku behsa Yekîtiya Neteweyî, diyalog û biratiya di nav Kurdan de dike....
  • Ruhê koletîyê Kurdan diduruvîne

    Sîrac Oguz Neyarên Kurd û Kurdistanê, dîsa dest bi fen û fêlbazîyên dîrokî dikin. Dixwezin di nav milletê Kurd da, dubendî û îxanetên mezin pêk bînin. Gava ku milletê...
  • Tu yeman bûyî yabo

    Sal 1980 ye. Eskerîyê darbe kirîye, agir bi erdê ketîye. Şerê çepgir û rastgir û kurdgiran e. Li kuçe û sikak û kolanan, mîna mişk û pisîkê, xort li...
  • Metrobus

    Ez di dîn û dîyaneta Stenbolê nim. Û piçika mixê meriv hebe, meriv tenê deqeyekê jî li Stenbolê nasekine. Qey hema xalê min Xwedê çeneke baran bi ser Stenbolê...
  • Mesangera li kadînê…

    Cimûeta li kadînê: Silêmanê Hecî Feyzila bi jina xwe Sînemê re li kadînê ka dikin telîsan, kêfa Silêman diçe ganekê. Silêman dibîne bi dilê Sînemê ye jî, berê wê...