44 KURD

BÛNE QURBANA NEFTA KURDISTANÊ

Çarçav Şûrkêş- 08/07/09- Kurdistan- Li ser riya di navbera Amed û Mêrdînê de, li kêleka gundê Siltan Şêxmûsê Enzelî malbatek bi navê Malbata Çelebä heye. Ji gundê wan re bi Kurdî dibêjin kertê û bi Tirkî jî dibêjin Bilge Koy.

Çawa ku medya Kurdî û ya cîhanê jî pê dizane, şeva 4ê Gulana Îsal, 44 kes li salona dawetê hatibûn kuştin û 10 kes jî birîndar bûbûn. Ji birîndaran piştre 3 kesên din jî miribûn.

Hinekan got: Alîyek qoricî bûne û aliyê din dest danîne ser zevîyên wan, ji ber hindê ew kuştin derketiye. Hinekan got: Na wele li ser qîzekê çêbûye. Hinekan got: Na wele li ser masîyan çêbûye… Lê kesî jî ya rastî negotiye. Lewre naxwazin û newêrin ya rastî bêjin.

Ew kuştin, li ser diziya nefta Kurdistanê çêbûye.

Ha, eger hûn bêjin: Kerkûka Başûrê Kurdistanê li kurê û ev gundê li Bakurê Kurdistanê li kur?

Li lêkolînê binerin: Ji roja ku ew bûyer rû daye, Lotikxanê hemû pisporên xwe yên sererd û binerd xistine tevgerê, da rastiya kuştina wan 47 Kurdan derxînin holê û eşkere bibe.

Şeva çûyî, encama raporê beşa pêşî geha navenda Lotikxanê. Mesele ev:

Sal 1990-91. Dema Dewleta Tirk teklîfa qoricîtîyê li gundiyan kiriye, hinekan qebûl kiriye û hinekan qebûl nekiriye. Ewên qebûl nekirine, ew ji gund hatine qewirandin.

Ew xeta petrola ku ji Kerkûkê tê Tirkiyê, di nîvê wî gundî re dibihure. Leşkerên dewletê û van gundiyên ku bûne qoricî, di nîvê gund de borîyek qul kirine. Her roj çend tankêr petrola xav ji boriyê dikişînin û her tankêrek bi 30 milyarî (perê Tirkiyê) difiroşin.

Du-sê sal berê, dema ew gundiyên ku qoricîtî qebûl nekiribûn û ji gund hatibûn qewirandin, vegeriyane gundê xwe û bi mesela dizîya petrola xav hisiyane, xwestine ku par bidin wan jî. Lê ewên qoricî û serleşkerên dewletê gotine ku, eger em par bidin van, wê diziya me eşkere bibe.

Îcar serleşkerên dewletê plana kuştina wan tevan çêkiriye û ew bi destê pismamê wan dane kuştin.

Îcar niha Saziya Lêkolînên Lotikxanê mureceet kiriye da heyetek ji Hikûmeta Kurdistanê, Hikûmeta Îraqa Federal, Yekîtîya Miletan û Yekîtîya Ewrûpayê çêbibe û herin wê borîya neftê kontrol bikin. Gava qulika tê de dîtin û tiliya xwe xistin wê qulikê, wê her tişt eşkere bibe û wê qûna reş û spî derkeve holê. Helbet heger mar û dûpişk di wê qulikê de bi wan venedin haaaa. Heger mar û dûpişkan bi tiliyên heyetê vedan û tirr ji wan berdan, tê wateya ku ji sedî sed ev qetlîam bi destê dewletê hatiye kirin. Na heger di qulika borîyê de mar û dûpişk tunebin, dîsa tê wateya ku ji sedî sed dewletê ev qetlîam kiriye.

Axir, em wek Lotikxane niha li bendî hatina heyeta beynelmînel in. Sîxurên me wek Qomser Kolombo lêkolînên xwe berdewam dikin û bi sê telaqan sûnd xwarine ku dev ji vê meselê bernedin.

Çarçav Şûrkêş

Serokê Navenda Lêkolînên Sererd û Binerd ên Lotikxanê

KURDISTAN.