Piştî Bill Clinton niha jî

Chirac ji ber tolaziya xwe gelekî poşman e

Serokkomarê Fransayê Jacques Chirac di pirtûkek nû ya bi navê ``Mêrê Elysseyê ku nayê nasîn`` de qal dike ku jina xwe, Xanima hêja Bernadetteyê xapandiye, bi jinek e din re razaye. Lê poşman e, qet nafikire ku hevûdu berdin. Bi rêz Chirac dibêje: ``Kêfa min ji gelek jinan re dihat, lê ez wurya bûm. Min ji wan nefret ne kir, lê bi wan ve zêde nehatime girêdan``...

Li ser vê bûyerê, me nameyek dostanî ji bermaliya Chirac, hêja Bernadette re şand:

Xanima Hêja Bernadette.

Piştî silavên xwe yê germ, ez ji Yezdanê mezin daxwaz dikim ku emrek dirêj bide We. Şifayê ji qîza We Laurence re dixwazim.

Min nivîsa Serokê birêz Chirac di rojnameyekê de xwend. Derbas bûyî be. Min wek kurdek fransîhez, xwest ku bibim şirikê derdû kulê Te. Paşê jî bi çend peyvan dîtina xwe bînime zimên.

Ez nizanim bê çiqasî Tu ji qederê bawer dike. Qedera serokan wisan e, dikare carna belayên şêrîn bê pêşiya wan. Lê wisan xuyanî dike ku weke Bill efendî, çi gunehê Chirac abê tune ye. Bi ihtîmalek mezin senaryoya vê buyerê jî wisan e: Jinik zane xwe pê çêke û têkeve çavê wî. Şatir û jêhatî ye. Sîng û berê teze pêş Chirac kiriye û aqilê wî ji serî wî çûye. Feqîrê Chirac jî dibe qûrban û nikare xwe li ber nazên wê bigire...

Xanima hêja Bernadette. Apê Chirac fêhm bik! Ew jî guneh e, nikar e bê qîzên xweşik bijî.  Nikare ji jinan nefretê bike, û ne ew kese ku telaqê te jî têxe destê te. Bi jinan ve nayê girêdan, lê destê wî ji yê xweşik jî nabe. Pêşî dike, paşê jî poşman dibe û hezkirina xwe li hemberî Te bi dengek bilind tîne zimên. Bi baweriya min, Ew evîndarê awirên Te ye.

Îca, kesên wisan rast go, tê efûkirin. Carekê Wî tolazî kiriye. Bi carekê mirov xirap nabe. Lê tenbiya min li Te bê, serê Wî bernede. Piştî nîsanê teqawît dibe. Li gorî doktorê me yê hêja Dr. Cemal Leheng, deprasyona teqawîtbûnê tenê bi evîniyên nû û qedehên şerabê dikare sivik bibe. Çi çareyên din tune ye. Lê xaltika Neyo berevajiyê wî, bi awayek ilmî rêyek e din nîşan dide: Pêwîst e Xanim Bernadette biya min bike û here Kurdistanê. Li Nisêbînê li tenişta Kijla kevn, mala Piftî efendî heye. Bila di şûna heft sedeqeyan de, ji Goşto, heft serûpiyan bikire û bide malbata wî. Paşê li mala Xalê Neîma bipirs e. Xalê Neîma devgirêdana bi awayek profesyonel çêdike. Pêwîst e tayek ji pora Bernadette, heft şevan li ber tava heyvê  bimîne. Her şevê, heft ``yasîn`` û du ``qulhu walahu wehdu`` li ser bixwîne. Paşê wî tayî bîne Parîsê. Êvarê berî razanê, hinek ava gulan berde ser taya porê xwe, têxe mîkserê û li ser sê ``ayetil kursî`` bixwîne, paşê serê Chirac bi wê avê bişo. Adinî rojê, dê Chirac bi heft dilan dil bikeve Bernadette. Di çavên wî de dê Bernadette bibe mîna Janifer Lopez û Şakira xuyanî bike.

Ez jî spas dikim. Di xweşiyê de bimîne.

Gabar Çiyan

Astrologê Lotikxanê