Semawî perda reş hilanî

 

Ehmed Beyan

 

Heta niha digotin Ocalan di bin tecrîtek giran de ye. Ji tecrîta ser Ocalan pê ve tu derdekî Apocîyan nemabû. Here tecrît, were tecrît. Doza Kurd û Kurdistanê kiribûn bi qurbana tecrîta ser serokê xwe. Lê Serokê Navenda Lêkolînên Stratejiya Bingehîn Abdurrahîm Semavî, di Xanî TV de gelek perde ji ser rastîya Ocalan û rewşa wî hilanîn û Apocî derewker derxistin.

Hebûn û mana Ocalan a li Îmralîyê di nîqaşê de bû. Ahmet Turk jî berî çend salan gotibû, “em ne li Îmralîyê, li cîhekî xweştir bi Ocalan re hevdîtinê dikin”. Û hinek parêzerên wî jî bêyî ku navê xwe eşkere bikin, anîbûn zimên ku gava “ew diçin Îmralîyê Ocalan bi helîkopterê tînin wir“.

Abdurrahîm Semawî ev perde jî rakir û pirs zelaltir kir. Xalê me Semawî di bernameya xwe ya bi Xanî TV de axivî û di derbarê Kongreya PKK a 12. de got ku “Ocalan li avahîya MÎTê û bi rêya telefonferansê beşdarî kongreya PKK bû û kongre li dar xist“. Bi vî haweyî zelaltir bû ku Ocalan ne li Îmralîyê dijî lê gava pêwist bû wî tînin Îmralîyê û hevdîtinan bi serlêderên xwe re dike.

Axir, ji me derew, li ser bextê Semawî û xalê me Ehmed Turk be.

Semawîyê min û we herweha dibêje ku Ocalan zixtê li Hêzên Sûrîyeya Demokratîk (YPG-HSD) dike ku xwe û xweserîya Rojava hilweşîne û têkeve bin hikmê Hikûmeta Şamê. Herweha dibêje ku 28 milyar dolarên PKK (pereyên ku Kurdan bi ked û xwîna xwe dane) wê bikeve bin kontrola Ocalan û wê Ocalan bi van pereyan aborîya Tirkîyê xurt bike.

Û gelek lotkên din yên kesanedî.

Werhasilî kelam, Semawî yê ku haya wî ji gelek tiştan heye û gelek gotin û pêşdîtinên wî rast derdikevin, bi vê lotika dawî gelek çîrokên ku Apocîyan digotin derew derxistin û mîrkutek bêîman li nav serê wan xist. Bi vê mîrkutê wê hişê wan bê serê wan û rastîyê bibînin yan na nizanim. Lê dibêjin rasto di rastîya xwe re û xwaro jî di xwarîya xwe re derdikevin.

Hêvîdarim tiştên ku xalê me Semawî dibêje vê carê rast dernekevin. Bi taybet di mijara Rojava de rast dernekevin.

Heger hat û YPG û HSD bi ya Ocalan bikin û xwe hilweşînin, wê Kurd hemû bê bigrin û xelas.

De xwedê kerîm û rehîm e….

 

Enqere

 

 

About The Author