Lotikxane    

           <<  Magazîn, henek, gilî û gazin  >>

Wille û bille helal be cîgerim !

Nûrojê Hebizbinî- 07/04/08-Êlih- Yaw birastî jî van DTPî yan xwe dayêyê ha. Bi telaq heçê heqê wan bixwe wê rasterast berê xwe bide cehnemê, wîî! Mêrikan natirsin û gotina "Kurdistanê” ji ser zimanê xwe navêjin. Werhasil, dibêjin wekîlê DTP kekê me Bengî Yildiz di kongreya DTP a şaxê Êlihê de gotiye:”Cîgerlerim, canlarim, gurçiklerim, Kurd êdî doza Kurdistanek otonom dikin. Kurd efûyek giştî dixwazin, ji sîstema Îmralîyê re dibêjin naaaaaa!” filan û fîstan.

    Û piştre jî qîriyaye, destê xwe li masê xistiye û gotiye:”Keko brao! Em wek millet hazirin di zindanan de razên, tu bedêlek tune ku emê nikaribin bidin. Me hêza xwe di Newrozan de eşkere kir, heger dewlet ne kor be wê bibîne. Em li vir in, hewce nake hûn çiyayên Kurdisyanê bombebaran bikin, ên li serê çiyê brayên me ne, ê de werin me jî bombe bikin haaaaa, hey min di we kirino!” filan û dîsa fîstan.

   Werhasilî kelam, Bengîyê me wek beranekî kol dewleta virqo da ber poş û pehînan û tirr jê berdan ellawekîl!

Kuro her bijî qardeşim, wille û bille mêranî xweş e! Hema bi derewan be jî, gotinên rast xweşin û tu sax!