Beza bi tifing û pêxîzankê Bîathlon

Cembelîyê Botî- 17/09/08-Gever-

Li Tirkîyê ev bûn du mehe beşek spora millî ya zivistanê vebûye. Ev beşê sporê li Tirkîyê nû ye. Antrenorê wê Necip yaşar (Kel Mehmûd) sêzde salin spora pêxizankê dike. Şeş salan li Hekarya berpirsê sporê yê fexrî bûye. Heta niha sed û bîst madalya wergirtine. Ev bû du mehin jî bûye Antrenorê Bîathlona millî ya Tirkîyê. Hejmara  werzîşvanên wê deh kes in. Du ji wan Geverî ne. Yek keçek Kurdan e û navê wê Şebnem Over e,  yek jî xortek Kurd Ayhan Arslan e.

Ev spor me di fîlimên ajanan û James Bondan de didîtin. Niha jî bûye beşek spora sivistankî ya Olimpîatan. Qaîdeyên wê sporê ev in. Bi pêxizankê (pêkole- xîdor) bişemitin (biselin- hûlîsin), bi xizankê bazdin û bi tifingê li ser pîyan an jî dirêjkirî li armancê xin. Çi jin be çi jî mêr, divê her yek sê caran li ber yek bidin. (berberîyê bikin.)

Nîşanka wan  50 m dûr e. Jibo serpêyan mezinahîya nîşankê 115mm, jibo dirêjkirî jî 45 mm ye. De vêcar nebêjin „hema Geverî dibêjin du kîlo toz yek otobos“. Bi xêra wê toz û otobûsê li Kurdistan û Tirkîyê, heta li hemi welatên Misilman îmza xwe tavêjin bin bûyerên pêşîntirîn.

Hêvîdarin wê ev xortên me di pêşerojê de jibo me madalyên navneteweyî bînin.

Ma em çi bêjin. Geverî hem rûyê me reş dikin hem jî spî dikin.

Dê bajon xortino bajon em bi we re.