Aydin Orak;

‘Nameyên protestoyî bişînin'

 AMED - Derket holê ku amadekarên rêzefîlmê Gazî ku di televîzyona ATV’ê de tê weşandin û di hemû beşên xwe de heqaretê li kurdan dike, pêşniyara lîstîkvaniya rêzefîlmî ji lîstikvanê kurd Aydin Orak re biriye. Orak anî ziman ku fîlmçêkerên rêzefîlmê Gazî ku senaryoya rêzefîlmî bi xwe re anî bû pêşniyara listikvaniyê lê kiriye. Orak, wiha got: “Piştî ku min çend rûpel ji senaryoya wan xwend, min senaryo avêt ser maseyê û pêşniyara wan red kir.’ 

‘Heqaretê li nirxên kurdan dikin’

Şanogerê kurd Aydin Orak aşkera kir ku fîlmçêkerên rêzefîlmê bi navê Gazî pêşniyara rolgirtinê ji wî re aniye. Orak pêvajoya pêşniyara ji bo rolgirtinê ji bo rojnameya me vegot: “Telefonek ji min re hat, gotin; Em dest bi rêzefilmekî nû dikin. Em dixwazin hûn jî tê de bilîzin. Ez çûm hevdîtinê. Min senaryo xwest, min çend rûpelê senaryoyê xwendin. Piştre min avêt ser maseyê, min got biborin ez ê tiştekî bipirsim; hûn ji bo çi vî rêzefîlmî dixwazin bikişînin? Gotin; ‘em dixwazin dayikê şehîdan bextewar bikin.’ Min got; Lê dema ku hûn dayikekê li aliyekî bextewar dikin, hûn dilê dayikên aliyê din dikin birîn.”

‘Teşwîqa bo şovenîzmê dikin’

Şanoger Aydin Orak li ser senaryoya rêzefîlmê ku di hemû beşên xwe de qala lehengiya leşkerên tirk dike û heqaretê li nirxên neteweyî yên gelê kurd dike, nêrînên xwe anîn ziman û wiha got: “Di senaryoya ‘Gazî’ de gerîla bi gotina wan “terorîst” gundiyan dikuje. Weke wehşan nîşan dide û hwd. Min got; di vê senaryoyê de tiştekî rast tuneye, hemû şaş in. Tu caran gerîla gundî nekuştiye û nakuje jî. Dev ji van senaryoyên bi qirêj berdin. Berpirsyarê lîstikvanan yê rêzefîlmî ji min re dibêje; ma tu ne lîstikvanekî profesyonelî? Min got; profesyonelî ne ew e ku mirov di fîlmê ku kufriyê ji gelê xwe re bikî. Ev rêzefîlmên wisa ku bi şovenîstî têne çêkirin, ne çareserî ye, her wiha şer di nava civakê de gur dike.”

‘Ji RTUK’ê re gazincên xwe bişînin’

Aydin Orak di dewama gotinên xwe de anî ziman ku ew hunermendekî kurd e û nabe ku heqareta li hemberî nirxên gelê xwe qebûl bike û wiha pê de çû: “Ez wek aktorekî kurd dibêjim ku, kesê ku piçekî namûs di pozê wan de hebe; çi aktorên kurd, çi aktorên tirk, divê di van fîlm û rêzefîlmên xizmetî şer û nijadperestiyê dikin de cih negirin. Divê hem ji bo lîstin hem jî ji bo temaşekirinê ev rêzefîlm werin protestokirin. Her kesê ku destê wî pênûsê digire divê ji van kanal û şîrketên fîlman re nameyên protestoyî bişînin. Ji bo RTUK’ê gazincê xwe bişînin.”

Çavkanî: AZADIYA WELAT