Ji dewleta Tirko lotikek Kurdî

Ehmed Beyan- 19/02/08- Enqere- Serokwezîrê Tirkiyê Receb yoldaş biryar da ku televizyona dewletê TRT di kanalek xwe de dest bi lotikên bi Kurdî, Erebî û Farisî bike. Kî çi dibêje bila bêje ev lotikek baş e.

Helbet wê ev weşan ne li gora dilê me bin, wê bi piranî têde behsa lotikên Erdogan û hikûmeta wî bê kirin, lê dîsa jî wê feydeyekê li zimanê Kurmancî bike. Piştî ku Erdogan di bernameyek televizyonê de ev mizgînî da, serokê TRT Îbrahîm Şahîn jî yeka Erdogan nekir didu û dest bi zîtirkan kir.

Şahîn ji çapemenîyê re got:”Ji xwe biryara me li ser tirr û fisekê mabû, piştî ku serokwezîrê me pif kir wê tirr û fisê, emê jî di demek pir nêzîk de dest bi weşana Kurdî bikin.  Bingeha me amade ye, xebatkarên me temam in û emê bi taybetî giranîyê bidin xebatên çand û kulturî” filan û fîstan.

 Yabo bi sê telaqên jinberdanê ev biryarek baş e. Ma ka televizyonên me wek TRT giringîyê didin ziman û kulturê qardeşim!  Ma televizyonên me Kurdên bakur ne ji nîvî zêdetir bi zimanê Tirkî weşanên xwe dikin? Êêêêêê, îcar kîjan baştir û bixêrtire cîgerlerim? Tenê Kurdî be baş e yan “fîftî fîftî”, yanî wek şorba nîskê be baş e?

Yabo bi namûs ez dibêjim hinekan li ser Erdogan û hikûmeta wî xwendiye wî- Yan ji wan re niviştek çêkirine û yan jî devgirêdan çêkirine. Yan na ev biryara weşana Kurdî ji ku derket yaw!

Werhasil, xwedê bi elba mezin da hunermendên me. Bi sê telaqan ewê têkevin dora derîyê TRT û li derbasbûna xwe poşman bibin! Heta niha tenê derdiketin Roj TV, îcar ez ditirsim hew silavê li hevalan jî bikin ellawekîl! De neyse, em biryara Recebo û TRT pîroz dikin û dibêjin: Aferîn lan! Ma Tirk bilasebeb dibêjin:”Domûzdan ne koparirsan kardir” heyran, wîî! Ê me jî: “Tirklerden ne koparirsan kardir” ellawekîl û xelas!