Yekî got erê, yekî got na

Bavê Cengo

Wek hûn zanin Serokê Sererd û Binerd Başqan Ocalan bangewazîyek li PKK û grûpên pêve girêdayî kir ku dev ji çekan berdin, doza serxwebûn, federasyon, xweserîya herêmî û mafên çandî (ziman û her tiştên pê ve girêdayî) nekin û bê qeyd û şert xizmeta paradîgmayên wî bikin. PKK jî got ehlen we sehlen, ser seran û ser çavan û agirbest ragihand. Bi banga Ocalan hinek wek mirîşkan gêj û sewsî bûn, hinek jî pê kêfxweş bûn û dan lotik û zîtirkan.

Asasen bi banga Ocalan dewleta Tirk dixwest ku Rojava, YPG û HSD çekên xwe deynin û bêyî ku tiştekî bikin têkevin bin desthilatdarîya Hikûmeta Şamê. Yan na, mebesta dewleta Tirk ne ew e ku PKK çekan deyne, xwestina danîna çekên PKK mahne ye, armanc Rojava û hilweşandina çekdarên YPG û HSD bû. Lê xuyaye wê hesabê malê û sûkê li hev dernekeve.

Di vê derbarê de berpisê PYG û YPH xalê we Salih Mislim pêşwazîyek germik û nermik li banga serokê xwe Ocalan kir û got: “Banga serok me jî girê dide. Heger şert û merc guncav bibin, emê çekan deynin” û simbêl ba da.

Generalê me û Serokê HÊzên sûrîyeya Demokratîk çi got, got: “Bi sê navên xwedê, banga Ocalan ji bo PKK ye, ne ji bo me ye“ û xwe ji bin bar da alî.

Yanî, yekî got erê, yekî got na.

Wek polîsê qenc û polîsê xirab.

Hûn zanin, gava yek tê girtin, polîsek dikeve rola polîsê xirab, lêdan û êşkencê bi yê girtî dike. Dixwaze bi darê zorê yê girtî li her tiştî mikur bê. Polîsê din jî dikeve rola polîsê qenc, nahêle yê girtî lêdanê bixwe û dixwaze bi dostanî li her tiştî mikur bê. Îcar lotikên xalê me Salih û generalê me Ebdî jî dişibe lotika polîsê qenc û polîsê xirab.

Axir, tirsa min ew bû ku Mazlûm Ebdî jî wek gelekan bê lîztika dewleta Tirk û bêje emê çekên xwe deynin û bê qeyd û şert teslîm bibin. Lê gava got çekberdan ji bo PKK û grûpên wê ye û me girê nade, piçekî bêhna min derket.

Ê de a bi xêr…

Wek dibêjin, gîha di bin keviran de namîne. Helbet wê di çend mehên pêşîya me de reş û spî ji hev kifş bibe wesselam.

Qamişlo

About The Author