“BADOK”

Azad Kanîwar

Demekê li ba Kurdîhezan peyvên nû çêkirin moda bû. Ez jî ketibûm pê vê modayê! Li şûna peyva dîreksîyonê min bi Kurdî peyveke xweşik dîtibû; badok, ji badanê badok!

             Tabî ji bo ku vê dîtina xwe ya balkêş biceribînim, çûm ba hevalekî û di navbera min û wî de sohbeteke dîrokî derbas bûbû! Min digot ez ê ji wî derxînim ka badok çi ye. Heger badok peyveke rast û watedar e, divê ew bizanibe. Rasterast bibêjim, min li şûna peyva dîreksîyonê  peyva badok çekir, hîngê ez nizanim ka badok rast e an na? Her weha  wê çaxê  tahma xwe jî namîne. Min jê pirsî:

-         Badok çi ye, tu dizanî?

-         Ew çi ye lo? Bi Kurdî xeber bide qurbanê te me.

-         Temam, gava ku ez dibêjim badok, çi tê bîra te? Pir û hindik dişibe çi?

-         Wele, qet tişt nayê bîra min, te ew ji ku anî? Naşibe tu tiştî.

-         Hinekê bifikire hevalê min ê delal, mêzeke badan heye, yanê tiştê ku tu badidî. Hele bifikire, tu yê bizanî.

-         Welehîn, te serê min êşand, here ji yekî din bipirse! Porê serê min jixwe spî bûye,  te serî bi badanê xwariye!

-         Ez ji te re wisa bibêjim, badok tiştekî girêdayî erebeyan e, parçeyekî wan î li ber çavan e. Ka niha bibêje, ew çi ye?

-         Tu çima li ber xwe didî!  Ez te fam nakim, kekê min ê delal, naşibe tiştekî, ez bibêjim teker e, tu yê bibêjî çima? Tu karê min tune têkevim dû tekerê!

-         Na, ne teker e. Lê tu nêzik bûyî. Xuyaye ku tu ketîyî inyadê! Lê ez ê ji te derxînim. Bisekine, niha di serî xwe de otomibîleke bedew xeyal bike. Yanê otomobîleke ku tu jê hez  bikî bîne bîra xwe.

-         Temam, min anî, ez otomobîleke xweşik û bi biha dibînim.

-         Baş e, niha deriyê wê veke.

-         Min vekir.

-         Baş e, niha têkevê û rûne.

-         Ketimê û rûniştîm.

-         Li ber xwe mêzeke.

-         Mêze dikim

-         Çi li ber te heye?

-         Qoltix!

-         Çi?

-         Qoltix!

-         Yaw heyran tu çima ketiyî iynadê, rast bibêje çi li ber te heye, her du destên xwe bi ser de!

-         Temam, wisa dikim. welehîn bîlehîn qoltix e.

-         Lo, tu li ku derê otomobîlê rûnistiyî?

-         Li qoltixa paşî....

-         Çi...?

-         Te go derî veke û rûne, min jî deriyê paşî yê otomobîlê vekir û rûniştim,  te nego deriyê pêşî veke û rûne...

-         Hey xwedê! Hey badoook!....

05/08/06