Dawet ferikî berbûk hetikî

Ehmed Beyan-07/11/07-Enqere- Dibêjin “Reva pisîkê heta bi dawîya kadînê ye”. Îcar xuyaye reva Serokwezîrê Tirkiyê Recebo jî heta bi Waşîngtonê bû. Mêrik qirik li xwe çirand, kezeb li xwe werimand û tirr di xwe de nehiştin hingî digot:”Emê têkevin başûr û emê têkevin başûr”.

Lê piştî fêkm kir ew tirr û fisên go dike bêhnek gennî direşîne derûdora xwe û li hesabê hinek alîyan nayê, rabû kumê xwe danî ber xwe û got:”Nabe qardeşim, wille û bille ev îş bê qîm û riza xalê me Bûşh nabe wîî” û mecbûr ma berê balafira xwe bide Waşîngtonê û li derîyê Qesra Spî xe. Hem jî bi du generalên xwe yên tirtirre haaaaaaa!

Werhasil, ji Kasimpaşalî Recebo weye ku wê xalê me Bûşh destê xwe jêre deyne ser hev û yeka wî neke dudu. Lê xalê me Bûşh hindik û rindik, nermik û germik ew da ber lotikên Emerîkî û kir go rêya ber lingê xwe nebîne. Yanî, ji mesela çewalan xerabtir anî serê wî û generalên wî ellawekîl! Xalê me Bûşh qet guh neda dagîrkirina başûr û sê çewal xistin serê Erdoxan û generalên wî.

Çewal yek: Wê îstîxbarat zêdetir bibe.

Çewal didu: Wê mekanîzmayek sêalî (Emerîka-Tirkiye-Iraq) bê çêkirin.

Çewal sisê:PKK terorîst e û dijminê hersê dewleta ye.

Îcar Tirk govendê digrin û dibêjin “Me daxwazên xwe dan qebûlkirin” û didin zîtirkan. Ûlan çîçiklerim, ma berê jî PKK wek rêxistinek terorîst ne di deftera Emerîkayê de bû? Ma berê jî mekanîzmayek sêalî nehatibû çêkirin? Êêêêêê? Îcar we çi qû bi ser xist oxlim? De neyse, ez bawerim ev tirr ji Tirkan re nema. Jibo temisandina gelê xwe wê çend bombeyan bi ser Çiyayê Qendîlê de berdin û bêjin “me operasyona xwe kir” û ser meselê bigrin. 

De a bi xêr......