Ezbenî eve soza me nebû

Cengoyê Xemcivîn- 14/06/09-Duhok-

Serokê minê hêja û xebatkar !

Heyrana te bim, ma soza me eve bû qurban ?!

Li rojên reş û giranên şorişa Gulanê çend cara te kerem kir û ji me re got:” Hûn şêrên Kurdistanê ne, bi qasî bilindiya çiyayên Kurdistanê şeref û şanazî li we dibare, roja ku em serkevin emê xweştirîn jiyan ji bo we û malbatên we temîn bikin, emê caş û Kurdên xwefiroş bikin xulam û xizmetkarên we” !!!

Wella ezbenî we pir xweş gotibû û me jî her rojê davête ser fewceka dujmin û hineka ji me lingê wan qut bûn, hind jî dest û em mîna dara kezaxtî lêhatin heta me Kurdistan anî vê qonaxê. Lê qurban, nizanim haya te jê heye yan ne ku piraniya me “ şêrên” wê demê rezîl bûne û ketine ber dîwara, wellehî dilê kafira bi me dişewite. Ne jiyaneke bextewer û ne jî rûmet û rêzgirtin me nedîtin.

Serokê minê hêja !

Ma ev tenê ?

Bi vê jî dev ji me bernadin, caş û xwefiroşên wê demê û Refîq mefîqên Baasî anîne û li ser serê me kirine Emê Gozê û li şûna ew bibine “xizmetkarên me” welle ezbenî em kirine berdest û xizmetkarên wan. Mîna Mihemed Şêxoyê nemir dibêje “ ser da ji pîsa re em kirne henek “.

Ji axayên serok caş re îro her tişt didin mîna: Xanî, erd, trombêlên herî nû, berpirsatî, perê kuçkê ( dîwanê), miaşê xulaman ûûûûûûûûûûûûû pir tiştên din ku di rûyê te de fedî dikim bêjim, û ji me jî re kirêçîtî, hejarî, rezalet maye.

Ezbenî, Evdalê Zeynê rezîl bû lê wî karî stiraneke pir xweş bi halê xwe bistirê, lê a me kesek tune stiranekê  jî bi ser vî halê me ê kambax de bilorîne û bêje:

Pêşmergê mino lawooo

Taşt nanê req û şîv çawoo

Duh qehreman îro li erdê mawoo

Te Kurdistan rizgar kir....

Lê xwar caşê Bexdawoo

Hewara min ji serok bê...

Li hewara mawoo

14/06/09- Duhok

Cengoyê Xemcivîn

ferashin1976@hotmail.com