Hooowehhh kuro, xelk xwe ji wan disitirînin, Kurd jî wan datînin ser serê xwe!

Cemîl Cewher-26/06/07-Hewlêr- Dibe ku hûn zanibin. Cemeeta Fethûllah Gulen cemeetek ku “Turk-îslam sentezî-senteza Tirk-îslam” diparêze û wek dezgehek ji dezgehên dewleta Tirk dixebite. Ji xwe gellek çavkanî vê cemeetê wek şaxek ji şaxên Mîta Tirk piştrast dikin û xwe jê dûr dixin. Meselen Rûsyayê qebûl nekir ku cemeeta Fethûllah Gulen li Rûsyayê dibistanên xwe veke û lotikek lêxistin. Rayedarên Rûsya û gellek cimhûrîyetên Turkî cemeeta Fetho wek cemeetek “Nîjadperestên Tirk-îslam” binavkirin û dibistanên wan dan girtin. Werhasil,  ev cemeet ne jibo xêrê ye û xelas! Îcar em bên ser başûrê Kurdistanê û vê cemeeta tarî. Rêxistina Fethûllah Gulen (ku şagirdekî Melle Seîdê Kurdî – Seîdê Nûrsî) ye, ji 1994an û vir ve giranîya xwe daye başûrê Kurdistanê û ha ha bizrê Tirkitiyê di nav ciwanên Kurd de direşîne. Heta niha 8 dibistan û zanîngehên vê cemeetê li Kurdistanê hene. Li Hewlêrê:

-          Fezalar Eğitim Kurumları
- Işık Dil Merkezi
- Işık Ilköğretim Okulu
- Nilüfer Kız Koleji
- Işık Erkek Koleji

Li Silêmanîyê jî:

-          Süleymaniye Kız Koleji
- Selahattin Eyyubi Erkek Koleji
- Selahaddin Eyyubi Dil Merkezi

Di van dibistan, zanîngeh û kolejên han de sirûda Tirkî “Îstîklal marşi” bi xwendevanan didin xwendin, wêneyên Atavirqo di sinifên wan de daliqandî ne, û tam li gor dilê dewleta Tirk li def û zirnê dixin. Îcar dibêjin niha jî dixwazin giranîya xwe bidin ser karê weşangerî û çapemenîyê da ku zûtir karibin asîmîlasyonê xurttir bikin. Werhasil, em zêde sere we neşînin. Helbet hayê hikûmeta Kurdistanê jî ji vê rêxistina tarî heye. Lê ciyê meraq û şikê ye bê çima dewletek wek Rûsya (ku xwedîyê îstîxbaratek mezin e) xwe ji vê rêxistinê disitirîne, lê Kurdên me wê datînin ser serê xwe û derfetê didin wê. Gerçî tu ferqa OYAK û vê rêxistinê ji hev tuneye jî, lê li gora min rêxistinên ku di bin perda îslamê û bratîya îslamî de tên Kurdistanê, ji zirar û ziyanê pêve nikarin xêrekê bi Kurdan bikin. Hegira min ji rebê jorîn ev e ku rayedarên Kurdistanê di zanîn û nasîna vê rêxistinê de bin û hay ji lotik û pehînên wê hebin……