MILYONEK Û HEŞTSED HEZAR SAL BERÊ

TASA SERÊ KURDAN....

 Lotikxanê skeletê pênc mirovan li Gurcistana girêdayî Kurdistanê ve dît û pêşkêşî raya giştî ya cîhanê kir.

Axkologên Lotikxanê yên binerd, dema li nêzî Tiflîsa paytexta Gurcistanê lêkolîn dikirin, pêşî tasa (qoqa) serê mirovekî dîtin û pêre pêre hinartin Werbêjxaneya Lotikxanê. Tevdezan û pisporên DNA (Danasîna Nijada Ademîzad) yên Lotikxanê dema werbêj kirin, peyitandin ku milyonek û heştsed hezar sal berê ev serî ketiye binê axê.

Axkologên Lotikxanê lêkolîna xwe li wê herêmê domandin û di encamê de çend skeletê din jî dîtin. Tevek bûne pênc skelet, du zilam û sê jin.

Herweha li ba skeletê van pênc mirovan, hin hestiyên sewalan û bûjenên ji keviran çêkirî ku pê sewal têne kuştin jî derketin holê.

Di werbêja dawîn de derket holê ku ev skelet yên Kurdên pêşî bûne û ew bapîrên mirovên li dinyayê ne.  Piştî lêkolîn û lotikên dûr û dirêj, zanyarên me bi sê telaqên jinberdanê sûnd xwarin ku di DNA van skeletan de %500 reh û damarên Kurdan hene û hetta navê wan jî kifş kirine.

Pisporên me dîsa bi şeş telaqên jinanînê sûnd xwarin ku navê Kurdekî ji wan ”Xelefê kurê Sofî Brahîmê Dekşûrî” û navê Kurdê din jî ”Ristemê kurê Helîma Hebizbinî” ye.  Û navê hersê jinên Kurd jî ev in:

-Xezala keça Silhedînê Gavanê Mûşê

- Binevşa keça Ehmedê kurê Kerçirênê Sêrtê

- Fatima keça Eyşoka doxînsista Ezeromê

 Axir, pisporên me derxistin holê ku ev herpênc Kurd, berî bi milyonek û heştsedhezar sal berê derketine nêçîra kovîyan û berê xwe dane herêma Gurcistana Kurdistanê. Ji xwe hûn zanin ku wê demê Kurdan împaratorîyek ji ya Osmanî mezintir li dar xistibûn û dinya li ser tilîya xwe dizîzikandin. Gurcistan jî herêmek ji herêmên Împaratorîya Kurdistanê bû û ji bo nêçîrê yek û yek bû.  

Werhasilî kelam, ji ber ku Kurd bapîrên insanîyet û şaristanîyê ne, li gora pispor û zanyarên me dibêjin, çi insan û mexlûqatên ku li ser ruyê erdê hene bi esl û koka xwe Kurd in.

Li benda Lotikxanê bin, wê li ser vê meselê di nêz de nûçeyên nû bên weşandin…

Axkolog û Arkeologên Lotikxanê

Bakurê Kurdistanê 10-09-2009