"Penaberê Parîsê"

pena xwe dibe Qahîreyê


Fîlmê aktorê kurd Ahmet Zîrek, ji bo festîvala navneteweyî ya Qahîreyê hat hilbijartin.


PARÎS – Fîlma bi navê “Penaberê Parîsê” (Paris d’exil) ya derhênerê kurd Ahmet Zîrek ji bo Festîvala Navneteweyî ya Fîlman ya Qahîreyê hat hilbijartin.

33^yemîn festîvala Qahîreyê dê di navbera 10 û 20ê vê mehê (çiriya paşîn) de li paytexta Misrê bêt lidarxistin. “Penaberê Parîsê” di “beşê fîlmên dîjîtal” yê pêşbirkeya Qahîreyê de ye.

Fîlma Zîrek, berî niha jî, meha tîrmehê, li Festîvala Navneteweyî ya Parîsê hatibû nîşandayîn.

Derhênerê fîlmê, Ahmet Zîrek, ji bakurê Kurdistanê ye û zêdetirî 25 salan e li Parîsê mişext e û cara yekem a derhênerîya xwe, çîroka jiyana xwe vedibêje.

Ew kurê xwe dişîne bajarê xwe, Culemêrgê, ku bapîrê xwe bibîne. Zîrek vê serêdana pênç-rojî bi riya telefonê dişopîne û xem û xeyalên dema berê tên bîra wî ka ew çawa ji Kurdistanê derket û hat Fransayê. Kurê wî jî, bi wê rêwîtîyê bavê xwe nas dike.

Zîrek “Penaberê Parîsê” piştî weşandina kitêba xwe ya bi navê “Bihizire ku...” çêkiriye û fîlm hinek beşên wê kitêbê jî vedigire. Di fîlmê de rola serekî Zîrek dilîze. Wî heta niha di fîlmên Yilmaz Güney û derhênerên din ên navdar mîna Costa Gavras, Sally Potter û Jean-Luc Goddard de lîstîye. Aktorê kurd di  van salên dawîn bi lîstîkvanên wek  Isabella Adjiani, Monica Belluci û Johnny Depp re hevkarî kiriye.

Zîrek, ji dema şanogerîya Pagana Culemêrgê heta kolanên Parîsê, Güney hertim wek îdolê xwe dîtiye. Wî  fîlmê “Penaberê Parîsê” dîyarî dîya xwe û Güney kiriye.

Di “Penaberê Parîsê” de Zîrek rastî û xewn wek helbestvanekî wisa raçandîne ku mirov nizane ka rastî li ku bi dawî tê û xewn li ku dest pê dike.

09/11/2009

http://www.cairofilmfest.org/newsections/digitalcompetition.pdf