Serok Barzanî di hevpeyvînekê de ligel rojnameya Erebî Al Nahar:

Beyrut-Avesta

Rojnamevanên Ereb ligel Serokê Kurdistanê li Hewlêrê hevdîtinek pêk anîn.

Rojnameya Libnanî Al Nihar hevpeyvînek dirêj ligel Barzanî çêkir.

Em li jêr beşekî ji hevpeyvînê bi Kurdî diweşînin:

Pirsa Kerkûkê

“Li ser pirsa Kerkûkê dixwazim tiştekî bibêjim, ji aliyê cografî ve Kerkûk dikeve sînorê Kurdistanê, ev jî rastiyek dîrokî ye. Lê belê li aliyê din Kerkûk bajarekî Îraqî ye, weke Hewlêr, Bexda û Duhok. Ji bo me Kerkûk sembola zilma li ser gelê Kurd e. Ne ji ber hebûna petrolê em dibêjin Kerkûk Kurdistanî ye. Petrol ji bo hemû gelê Iraqê ye. Tiştê em dixwazin ewe ku em şaşiya dîrokî ku li Kerkûkê pêk hatibû serrast bikin.

Kurd yek milet e

“Kurd yek milet e. Li perçeyek/ Kurdistanê tiştek çêbibe tesîra xwe li perçeyê din dike, çi baş çi jî xerab. Lê belê em mudaxeleyî welatên cîran nakin, ew welatên ku birayên me yên Kurd lê dijîn. Lê belê ev nayên wê wateyê ku emê piştgiriya birayên xwe yên Kurd nekin…”

Pirsa Kurdî çareser bikin

“…Em bang li hikûmetên Suriyê, Iran û Iraqê dikin ku pirsa Kurdên li cem xwe çareser bikin û mafên wan bipejirînin. Eger siyaseta înkarkirina gelê Kurd  bi serkevtiba, wê berî salan ew pêk bihatiba. Pirsa Kurdî mecbûre bi riyên aştiyane û demokratîk bê çarserkirin…”

Ensar El Îslam ne li Kurdistanê ye

Serok Barzanî li ser pirsa rêxisina Ensar Al Îslam wiha got: “Ew niha ne diyar in, lê navenda wan Musul, Remadî û Tekrît e. Ew bi grupa Zerqawî re kar dikin. Her çiqas ew car caran bi dizî derbasî Kurdistanê dibin jî, lê tu cihekî wan li Kurdistanê tuneye…”

Dr. Kemal Qadir poşman bûye

Serok Barzanî li ser Kemal Qadir ku berî demekê ji zindanên Kurdistanê serbest hatibû berdan wiha got: “Dr. Kemal Qadir weke hemwelatiyekî Nemsa hate Kurdistanê, gotarên bi dijûn li dijî şexsiyetan nivîsandin, bêku rexne bike yan jî nêrîna xwe di derbarê tiştekî de bîne ziman. Ew ji ber wan dijûn û îhanetkirina şexsiyetan hate girtin. Tevî vê yekê jî ew serbest hate berdan û niha li Nemsa dijî. Min bihîst ku ji ber gotinên xwe poşman bû ye.

Pirsa Kurdî li bakur pirsa miletekî ye

Barzanî di derbarê PKK de nêrîna xwe wiha tîne zimên: “Pirsgirêk bi xwe siyasî ye. Eger PKK nemîne jî, divê pirsgirêk bi awayekî aştiyane bê çareserkirin. Pirsgirêk pirsgirêka mafan e, divê bi awayekî aştiyane bê çareserkirin. Pirs pirsa mafên gelekî ye, ne pirsa partiyekê ye… em û PKK di gelek aliyan de ne di yek nêrînê de ne…”

jêder: Al Nihar (27.04.06)