KAMPANYAYA NAVÊN ŞÊNGEHAN ÊN KURDÎ

Weke tê zanîn dijminên gelê kurd li gel hemû nirx û rûmetên me yan tune kirine, yan nav û naverok guherandine û kirine malê talanê. Bi van polîtîkayên qirêj ên tunekirinê re navên hemû şêngeh û wargehên Bakurê Kurdistanê hatine guhertin û kirine tirkî. Her çendî salên pêşîn kesekî paxav bi van guherandinan nedikir û her navên kurdî bikar dianîn jî, niha êdî roj bi roj em navên şêngeh û wargehên xwe ji bîr dikin, di şûna wan de navên ku dewletê fermî li wan kiriye em bi taybet di nivîs û nûçeyên xwe de bi kar tînin. Lê em wê hesabê nakin ku dê herî zêde nifşek an du nifşên din navên bi kurdî bi temamî bêne jibîrkirin û dê yên ku wan navên tirkî li şêngehên me kirine jî bigihêjine mirazên xwe û îdîayên nû bi pêş bixin ku ev şêngeh ji bav û kal ve yên wan bûne, çawa ku li Newroza me kirin!..

Mêvanên hêja; ji ber van sedeman me jî grîng dît ku em bi armanca berhevkirina navên bajar, bajarok, nehiye, gund, gom û taxên Bakurê Kurdistanê yên bi kurdî kampanyayek bidine destpêkirin.

Em bang li her kurdekî dilsoz dikin ku di şûna xwe de navên kurdî û li ber wan jî yên tirkî yên şêngehan binivîse û ji amîdakurd re bişîne. Bi vî rengî em ê hewl bidin ku bajar bi bajar, bi bajarok û nehîyeyên xwe ve, navên hemî gund û taxan, ên Bakûrê Kurdistanê bi tirkî û kurdî bêne qeydkirin. Çi pêzanînên ku hatin ber destên me, em ê di malperê de bi awayekî sîstematîk biweşînin.

Armanca me berhevkirina hemî navên tax, gund, bajarok (qeseba) û bajarên Bakurê Kurdistanê ye. Bi vî rengî kî bixwaze dikare vê lîsteyê ji amîdakurd bigire, li ba xwe qeyd bike û dema pêwîst bû li vê lîsteyê binihêre û navên kurdî bikar bîne, li şûna ku navên tirkî bikar tîne!.. Em bawer in ku dê ev ji bo neteweya kurd bibe xizmeteke mezin.

Li gel rêz û silavan
Redaksiyona Malpera Amîda Kurd
amida@amidakurd.com