Bangewazî

 Bavê Jîndar-

Jibo partî, rêxistin, komel û saziyên Kurdan.

Jibo hemu kesên xêrxwaz, qencîxwaz, Kurdhez, zarohez û xwedî wijdan.

Jibo hemu eşîr, axa, beg, rêncber, karker û kardarên Kurdan.

Heke hûn naxwazin zarowên cîran, gundî, bajar û welatê we bikevin halê vî –wê zaroka di vî wêneyê jorîn, xwe bilezînin û wan zaroyên kolan û kuçan bifilitînin. Ev zaroyên me ji ber koçberîya şerê qirêj li bajarên Kurdistanê û metropolên Tirkan cîwar bûne. Ji van zarowan hinek hem êtîm û hem jî sêwî ne. Hinek ji ber tunebûna kar û şol, bavê wan nikarîbûye bişîne mekteban. Hinekan texda lêhatine kirin. Hinek jî bi hêvîya jîyanek xweştir ketine kolan û kuçan.

Ev zarowên me, li kolan û kuçan, li ber baranê, bin befrê, di sir û seqamê de bê balgî, lihêf û doşek, li derve radizên. Ji ber ku ew Kurdin dewlet çu alîkarîyê bi wan re nake. Beşek ji van zarowan ketine destê mafîa eroînfiroşan. Beşek ketine destê çeteyên parskirinê. Beşek ketine destê çeteyên diz û malşelandinê. Beşek ketine destê çeteyên xeracstandinê. Hinek dibine qurbanên mafîa organan, dil,mêlak û gurçikên wan tên derxistin û firotin. Beşekî dewlet  dibe, jibo kuştin, provaqasyon û îşkencekirinê perwerde dike.  Hinek jî bûne tînerkêş. Zarowên keç, bi destê mafîa jinfiroş û pêzeweng tên hetikandin (tecawûz kirin ) û firotin. Beşek jî hêşta neketine destê van celbkesan û di kolanan de radizên û li benda alîkarîya me ne.

Wek pêşniyar tiştê ku bi lezûbez bên kirin ev in: 1- Cihê razan û lêmayînê peyda bikin. 2- Zarowan ji kolan û kuçan berhev bikin û bînin li wir cihwar bikin. 3- Cîranên derûdorê ku xwarin patin bila firaxek ji wê xwarinê jibo wan zarowan bişînin. 4- Cîran kinc, libas, sol pirtûk, pênus, tîtik û lîstikên zarowên xwe yên kevin bidin wan zarowan. Mamhoste, doxtor û hemşîrên teqawitbûyî  bila rojê seetek xwe bidin perwerdekirina van zarowan.  Û hwd.

Heke hûn neşên van tiştan jî bikin, dema hûn wan dibînin, qet nebe rûyekî  bi ken nişanî wan bidin. Rû û rêya xwe ji wan neguhêzin. Ew mihtacî bişirîn, rûkenî, şewqat û hezkirinê ne. Di dilê xwe de pencereyek biçûk jibo van zarowan vekin .Vê şewqatê ji wan nehevişînin.

Ji me gotin û li xêrxwazan kirin...