Sofî Xelef

Çima Lotikxane?

Em Kurd milletekî xwedî henek, pêkenok, qerf û tinaz in. Di civata Kurd de ken ciyekî taybet digre. Belkî yek ji zîndehiştina me jî ev çanda ken û henekaye. Bêguman milletê Kurd milletekî cefakar e, êş kişandiye, dikşîne. Lê tucarî ken û henek ji civata xwe kêmnekiriye. Lê mixabin, bi taybet li bakurê Kurdistanê, piştî 1980 û virde ken û heneka ciyê xwe ji şîn û grî re hişt. Hertişt bi siyaset û şer ve hat girêdan. Civata me hêdî hêdî ken jibîr kir, henek jibîr kir û beşek ji çanda xwe wenda kir. Jixwe nifşên nûhatî yekcar ji vê çandê bidûr ket, zimanê xwe, gellek ji nirxên civata Kurd jibîr kir û bi mejiyekî biyanî, bi mejiyekî Tirkî mezin û perwerde bû. Bêguman zêdebûna malperên Kurdî pêşketinek baş û bi fêde ye. Lê gava em bala xwe didin van malperan, piraniya wan naveroka xwe bi siyasetê dadigrin. Siyaset jî beşek ji rastiya me ye, bêyî wê jî nabe. Lê me di meydana înternetê de valahiyek dît ku ew jî vejandin û nûjenkirina çanda me a ken û heneka bû. Me xwest balê bikşînin vî aliyê çandê û cardin wî nirxê ku wenda dibe bi paşde vegerînin. Belkî hinek bêjin ku em siyasetê nakin û ev kêmasiyek e. Lê na, em siyaseta xwe jî bi awayê mîzahî û devavêtinî dikin, lotikên xwe li dijminên xwe jî dixin. Helbet ne tenê dijmin, lê em şûjinê di xwe de jî radikin, kêmasî û xeletiyên xwe rexne dikin, berî go em derziya çavê xelkê bibînin em şûjina di çavê xwe de jî dibînin. Gellek kes evêna xelet fêmdikin û wek “dijminatiyê” binavdikin. Lê dijminatiya kes û partiyên Kurdî ji me nayê, em nakin, lê nayê wê manê ku emê şaşiyên wan jî nebînin û çavê xwe ji wan re bigrin.

 Di destpêkê de avakirina malpera Lotikxanê bi awayê fanyaziyekê hat rojevê. Jiber ku me zêde ji meşandina malpera înternetê fêmnedikir, em nezan û xeşîm bûn, heta bi ciyekî me bi tirs dest bi Lotikxanê kir. Lê piştî çend şaşî û xeletiyan em hêdî hêdî bi ser hev vebûn û bi hev hatin girêdan, malper bû Lotikxane û em jî bûn lotikvan!

 Me di meha Sibata 2006an de dest bi weşana xwe kir. Lê pêwistiya malperek bi vî awayî texmînên me serûbinê hev kir. Di nava 20 rojan de 262 hezar kesî serdana malpera me kir û em şoke kirin. Evê hejmarê enerjî û hêzek mezintir da me ku em weşana xwe berdewam bikin û bi riya vê malperê xizmetekê ji çanda Kurdî re bikin.

 Vê seeta ku em vê nivîsê dinivîsin (09.03.2006 / seet 04:00ê serê sibê, heta vê kêlîkê li gor îstatîstîka şîrketa ku em pêre dixebitin 354.771 (sêsed û pêncî û çar hezar û hefsed û heftê û yek) kesî serdana malpera me kiriye. Ev jibo malperek nuh hema bêjin rekor e. Em bawerin heta dawiya meha Adarê emê xwe bighînin nêzîkî milyonek xwendevan û bi dilxweşî xebata xwe bi pêşde bibin.

 Lotikxane wê ji her Kurdî re vekirî be. Her Kurd kare nivîs, henek, serpêhatî, karîkaturên xwe di malpera Lotikxanê de biweşîne, bi şertê ku bi dijminayî êrîşî şexsiyeta kes û saziyên Kurdî neke. Herweha kesên ku bixwazin reklamên şahî, dawet, sinnet, şîn û çalakiyên xwe di malpera Lotikxanê de biweşînin, karin bi riya emaîlê têkiliyê bi me re deynin.

 Emê bi alîkarî û piştgiriya we xurttir bibin, emê hevdu temam bikin û karibin beşekî ji çanda milletê xwe biparêzin û bi pêşde bibin.

 De kerembikin hûn jî di Lotikxanê de lotika bavêjin!