Senger Îloz

sengeriloz@hotmail.com

Rêdana Demokratîk

Gelî lotikvanên hêja piştî navberekê, bi silav û hûrmetên xwe yên çareseriyeke demokratîk, aştiyane û bê dilmayîn dixwazim balê bikişînim ser bêjeyeke ku di van rojên dawî de pir tê bikar anîn. Ev bêje ji ber ku di rojeva Tirkiyeyê de ye û me belengazên kurd jî eleqedar dike zêdeyî adetê tê bi kar anîn.

Ev bêjaya em behsa wê dikin bi Tirkî ‘açılım’ ango Demokratik Açılım e. Ji ber rojevîbûn û girîngiya vê bêjaya nûgihayî em neçar man ku li ser wê hinekî rawestin. Mijar girînge û berî ku çaresiya tê hêvîkirin pêk were, pêdiviya me bi çareserkirin û rast bikar anîna vê bêjeyê jî heye.

Weke lotikxane dîsa em giraniya xwe di deynin ser vê mijarê jî û hewl didin ku li şûna zimanzan û nivîskarên me yên hêja ku her yek ji wan navekî li vê bêjeya navborî dike, em çareyekê bibînin û wan hemûyan ji vê gelemşeyê rizgar bikin.

Bi Tirkî ‘açılım’ yekser standart e, lê bi Kurdî jî ‘Vebûn’ her çiqas zêde were bikar anîn jî hê ji bo çareseriyê ne bûye standart! Lewre Kurd ji ber ku heta niha tu çare û çareserî bi çavê xwe ne dîtine, di binavkirina bêjeyê de jî dûdilî û dûbendiyan dijîn.

Weke me got herçiqas bi wergereke yekserî peyva Vebûnê were bikar anîn jî, hin malper û nivîskar jî peyva ‘rêlibervekirin’ bi kar tînin. Ji ber ku em bi kurdî baş nizanin mesela me jî dibe weke mesela ‘al birini vur ötekine’. Êdî bifikirin ku, hê me di peyvekê de jî li hev ne kiriye, gelo emê di riya çareseriyê de çawa li hev bikin? Malpera Lotikxane ku bi dîn û îman û bi sond û peyman ji bo zimanê Kurdî hewl dide, êdî ji neçarî berpirsiyariya enstîtuyan digire ser milê xwe û bi qasî zanîna xwe dixwaze xizmeteke standardkirina ziman bike.

Piştî van sergêjiyan em dîsa werin ser mijara xwe û di vê bêjaya navborî ku wê qedera Kurdan diyar bike de, em dîtina xwe bînin ziman. Piştî gelek lêkolînan, wekî Lotikxane me li ser bêjeya ‘açılım’ ê biryarek da û emê vê biryarê bi xwendevanên hêja re parve bikin.

Peyvên Vebûn, Rêlibervekirin û hwd. têne bi kar anîn. Lê em jî dibêjin ‘Rêdan’ an jî ‘Rêdana Demokratîk’. Ravekirina vê bêjeyê pir hêsan e û di cih de ye jî. Ji ber ku armanc çareseriye divê peyvên me jî bi wê mantiqê bêne hilbijartin û fikirîn. Rêdan him rê dide him rê li ber vedike. Me ya xwe got. Bi hêviya ku ev Rêdan bibe sedema Vebûn û Rêlibervekirinan.

08.11.2990

Tirkîtiya Nû, Weşana Kurdî!

Gelî lotikvanên hêja, zîz û xesas, TV ya dewletê her diçe lotikên Tirkî û Tirkîbûnê li kurdan dixe. Di belgefîlmên bi navê ‘Anadolu Mayası-Haveynê Anadolê’ de dixwazin bi qeweta îmanê derziya Tirkîtiyê berdin laşê reben û belengazên kurd! Em jî li ser navê ocaxa lotikxanê vê helbesta Melayê Cizîrî bibîr tînin: “Li ber çewkan û kaşûyan, Ji derba Turk û Hînduyan, Dibazim her wekî goyan, Dema ew têne meydanê / Bi de’wa tên me yexma kin, Di amê şûr û xewxa kin, Sewaş û fitneyan rakin, Bi şûr ew têne talanê / Du talançî di meşhûr tê, Ji me’de eynê KAFÛR tê, Di têkil zulmet û nûr tê, Me KUFRÊ dî di ÎMANÊ, Me kûfrê dî di Îslam bî” 

Di TRT 6 ê de bi navê Haveynê Anadolê rêze-belgefîlm têne weşandin û di van belgefîlmên sosret de jî behsa mezinahîya Tirkî û Tirkîtiyê tê kirin. Heta tê gotin ku berî Qur’anê wehî jî bi navê kelamê ji Tirkîstanê ji Tirkan re hatiye şandin. Melayê Cizîrî di serdema xwe de gelek zelal şîrove kiriye û gotiye, me kufrê dî di îmanê. Ev nimûneyeke lê xuyaye emê hê gelek carên din rastî van wêşanên, paşverû û bêhnketî werin. 

Di van belgefîlmên ku bi nijadperestiyeke di bin perdeya îslamê de hatine amadekirin de, hin peyv hene ku mirov ji dîn û îmanê derdixin. Di van belgefîlmên di TRT 6 a ji bo kurdan wêşanê dike de têne weşandin, armanc nîşandana gewrebûna Tirkîtî û zimanê Tirkî ye.

Di ‘Haveynê Anadolê’ de wiha tê gotin: “Miletek bi zimanê xwe dibe milet. Ku te zimanê xwe winda kir ji miletbûna xwe jî derdikevî. Çand bi ziman dibe çand. Hemû gotinên pêşiyên me, hemû jiyana me, hemû dîroka me, hemû nirxên me, hemû baweriyên me, hemû di nava Tirkî de ne.” Şaş fêm nekin baş bixwînin ev gotin ne ji bo kurdan hatine gotin, lê ji kurdan re têne gotin. 

Herwiha di van belgefîlmên em behsa wan dikin de em gelek agahiyên din derbarê mezinahiya Tirkî û Tirkîtiyê de dibînin. Tirkên ji Asyaya Navîn û curbecur cihên din bi awayê dagirkerî hatine Anadolê, xwe wekî bingeha hemû miletên din nîşan didin û qaşo haveynê Anadolê jî wan daniye.

Di van belgefîlman de ji Xoce Nisredin û Mewlana bigire heta jiyan û serpêhatiya bi dehan kesayetiyên dîrokî bi Tirkîtî û Tirkbûnê ve têne girêdan û weke haveyn têne nîşandan. Ji wan re diziya fikr û ramanê jixwe rewa ye! Hema çi dîtibin xistine nav van belgefîlman û dixwazin bi şiklê îslamê û îmanê derziya Tirkîtiyê berdin laşê reben û belengazên kurd! Her ku kurd ne ew kurdên berê ne jî ewê heta hetayê dev ji van helwestên xweyî nîjadperestî bernedin. Xuyaye bi rêya TV ya kurdî heta ji wan were wê lotik li ser lotikan bavêjin û hewl bidin ku tirkîtiyê bi weşana kurdî empoze bikin. Em bang dikin û dibêjin êdî dev ji van lotikên xwe yên genî berdin. Hûn jî zanin ku hûn dereng mane paşam... 

25/06/09

Qeşmera TRT 6 ê Niştîkê!

Gulfiroşên TRT 6 ê xebero bi Lotikxanê re hespê xwe dibezînin! Wey li min ev jî ji ku derket lawo!? Gotina me ji camêrê stranbêj Mêrdîniyo re tune ye. Lê hevala wî ya pêşkeşvan Nîştîkê bi henek û tinazên xwe keviran bi serê me de dibarîne.

Niştiya ku zorê dide xwe da ku bibe stêreke Kurd lixwe eşkere dike ku tenê heta dehan dikare bi Kurdî bijimêre û dema li ser kaxezê peyamên temaşevanan dixwîne, navê ku li ber wê nivîsandîne jî ji bîr dike.

Werhasil qeşmeroka TRT 6 ê Nîştî henekan dike û bi wî devê xweyî çiloxwarî bixwe jî nikare bi wan bikene. Lê dîsa jî ew dev jixwe bernade û dide navê. Her cara ku devê xwe vedike dixwaze herkes pê bikene û li ser piştê bikeve. Em weke navenda lotikan radigihînin ku ji xeynî Lotikxanê tu kes nikare xelkê me zikopişto bike. Yên ku xwe biceribînin wê poşman bibin.

Waaa Niştîkê! Guh bide me û dengê lotikên camêrên Lotikxanê bibe xwe û dev ji xwe û wan henekên xwe berde! Herî dawî jî em ji te re dibêjin were ji dibistana seretayî ve qeydiya xwe li Lotikxanê çê bike û him hînî Kurdî bibe him fêrî ken û henekên li mitbexa Lotikxanê dipijin bibe... !!!

11.06.09

Kî dîne kî dîne hêy!

Evqas cejn û rojên taybet ên pîrozkirinê ne bes bûn niha jî Roja Dînên Cîhanê derkete pêşiya me. Bê henek ev cejn jî weke yên din bi cur be cur çalakiyan tê pîrozkirin. Di çalakiyên pîrozbahiyê de, dînan gotiye ku ewê partiyekê ava bikin û bi izna xwedê desthilatiya welêt jî bi dest bixin!

Me jî digot yên ku dîn bin ji wan re her roj kêf û şahî ye. Lê mixabin ne wisa ye. Roja pîrozkirinê ya dînan jî heye û ew 12 mehan sebr dikin da ku vê roja xwe pîroz bikin.

Em nû pê hesiyan ku 7 ê meha Hezîranê Roja Dînên Cîhanê ye û ev roj jî bi çalakiyên jidil û can tê pîrozkirin. Komek dîn rabûn lotikan û li Çanakkaleya Tirkiyeyê bi jimareke 75 kesî gihane hev.  Dînên me bi otebosan derketin ser çiyê û him seyrana xwe kirin him jî Roja Dînan bi çalakiyên xwe yên taybet pîrozkirin. Komika dînan herwiha bi hinceta pîrozkirina vê rojê serokê xwe jî hilbijart û bi dîmenên balkêş pîrozbahiyên xwe bi dawî anîn.

Piştî hilbijartinan serokê Komeleya Dînan ê nû ku, bi hemû qulikên laşê xwe dikare cixarê bikişîne û gelek cure teqle û lotikan dikare bavêje axaftinek kiriye û gotiye; ‘Ji bo ku em dengê xwe bigihînin hemû dinyayê emê partiyekê ava bikin û deshilatiya welat bidest bixin’.

08/06/09

Ava dîn guvaştin!

Dîn guvaştin pere jê derxistin. Gelî lotikvano ev bûyer raste û weke her car dîsa ne ecêbe ku li welatê Tirkiyeyê pêk hatiye. Ango gotina dîn û îman bûye pere tam jî li vê tê.

Li Stenbolê Tirkekî serê xwe wisa şixulandiye ku herkes lê heyirî dîmîne.. Diziya avê kir, ji bo neyê fêmkirin xaniyekî qaçax ava kir û şiklê camiyê da vê tesîsa xwe ku mela jî 5 wextan li wir azan da! Û herwiha camêr bi salan ev mizgefta sexte şixulandiye û ligel ku tu kesî neçûye li vê mizgefta sexte nimêj nekiriye jî ji aliyê tu kesê derdorê ve  ne hatiye fêm kirin...

Li gorî agahiyên çapemenî dide bûyer wiha qewimîye. Karsazekî xwedêgiravî jîrik û fêlbaz pêşî ji bo ku kaçaxçîtiya ava vexwarinê bike li ser kaniya avê xanî çêkiriye, ji bo ev neyê fêmkirin minareyek jî li ber xanî rakiriye û herî dawî jî melayek anîye ku rojê 5 caran jî li ser minarê azan daye!

Ev bûyer li Beylikduziya Stenbolê qewimîye û piştî ku 5 sal di ser re derbas bûne hê nû derketiye holê. Xebero dibêjin ligel ku mela her roj 5 wext azan daye dîsa jî heta 5 salan tu kes bi vê ecêba kesnedîtî ne hesiyaye..

Melayê vê mizgeftê jî piştî sextekarî derketiye holê xwe ji vê bûyerê şûştiye û gotiye; Bi sê telaqên jinberdanê min hay ji bayê felekê tunebû.Min ji bo îmanê muezintî kiriye. Lê helbet tu kes ne dihat nimêjê! Lê min jî digot qey mumînên îslamê yên vê derê rêya mizgeftê dernaxin! Lê dîsa jî tiştek nabe babam, ez têra xwe hebûm û min bi tena serê xwe cemaeta xwe dikir. Ji aliyekî av diherike di bin me re û diçe nav tankêran li aliyekî jî azan û nimêj. Ma mislimantiya ji vê baştir û îbadeta ji vê kamiltir heye...!!!

24.04.09

TİRŞİKA ŞAREDAR!

Serokê Şaredariya navçeya Batmanê Kercosê Esat Öner, dîsa bi ser ket û bû şaredar. Öner, serfiraziya xwe jî bi Tirşikê pîroz kir! Wey hezar carî pîroz û bimbarek be! Lê ew herçiqas dibêje feodalî hilweşiyaye jî, bawer nekin û hûn tirşika xwe bixwin!

5 hezar Kercosiyên ku miriyê tirşikê ne tevî goştê kelandî, savar û şêraniyê zikê xwe nepixandin. Herwiha dibêjin şaredarê me bi minasebeta dayîna tirşikê û mewlûdê axaftinek kiriye û tirr ji axa û feodaliyê berdaye. Şaredar gotiye;  “Êdî zihniyeta feodaliyê li navçeya me hilweşiya ye” filan û fîstan. Ango gotiye feodalî têk çûye û wî jî şaredarî bidest xistiye.

Em jî weke lotikxane bi germî tevlî vê gotinê dibin û dibêjin:"Ma  ev pîrozbahiya şaredariyê bixwe jî, ne nîşaneya feodaliyê ye? Keko ma tu nizanî tirşik û goşt her tim ji aliyê axayan ve dihate dayîn û hê jî ev wisa ye babam?"

Ji Batman Çagdaş hatiye girtin

Lê şaredarê me yî modern dibêje; xwelî li serê feodaliyê be! Ma ev tirşika te da çi ye keko! Em nabêjin xwelî li serê feodaliyê be, lê em dibêjin heçê tirşikê nexwe xwelî li serê wî be!

Herçiqas şaredarê me feodaliyê lixwe daneyne jî, em jê re dibêjin were ser dînê xwe. Qerewat û çakêtê xwe bavêje aliyekî û car din li ser xwe bifikire.

Şaredarî li te û xelkê Kercosê pîroz û bimbarek be axacan!

           03/04/09-

       Lastîkên Newrozê 25 lîre!

Êdî cejna Newrozê jî weke cejnên Remezan û Qurbanê bû barek li ser pişta malbatên ku debara xwe bi gelek zor û zehmetî dikin. Ev bêkarî û qeyrana aborî ne bes bû cejna Newrozê jî rastî van rojên xedar hat. Xebero li Batmanê buhayê lastîkek kevnare bûye 25 lîre. Her ku Newroz nêzîk dibe jî ev bûha mîna dolar zêde dibe!

Êdî bifikirin Newroza ku me bi çi zor û zehmetî pîroz dikir, niha hê jî li me zortir bûye. Êdî gelê Kurd ji pîrozkirina Newrozê bêhtir ketiye mitaleya lêçûyînên cejnê. Li cejna Qurbanê şekir, cil, xwarin û goşt lêçûyînên sereke ne. Cejna Remezanê jî wisa. Lê cejna Newrozê ne wisa ye yaboo!

Digel hemû lêçûyînên din, di vê cejnê de agirek tê pêxistin ku hewceye venemire. Ji bo harkirina vî agirî ne komira dewletê ne jî êzing têrî dikin. Hewaya me têra xwe bi komirê qirêjî dibû lê bila agirê lastîkên Newrozê jî qurbana hewayê be looo! Bi kurtasî em çî bibêjin jî vala ye, êdî haşa bûye weke ayet ku Newroz bê lastîk nayê pîrozkirin! Bê pîrozkirin jî ew pîrozbahî qels û lawaz e!

Ku lastîk jî buhayê wan weke dolar bilind bûbe û her ku Newroz nêzik dibe bilindtir bibe emê çi bikin. Li gorî nûçeya rojnameya Batman Çağdaşê buhayê lastîkan bûye du sê qatên kîloya goşt. Û vê jî deyne aliyekî, heba lastêkeke destê didûyan ya erebeyeke biçûk bûye 25 lîre. Hûn agirê ku di cejna Newrozê  tê pêxistin deynin ber çavê xwe û li lêçûyina giran a cejna netewî bifikirin.

Li gor agahiyên rojname dide me, di Newrozê de tenê li Batmanê salê dora 10 hezar lastîkî tê şewitandin. Îsal ji ber ku tu qedexe li ber cejnê tune ne tê hêvîkirin ku hejmara lastîkan hê jî zêde bibe. Lê qeyrana aborî di nûçeyê de ne hatiye hisabkirin! Her wiha tê gotin ku esnafên sanayiya Batmanê ji bo ku lastîkên wan neyên dizîn, hemû lastîkên xwe beriya Newrozê bi tomarî firotine.

17/03/09-Stenbol-

Pêgermokên TRT 6 ê!

Weke lotikxane me hin agahiyên gelekî girîng bidest xistin. Kurdên me yên ku li hawîrdorê dinyayê belawela dijîn xebero li ber deriyê avahiya navenda TRT’ê ya Enqereyê bi tesadufeke ku di 40 milyonî de carekê pêk tê rastî hev tên. Wey li vê ecêbê!

Me emrê xwe pîr kir lê heta em dû kes dihatin cem hev, di sed kolan û bajaran de em lihev difetîlin. Xwedê jê razî be serokwezîrê Tirkiyeyê her çiqas li derveyî qanûna deshilatdariya xwe tevgeriyabe jî bi vekirina televizyona Kurdî me tîne cem hev! Mala wî hezar carî ava be! Û em bi vê gelekî şanaz û kêfxweş dibin ku ew sîmayên nav me yên hatine jibîrkirin ji nû ve werin bîra me. Xwedê xêra serok û wezîrên me qebûl bike û wan bi bihûşta xwe xelat bike! Bawerim niha hûn xwendevanên Lotikxanê yên hêja di dilê xwe de bilêv dikin û bi tîpên mezin dibêjin AMÎNNN!

Cihê ku me ev agahiyên taybet ji bo Lotikxanê bi dest xistine gelekî veşarî û bidizî ye. Lewma weke nûçegehan em çavkaniya xwe veşarî dihêlin. Bila kes nebêje ji filan an jî bêvan malperê ev agahî hatine girtin. Lewre rûmeta lotikvanan jî heye! Vê gotina min jî qet ji bîr nekin û bikin guhar ji xwe re.

Êdî em hinekî werin li ser mesela agahiyên xwe.

Belê weke hûn hemû jî pê dizanin ev qederê 15 salan e weşana Kurdî bi televizyonên curbecur dest pê kiriye. Û ev weşan jî her çiqas dibin sîya hin nêrîn û rexistinan de bin jî xizmeteke mezin bi taybetî ji bo zimanê Kurdî kirine. Lê heta niha jî gelek derdor û kesayetiyên Kurdîhez û xêrxwaz pir hindik an jî qet di weşanan de li gorî dilê xwe cih ne girtine. Lê piştî weşana TRT 6 ê ev rewş gelekî guherî. Ango wisa xuya dike. Digel ku heta niha çend kesayetiyên di civata Kurdan de navdar in bêbiryar bimînin jî bi qasî deh qatên wan li gorî agahiyên me bi dest xistine li dora avahiya TRT yê ya Enqereyê pêgermokan dikin.

Deshilatdariya dewletê wisa bi wan şêrîn hatiye ku, helbet ev şêrîniyeke duygusal e!, li ber deriyê avahiyê kon vekirine. Heta tê gotin ku hêzên taybet ên ewlekariya TRT ê gelekê wan ji ber derî qewirandine jî. Lê wan jî gotiye ‘demokrasilerde çare tukenmez’ û ji xwe re hin rêyên din dîtîne. Bi qasî em pê hay bûne yek ji van rêyan jî ew e ku, hin Kurdîhêzên me bi şibakeyên ofîsên midurên TRT ê ve hêlekan çêkirine û heta êvarî li ber şibakê vir de wê de xwe dihejînin!

Dîsa li gor agahiyên ku me bi dest xistine midûr û rayedarên TRT ê li zêdebûna Kurdîhêzan şaş mane! Her wisa derî û şibakên xwe bi mifteyên qewîn girê dane ku kes  nikaribe bikeve hûndir û bibe bela serê wan. Dîsa li gor hin agahiyên ku me bidest xistine, heta hilbijartina şaredariyan bi selametî derbas nebe wê deriyên xwe ji tu kesî re venekin!!!

10/03/09-

Kurdîname û Serfermandarî 

Kurdê me bi mebesta ku zimanê me xwe biparêzin ango hebûna zimanê Kurdî bi rayedar û payebilindên dewletê weke fermî bidin qebûlkirin xwe dixin curbecur şiklan. Ji bo cejna qurbanê kurtenameyên pîrozbahiya cejnê bi Kurdî hatine amadekirin. Ev kurtenameyên ku bi Kurdî hatine nivîsin jî bi armanca ku ji bo sazî, rêxistin, partî û parlementeran re bêne şandin hatine amadekirin.

Em jî weke Kurdên ku xwe bi zamanê xwe şanaz û serbilind dihesibînin bi biryar û kiryarên wiha gelekî kêfxweş dibin. Lê ne bi vê ecêbê!

Tiştê ecêb çiye gelî lotikvano! Bi destûra we ji were vebêjim. Ev kurtename Partiya Nijadperest jî tê de ji Serfermandariya Tirkiyeyê re jî têne şandin. Ez qet naxwazim ku hûn min şaş fahm bikin. Ji ber kû ez ne dijberê şandina van namêyên bi Kurdî yên pîrozbahiyê me. Ez wekî her mirovekî misilman dixwazim cejn di nav aştî û biratiyê de werin pîrozkirin.

Ev kurtenameyên pîrozbahiyê ji hêla parlamenterên Kurd Hasip Kaplan û Sevahir Bayindir ve ji Serokomarê Tirkiyeyê Abdullah Gul, Serfermandar Ilker Başbug, Serokê CHP'ê Deniz Baykal, Serokê MHP'ê Devlet Bahçeli û gelek rayedarên tirk re bi Kurdî hatine şandin.

Di vir de nakokî û gelemşeyek heye ku ji van derdorên name ji wan re hatiye şandin de, Serfermandarî heye û ew jî heta roja erefê jî bi balafiran bombeya bi ser çiyayên Kurdan de dibarîne. De were ne biece û weke şêtan bi çolan nekeve!

Ev jî ne bes e di nameyê de, “Em cejna we ya qurbanê û sersala we pîroz dikin, di xebatên we de serkeftinê hêvî dikin.” tê gotin. Me xebatên hemû derdorên din fahm kir, lê em tê ne gihiştin bê xebatên çalak ên Serfermandariyê çi ne?!

Ji ber ku ev der lotikxaneye hûnê ji min bawer jî nekin. Lê dîsa jî dibêjim bêhenek we hemûyan fahm kir ev xebat çi ne ne wilo? Bombebaran û ruxandina çiya, gund û geliyê Kurdistan! Ma ev xebat ne hêjayî serkeftinê ne!

Ez ji Kurdan sebr û semaxê dixawazim. Cejna pezgurînê bi hêviya ku her roja we bi xwarina goştê sor derbas bibe pîroz dikim

07/12/08

Kevokim lê lê…

21/10/08-

Li îranê du kevok bi mebesta ku sîxuriyê li tesîsên atomî dikin hatin girtin. Ji van kevokan re cezayekî giran tê fikirîn! Em wekî lotikxane bi her hewayî pişgiriyê didin van kevokên ku niha li heps û zindanên îranê ne. Wekî têbinî em ji we xwendevanên delal ên lotikxanê re radgihînin ku, ev kevok ketine greva birçîbûnê û ji zindana îranê dengê strana; Kevokim lê lê kevoka sîxurim way way… bilind dibe!

Li gor çavkaniya Rojnameya Îranî Îtimadî Millî hatiye ragihandin ku, li Îranê nêzî tesîsên atomî du kevokên sîxur ango casûs hatine girtin. Hêzên ewlekariyê yên Îranê ev kevokên sîxur xistina bin kontrola xwe û tê hêvîkirin ku, cezayekî giran bidin wan. Sedema sûcdarkirina van kevokan jî ewe ku xelekên metal û kabloyên ku li stuyê wan hatine pêçandin e.

Herkes meraq dike bê dê ev kevok bi çi cezayê werin tewanbarkirin. Li ser bextê lotikxanê be hatiye ragihandin ku ev kevokên bi sîxurtiyê têne tawanbarkirin li zindanên îranê ketine gereva birçîbûnê û vê strana li jêr distrin.

Gelî lotikvano ev stran beriya van kevokên sîxur ji hêla stranbêjê Kurd ê nemir Hesen Cizrewî ve hatiye şîrovekirin.  Xuyaye van kevokên belengaz ên dibe ku bi eslê xwe jî Kurdbin stran jixwe re guherandine! Em jî ji were dibêjin kerem kin gotinên vê stranê. Lê  dema hûn bixwazin vê stranê bi serê xwe bistrin jî ji kerema xwe re pêşî guh bidin melodiya stranê û dengê Hesen Cizrewî.

Ez kevokim lê lê kevoka sîxur im way way

Li ser bana bin bana, li zêviyê persiyan ez hew diçêrim way way

Ez aşiqê lê lê keçka atomî me xwedêyo

kevokim lê lê lê lê lim lê lê

lê lim lê lê lê lim lê lê lê lim lê lê

lê lê lê lê lê lê kevoka sîxurim way way

Li ser banê atomgehê, van segbavên persiyan ez girtime xwedêyo

Çi xelekên metalî xistin stuyê min nizanim

Ji destê van zaliman hew difirim way way

kevokim lê lê lê lê lim lê lê

lê lim lê lê lê lim lê lê lê lim lê lê

lê lê lê lê lê lê kevoka sîxurim way way

Mandelîna Nêr!

12/10/08-

Ev ne zarokeke ku berî niha bi çend rojan ji dayîk bûye. Tibbê jî li ser vê mêweyê ji milyonan carek peyda dibe ne gotiye! Gelo ev mêweya ku bi her şiklê xwe diyare nêr e, çi mesajê dide?

Li vê ecêbê binêrin, di vê mêweya tamxweş ku dema navê wê jî em dibihîzin av bi devê me dikeve tiştekî bala we bikişîne heye an na! Em gelek caran dibihîzin ku, pepikên du serî, duzayend, seqet û hwd. Ji dayik dibin. Lê heta niha me ne bihîstibû û nedîtibû ku mêwe û zebze bi şiklê zayêndiya însanan digihin.

Ev mandelîna nêr di nav selika bazarê de derketiye û heta niha jî nehatiye diyarkirin ku li kîjan herêmê gihaye. Lê dîsa jî bi piste pist tê gotin ku ev mêwe li herêma Behra Spî ya Tirkiyê di nav serayeke têr hormon de gihaye û hatiye heta sifreya me!

Dîsa senaryoyeke din heye ku, tê gotin; ev mandelîna piştî Tirkiye destûr da keştiyên leşkerî yên Emerîka û di behra wê re derbasî Gurcistan bûn Rusyayê îtxalata narenciyên Tirkî daye sekinandin û hemû mêweyên nêr ji derî vegerandiye! Em jî di vê baweriyê dene ku ev mandelina nêr wiha gihaye ber destê me…!

AIDS û Azadî

 11/09/08-

Eşkere bû ku li Kurdistana azad ango Başûr her tişt ne azad e! Sînorên azadiyê heta cihekî kakacan! Ji xwe ku li we nexweşiya AIDS’ê peyda bûbe dev ji hewandina nava welêt berdin girtîgeh jî ji we re heram e! Rayedarên herêma Kurdistan ji mêvanên welatê xwe re bi zimanekî zelal û delal dibêjin; ‘Ma we ji me pirsî û hûn bi AIDS’ê ketin. Hela hela! Qey dijmin we bi ser me de şandiye, da ku vê nexweşiya xedar li welatiyên me jî belav bikin. Kiş kiş vegerin çavê me we nebîne!’

Dema hûn bi nexweşiya xedar a AIDS’ê bikevin zanibin ku, Kurdistan ji bo we ne ewle ye. Rayedarên peytexta Herêma Federe ya Kurdistan Hewlerê bi daxuyaniyeke rojnamevanî dane eşkerekirin ku di salên çûyî de gelek kesên hatine serdena herêmê û xwestine mafê rûniştinê bistînin ji ber peydabûna nexweşiya AIDS’ê paş ve hatine vegerandin. Sedem jî li ber girtina pêxveçûna vê nexweşiya xedar hatiye nîşandan. Weke tê zanîn ev nexweşî bi piranî ji têkiliya cinsî peyda dibe li mirovan. Lê nayê wê wateyê ku tenê bi vî şikli ev nexweşî li mirovan dihesile. Her wiha hatiye tesbîtkrin ku bi gelek cureyên tibbî jî ev nexweşî li mirovan belav dibe.Mijara me ji vê nexweşiya kambax wêdetir azadiya mafê mirovan e.

Daxwazeke me heye ji nexweşên AIDS’ê re. Berî her tiştî xwedê we bi selametî bike ku hûn jî vê nexweşiyê bifilitin. Dîsa jî haya xwe jê bikin û her deverên Cîhanê ji xwe re weke cihên bi ewle û turîstîk nebînin. Her wiha qet tengî welatên ku hêja tama deshilatî û azadiyê nû standine  nedin! Gelî AIDS’îno car din nekevin vê xeletiyê û neçin serdana Kurdistanê! Em ji we re ya xwe dibêjin. Wele tiştê nedîtî were serê we ne bêjin ne gotine…

-----------------------------------

Tirba sosyetîk, Bardakçı Baba!

23/08/08-s

Li vî welatî hin tişt diqewimin ku, mirov li wan ecêbmayî dimîne. Tirba Bardakçı Baba ku bi henekekê hatiye avakirin, li ber plazayeke ku li Stenbola Tirkiyeyê nû tê avakirin bûye cihê bawermendên sosyetîk! Piştî ku ev rezdance û  plazaya ku dewlemendên Tirkiyeyê lê rûnin bi qede, di şibakeyên xwe de wê  li Bardakçı Baba binêrin û diayan bikin! De werin li vê ecêbê binêrin û ji îmanê dernekevin!

Çawa bû Bardakçı Baba

Şagirtekî zankoya diransazî, berî niha 35 salan li Fulya’ya Stenbolê kêlikek li erdê çikand û bi henekî li ser jî Bardakçı Baba nivîsî. Ew kêlik niha li ber siya plazayeke 35 milyon dolarî bûye Tirbeke miqedes! De werin li vê ecêbê binêrin.

 Lê şaş nemînin ku, ev mezelê derewîn ê li gor şiklê plazayê ji nûve hatiye çêkirin sibe bibe  cihê xweefûkirin û diayên sosyeteya Tirkiyeyê! De bifikirin bê li vî welatî baweriya olî ketiye çi halî!

Li ser vê baweriya sextekarî divê em li xwe mikur werin û kêfa xwe bînin. Piştî van eletewşiyan,  divê em jî zêdetir bi nirx û baweriyên xwe yên hêja serbilind bibin. Bêhna şeytanî û reklamê ji tirba Bardakçı Baba were jî hêjayî gotinê ye ku em weke wan bi kevir û kêlikên çikayî erdê li manewiyatê nagerin!  

   Baweşênka Ehmedînejad!

17/08/08-

Serokdewletê Îranê Ehmedînejad, li Tirkiyeyê rastî eleqeyeke wisa mezin hat ku berî niha di serdana serokê Emerîkayê Bush’de jî ev eleqe nehatibû nîşandan. Ehemedînejad xwe kêm nekir û ev eleqe bi baweşênkeke bayê nermik jê anî bersivand!

Gelo çima ev eleqe? Ji ber ku ev herdû serok him dijberên hev in him jî yek gawur e yek jî qaşo mucahîd e! Her wiha ev serdan ew qas bi nav û deng bû ku wê di dîroka Tirk û Persiyan de bibe xwedî cihekî taybet. Herdu serokên dewletên bi dijminatiya gelê Kurd jî têne naskirin mezheb jî ji holê rakirin û di mizgeftê de ligel hev rabûn secdê!

 Gelê tirk ku ev eleqe ji bavê xwe Bush re nîşan nedabû li ser mucahîdiya Ehmedînejad rabû ser piyan û ew bi dilgermî pêşwazî kir. Ehmedînejad jî bersiva vê eleqeya germ pêşî li mizgefta Sultanahmetê bi baweşênka ku l i cemeatê kir da! Ev bersiva serokê eceman jî dîsa bi bersiveke din hate dayîn û bi tekbîran wekî haşa pêxemberekî ew hate pêşwazîkirin.

Serokê rihqirêj jî çawa ku dibîne mirovên ker û kor li hember disekinin; qaşo bi dilnizmî gotin ser gotinan verîşiya û piştî baweşênka mizgeftê wiha got: ‘Beriya her tiştî ji bo tengasiya ku biboneya êrîşên siyonîst pêk neyên bi we hatiye kişandin, ez ji we lêborîna xwe dixwazim. Lê ji bîr nekin! Vê jî zanibin! Ev ji ummeta me re nabin gelemşe! Nimejkirina min a li mizgefta suniyan wekî şiî helwesteke pir mezinî siyasî ye!’

Piştî vê gotinê tirkên ker û ji xwe ne hewceye em bêjin bi qasî wan jî Kurdê ker ku xwe bi korîtî bi polîtîkayên oldariyê ve girêdane tiliyên xwe yên şehadetê rakirin û bejna xwe tewandin ji qatilê Dr. Qasimlo Ehmedînejad re.

Gotina dawî Ehmedînejad her çiqas Ataturkê tirkan bi çikê xwe hisab nekiribe jî bi gotinên xwe weke tîr di dilê miletê tirk ê olperest de çikand. Û bi vê serdanê xwest ku xwe bixe ser hemû seneman.  Bi baweşênka li mizgeftê li ser mêjiyê tirkan jî baweşênk kir û bi bayekî nermik derbas bû çû!

Ji Serok Berzanî çend lotikên dîplomatîk

Senger Îloz-23/06/08-Stenbol-Serokê Herêma Kurdistanê Mesûd Berzanî di gera xwe ya Ewrûpayê de li gor agahiyên me ji destê sisiyan bidestxistine çend lotikên dîplomatîk avêtine. Xal bi xal em van lotikan ji we xwendevanê jar û belangaz re şîrove bikin. Berî her tiştî em van babetê ku bêhna lotikên dîplomatîk ji wan tê em rêz bikin: 1- Dîmokrasî û aramî 2- Terora Cîhanî 3- Berjewendiyên Bazirganî 4- Parastina Welatên Cîran 5- Pirsa Gelê Kurd û PKK’ê

Serok Berzanî çawa gihîştiye welatên Ewrûpî bi dilnizmiyeke mezin derketiye pêşberî rayederên wan welatan û xuyaye dilê tu kesî jixwe nehiştiye. Lê ev nayê maneya ku tiştê dilê xwe negotiye! Her çiqas metirsî û wêrekiya gelê Kurd bi serê şujinê ji wan re nîşan daye jî nexwestiye pêwendiyên xwe bi tu kesî re bicemidîne. Tecrubeyên xwe yên dîplomatîk bi vê gerê re aniye asteke bilindtir û wisa xuya dibe ku ji niha û şûnde emê Serok Berzanî bi lotikên nermik û germik bişopînin.

Êdî em jî piştî van gotinên ravekirinê bêjin bes e û ji kerema we re dest bi kitekitên van pênc lotikên dîplomatîk bikin. Ango bi çavê jar û belengazî raxin ber çavan.

Bijî Dîmokrasî

1-    Dîmokrasî û Aramî:

Serok Berzani bi vê babetê dixwaze ji cîhanê re bibêje vaye em jî gotinên we yên wekî hûn mîna perestgehan diparêzin ji xwe re pîvan dibînin. Bi me bawer bin em sîstema xwe li gor hîmên we ava dikin û birêve dibin. Bijî Dîmokrasî!!

2-   Terora Cîhanî:

Serok Berzanî bi rizgarbûna Eraqê ya ji Seddam û vir ve, bi mînaka terora navxweyî  dixwaze ji welatên mezin re bibêje; ma em li hember terorê birayê hevî ji dê û bavekî ne! De werin kekê min, me ji vê fitne û fesadiyê rizgar bikin! Lewra em jî bi qasî we dijberê hemû terora cîhanî ne û naxwazin li tu deveran aramî bê binpêkirin. Herweha teror jixwe li dijî pîvanên hevpeymanên mirovatiyê ye canekem!

Zebeş e dendik reş e, lê…

3-   Berjewendiyên Bazirganî:

Em hatin ser babeta herî girîng ku nan û avê gelê herêmê li ser vê lotikê ye. Ev lotikek dîplomatîk a wisa xurt e ku em dikarin bibêjin Serok Berzanî ev geşta xwe ya Ewrûpayê li ser hîmê vê lotikê avakiriye! Şîroveyên herî hêsa û zehmet di vê lotikê de dihewin. Gelo çima ez wisa dibêjim ma hûn zanin? ‘Zebeş e dendik reş e, lê mixabin her car ne gozel e!Di vê mirov pêşî zebeş bitepîne bişkîne û li navê binêre ma ne wilo kaka! Çimkî carnan kal û kawî derdikeve!’ Piştperdeya vê lotika dîplomatîk di vê gotinê de veşartiye gelî xwendevanên jar û belengaz.

Bê belge êrîşkirin eyb û şerm e cîran!

4-   Parastina Welatên Cîran:

Hin tiştên ayan û beyan hene ku hûn ji mirovên kuçeyan bipirsin bersiva rastîn karin bi hêsayî bistînin. Ev jî ew meseleye! Li gor hevpeyvîne digel weşaneke Ewropî Serok Berzanî ji bo kêfxweşkirina welatê cîran Îranê lotikek xweş avêtiye û ne xwestiye xemgîniyeke bêdil derkeve holê! Pirs ev e; gelo îran ji bo êrîşên çiya û herêma Kurdistanê bi Tirkiyê re hevkar e an na? Weylo! Ma ev çi pirse kekê mino dibêje Serok Berzanî û didomîne: “Beriya her tiştî em ji tu kesî natirsin. Piştî her tiştî jî kekê mino hêja belgeyek wisa ne gihiştiye ber destê me!” Wele tu ji kuçê bipirsî dê bêjin: Weyla li min hêja, doh bû me bi çavê xwe dît hatin ser me bombebarankirin û çûn. Ma piştî êrîşan belgeya ku va ye me êrîş anî ser we pê zanibin heye!

Piştî van gotinan Serok Berzanî niha jixwe re gotiye we dît min çi lotik avêt cîranê xwe ha! Min ji hemû cîhanê re eşkere kir ku em ji tu kesî natirsin. Lê wekî hûn zanin cîrantî jî lazim e. Xwedê îqtîdara Kurdan berz bike rebbî!!!

5-    Pirsa Gelê Kurd û PKK’ê:

Di vê babetê de wisa xuya ye ku Serok Berzanî asta xwe ya Lotikên Diplomatîk bilinditir kiriye. Pêşî xwestiye bi gelemperî dilê gelê Kurd germ û nerm bike û paşê jî bi peyamek nermik û germik ji PKK’ê re xweş kiriye. Hem ji cîran re rê nîşan daye û hem jî nexwestiye ku nîfaq têkeve navbera Kurdên bakur û başûr. Li gor agahiyên destê çaremîn wiha gotiye: Birêzekan hûn her daîm peyamên gotûbêjkirinê ji xwe kêm nehêlin. Hema we dît ku cîran li we û me hate rehmê û em ji xezeba dijminê bêbav rizgar bibin! Ma ne wilo ye canekem…!

Neyse, zimanê dîplomasîyê zimanekî xweş e, hunerek e û herkes nikare vê hunerê birêse. Hêvî ev e ku temamê siyasetmedarên Kurd di qada navnetewî de li berjewendîyên gelê Kurd xwedî derkevin û dijinatîya hevdu nekin.

  --------------

Li Heskîfê mîza Tarkan nehat!

Senger Îloz-17/05/08-Stenbol / Ma pozê kesî naşewite! Kurdno, demokratno, hunermendno, xwezaparêzno, xwedî meqam û meaşno, siyasetmedarên nav meclîsê ku bi raya gelê herêmê bêrikê xwe dane ber diravên îhaleyên dewletê bibihîzin vaye Tarkan gazî we dike! Xwedî li dîrok û derdora xwe derkevin! 

Tarkan wê ji Heskîfê re bistrê

Hunermendê Tirkiye yê di qada navnetewî de herî nav daye Tarkan, ji bo ku Heskîf tevî dîrok û xweşikahiya xwe dibin avê de nemîne berê xwe da Heskîfê û li wir konserek jî daye. Her bijî Tarkan siheta te xweş be! Dîsa hejayî gotinê ye ku Tarkan mizgînî da ku, wê demek nêz de, strana li ser Heskîfê çêkiriye jî derxe pêşberî guhdarvanên xwe. Tarkanê ku ji bo vekirina ‘Komelaya Xwezayê’ tevî komek xweza û dîrokparêz çûye Heskîfê bi kêf û şahî hatiye pêşwazîkirin. Lê rebeno çi bike dîsa rastî çapemeniya ku li dû şopa doxina wî ne hatiye. Xebero li Heskîfê dema Tarkan li cih û warên dîrokî digeriya hinek rojnameger ji bo wêneyên jihevxweşiktir bikişînin pevçûne û Tarkan heta bi zor wan jihev veqetandiye.

Li Heskîfê mîza Tarkan nehat!

Tarkan li Heskîfê qet bêhnteng nebûye û li gorî agahiyên me bidestxistine negotiye ‘miza min tê’ an jî ‘kıl oldum abî’ (peyveke aciziyê ye). Me ji vê geşta Tarkan derxist ku ew ne mirovekî bêdeb e! Her wiha mirovekî xwedî ehlaqekî baş e jî. Em jî Tarkan pîroz dikin û dibêjin mala te ava. Xwedê ji te razî be. Te hunermendî û hişmendiya xwe ya ji bo mirovatiyê raxistiye ber çavên çavekorî bûne!

Kerem kin Tirkizano!

Beşek ji axaftina Tarkan a li Heskîfê wiha ye:

'Bugün, dünyanın dört bir köşesinden, doğanın her bir zerresinden yükselen çağrının ete kemiğe büründüğü Hasankeyf'e dokunuyoruz. Doğanın ihtişamına ve tarihin sesine aynı anda tanıklık ediyoruz. Bu eşsiz coğrafyada, kuşlar, bitkiler, Fırat kaplumbağası, kayalar ve Dicle Vadisi'nin insanları bizi ve değişen dünyayı izliyor. Tarihe nasıl bir iz bırakacağımızı merak ediyor. Doğa Derneği, Hasankeyf Ofisini açarak tercihini doğanın ve uygarlığın yaşamasından yana kullanıyor. Köşklerimize duyduğumuz sadakat ve vicdanımız, bizi Ilısu Barajı'nın sessiz bir şahidi olmanın ötesine geçerek Hasankeyf ve Dicle'nin yaşaması için çalışmaya zorluyor. Dünyanın her yanında barajların getirdiği zararların sayısız örnekleri var. Barajlar, daha iyi bir yaşam ve iş imkanı vaat ederken, geride bıraktıkları ise tahribat, çoraklaşma, göç ve ölüm. Sadece onlarca yıl ömür biçilen Ilısu Baraj Projesi'nin sunduğu gelecek çok açık; binlerce yıllık tarihin ve benzersiz doğal alanların yok olması. Projeye destek veren yabancı kuruluşlar, sonucunda doğal ve tarihi değerlerin yok olacağı böyle bir projeyi uygulamayı kendi ülkelerinde hayal bile edemezler.'

Şahiya Newroza Kurda xwîsî di gewriya xêrnexwazan de hişt

Senger İloz-21/03/08- Stenbol/ Îsal cejna Newrozê bi yekîtî û şahiyên berztirîn li her deverê Kurdistanê hate pîrozkirin û pîrozbahî hîna berdewam in. Xêrnexwazên Kurdan di nûçe û hewldanên xwe de heta ji wan tê dixwazin li nav Kurdên bela welayî cîhanê bûne cudaxwaziyê bikin. Em Kurd bi riya Lotikxanê radigihînin ku beriya destpêka biharên xêrnexwazan Newroz hasil bûye kekê mino! Hûn xwe biçirînin jî Newroz Cejna Kurda ya netewî ye û hew…

Ji doh ve di medyaya Tirkiyê de bi mahneya ku Newroz cûda tê pîrozkirin, pîrozbahiyên Başûrê Kurdistanê têne nîşandan. Ew  ji bo ku li Kurdistana Tirkiyê pêşiya rexneyên ji desthilatdariyê re, di Newrozê de têne kirin bigirin dikin.

Em dibêjîn xwe ne xapînin cewrikên Ergenekonê! Hûn biçirin jî hûnê nikaribin pêşiya pîrozbahiyên cejna netewî ya Kurdan bigirin û maneya vê rojê ya serhildan û rizgariyê jî hûnê nikaribin pûç bikin. Ev cejn tenê ji bo Kurdan ev qasî bi qedr û qîmet e. Ne cejna tirkaye bavêmino êdî xwe bes bixapînin. De herin 23 Nisana xwe pîroz bikin ma ne zêdeyî serê we ye! Binerin vaye GOOGLE  jî roja Newrozê bi kulîlkên kes û sor û zer pîroz dike û Nevruz nabêje, dibêje Newroz Newroz!

Teyyibo tu jî hew xwe bixapîne lawo! Bi tirs û xapan tevnegere! Me ji dîn û îmanê dernexîne! Pîrozkirina te ya Newrozê em ne qebul in. Tu çiqas bixwazî Newroza me tenê bi destpêka biharê ve girêbidî jî ji bîr neke ku NEWROZA me ji hemû biharên dinyayê mezintir û pîroztir e..!

Em Kurd bi riya Lotikxanê radigihînin ku beriya destpêka biharên xêrnexwazan Newroz hasil bûye û hew...

Beranê Giravê poşek li Teyyib û Gul da!

Senger Îloz – 16/03/2008-Stenbol- Beranê Giravê bang, li serokwezîr û serokomarê Tirkiyê Teyyib û Gul kir ku berî biharê werin îmanê! Beranê me Kurdan got ku bila bi pakêtên diyariyên xapinok neyên ser Kurdan. Ellawekîl ku biqeherim ezê poşekê li van herdu xwedêgiravî serokan bixim kul li erdê mexel bimînin! Beranê me dibêje serokomar û serokwezîrê Tirkiyê Gul û Teyyib, ew li giravê ji bo mêvandarî û ezimandinê her amadeye ku werin pêre çend lotikan bavêjin! Di domahîka daxuyaniya xwe de li ser babetê wiha gotiye: “Lawo ma hûn weke serleşkeran jî wêrek nabin. Beriya niha generalên we hatibûn cem min û digotin bibore kaka em nikarin bi leşkerî we têk bibin. Lewra çareriya me bi demokratîkbûnê ye hew.”

Teyyibo kerê ço ço bihedine!

Beranê Giravê quloçên xwe zivirandiye ser Teyyib û bi hêrs wiha dibêje: “Ev çi paket makêtin ulan kerê ço ço! Hun hê zarokê doh in. Min gelek pakêtên wiha dîtine. Hûn bi vî şiklî encex karibin terorê tehrik bikin. Ma hûn ker in çima fahm nakin. Wek sehrebazan bi okus-pokusan ma çareserî dibe. Dixwazim bi hişmendî bê tevgerîn. Lewma bi min re bikevin diyalogê û hew. Çare ez im xwe bêçar nehêlin!”

Hêja uydiya(peyk) wan nîn e!

Beranê Giravê her wiha li ser vekirina kanaleke televizyonê ya bi Kurdî jî pir hêrs bûye: “Teyyibê ker dibêje; emê kanalek bi Kurdî vekin. Ez ji bangî wî dikim û dibêjim; Tu kî yî lawê berî bavê! tu bi çi xîretê li ser Kurdan biryaran didî? Kanala TV yê ya Kurdan jixwe heye kero ma li mala te uydî nîn e!”

Egîdê Cimo bû Amedî!

Senger Îloz- 04/02/08- Amed-

Me digot Kevirbirî didirîne na yabo na! Me Egîdê Cimo jî bi çavên xwe dît. Êdî mirin nîn e! Mîrê bilûrê hat Amedê û bilûra şivanê bajêr çawa girt, bi xewn û xiyalên vegera welêt lûrand û hey lûrand! Bilûrvanê bi nav û deng herwiha xwest giyana xwe ya ciwanî jî li Amedê bidomîne. Bijî û her bijî Egîdê Cimo!

Li me negire bavê mino, gotineke me ji te re heye. Tu dizanî çaxê bav û bapîrên te koçber bûn pezê xwe jî bi xwe re biribûn. Dîsa bawerim ji me bêhtir tu têdigihîjî ku tu yê nikaribî peywendiyê bi Amediyan re deynî. Li wan deran kırıx mırıx hene ku derpê jî bi mirov re nahêlîn! Weke Lotikxane em ji te tika û rica dikin bi şaredar neyê xapandin. Ew bi xwe jî bê ewlehî dernayê nav bajêr. 

Bila madê te tirşo mirşo nebe, gotinek meyî din jî heye: Tu her Egîdê, Mêrxasê Cimoyî, lê ji bo guhdariya bilûra te li wir tu pez nemaye ! Bilûrvanê navudengî, eger bixwazî li ser dîwarekî hember bexçeyên Hewselê bi tena serê xwe bilûrînî fermo! Me ya xwe got. Paşê nebêje, “Erê erê wey li min pepûko li min evdalo ev çibû min bi serê xwe kir û ketim vî halê xerab”  Wê çaxê berdevkê dengbêj û bilûrvanên Kurdistanê Salihê Kevirbirî jî nikare bi hewara te ve were! Mexeyide, lê wê êdî “Zindîkujên Mirîperest”  jî li ser te lotikan bavêjin.

Vir nexwînin xeter e!

Kevirbirî Kiye? Ev çend sal in ku tu dengbêj nehiştiye li ser rûyê erdzemînê ku bi wan re lotikên dengbêjî neavêtiye. Demekê di Sibîrya re derketibû û li wir jî li dû şopa dengbêjan bû. Beriya here me gotê kurik ev çi kar e tu çi ji van rebena dixwazî, dşvê wan berde wan azad bike  bavê min. Ma ji kî re dibêjî yabo! Di ket guhekî ji yê din derdiket. Berdevkê dengbêjan, te jî bi çavê xwe dît ku rebenê Cimo hat Amedê. Ma qey te tiştekî baş kir ew bi wan da naskirin.

Kekê mino binêre, te got Egîdê Cimo Egîdê Cimo mîrê bilûrê û werhasil…Te wisa kir ku rebeno ji şerma xwe hew vegere radyoya Êrîvanê jî! Weyyyyyyy li minêêêê…...

Bêmane, bêmane çiye?

Senger Îloz – 02/02/08-Kurdistan-Li hin herêmên Kurdistana bakur bêjeyek heye ku, tu bêjî nabe nebêjî jî nabe! Peyva bêmane di gelek civîn û civatên rojane de wisa tê bikaranîn ku em şaşmayî dimînin.

„Bêmane ez doh çûm bajêr“. Ji ber ku destpêka axaftinê dorpêç dike ev bêjeya me ya sosret, bêmane dibe hemû mane hemû mane jî mixabin dibin bêmane! Ji bo çi tu çûyî bajêr kekê mino? Ma çûyîna te ya bajêr xwedî mane nîn e? An jî tu li bajêr hin tiştên bi dizî dikî! Gelo tu li bajêr diçî gel xanimên lotikvan! De bêje bavê mino ev çi bêmane ye?

Şaş fahm nekin bêmane! Ev kesên ku bi piranî li herêma torê (Mêrdîn û hin navçeyên Batmanê) ne û bi bêmane nav û deng dane, bi temenê xwe ji min û we xwendevanên hêja mezintir in. Her wiha ev kes bi xwe rûsipiyên nav civatê ne. Ku ne vir (derew) be, wekî lêkolîner em li ser navê Lotikxanê çûn herêmê da ku li ser bêmane lêbikolin. Kalemêrek derket pêşiya me bêmane! Kalemêr bi xwezayî bêmane bi mane kir ku tu hewcedariya me li ser zanîna vê bêjeyê nehişt. De kerem bikin diyalogên me.

Lotikxane:  Apo ma tu mêvanan dihewînî?

Kalemêr: Wey hûn li ser çavê min hatin. De werin hûndir kerem kin.

Lotikxane: Apo navê te çiye?

Kalemêr: Bêmane Sofî Hesen!

Lotikxane: Apo xwedê zêdetir bike, emrê te çiqas e?

Kalemêr: Bêmane 72 ye.

Lotikxane: Apo ma tu Lotikxanê zanî?

Kalemêr: Bêmane Lotikxane çiye? (Lotikvan li ser vê gotin kalemêr hêrs dibe.)

Lotikxane: Apo Lotikxane ne weke ku tu dibêjî bêmane ye. Lotikxane bêmane bimane ye!

De werin safî bikin. Kalo em jî bêmane kirin. Kuro dibêje bêmane Lotikxane! Waweylêêêêêê!

Mertalê şaredar û pedal!

Senger Îloz -01/02/08- Kurdistan- Dibêjin ji bo ku bajarê dîrokî Heskîf ji noqavkirinê bê rizgarkirin Koma Pedalên Bisiklêtan, hatiye avakirin û çalakiya xwe ya pêşî jî bi serkeftî pêk aniye. Ne havîne ne bihar e ne jî çaxê seyranê ye. Gelo di vê zivistana reş de van ji me biaqiltiran çawa ji Dîlokê heta Batman û Heskîfê pedal zîvirandine?
Bibexşînin bavo! Em tê nagihin!

Herwiha li gorî saloxdayînên ajansan Şaredarê Batmanê Hiseynê Mertal (Kalkan) jî di ajotina bisiklêtan de piştevaniya ciwanên pedalgêr kiriye. Dîsa li gor hin agahiyên çavkanî nediyar Şaredar Hiseyin bi tevgera ciwanên pedalgêr pir kêfxweş bûye û rabûye ser lotikan.
 

Heta tê gotin ku, şaredar bisiklêtê ciwanekî desteser kiriye û xwestiye ew jî pedal bigerîne! Lê bila mala ixtiyariyê xirabe, dema rebeno li bisiklêtê siwar dibe totlanî hev dibe û digindire digindire digindire… Ji şikefteke Heskîfê  werdibe xwar! Şaredarê me tirseke mezin dixe nav gel. Av heyat e û ku ne ji ava çemê Heskîfê be koma pedalan jî ne dikarîbû şaredar ji noqavbûnê xilas bike.

Neyse, bi zimanê Tirkmancî gotinek heye; "Ava giden avlanır." Em jî dîsa bi Tirkmanciya jorîn dibêjin; "Suya giden sulanır." Kuro Hiseynê Mertal, tu zilamekî hêja nû hînî Tirkî bûyî, heta doh ji peyva, "Merhaba Batman" pê ve tu gotin ji devê te dernediket, çi karê te bi bisiklêtan re heye bavê min !

 Ji bo rizgarkirina Heskîfê jî ma hewcedarî bi hêzên derveyî Batmanê hebû! Hema tu bi serê xwe bes bûyî! Te Mertalên xwe bigirta û li ber dozer û mekîneyan siparte çêkira kakacan!

Daveta seyidên lotikvan, biborin Mercê û Xirbê!

Senger Îloz-29/01/08-Stenbol/ Seyidên lotikvan biborin (Mercê û Xirbê) ên Nisêbîna rengîn di daweta xwe de, serê lotikvanên dîsko û barên sosyeteyên Stenbolê xistin bin çengê wan. Di daweta ku li Ataköy Plazayê pek hat de, Koma Muzika Gel ango mirtibên Nisêbînê Behramo û koma wî ya kemaçê, weke ku ketibin dinyayeke nû lotik li ser lotikan avêtin.

Dema Behramo sehneya dawetê desteser kir ma kesî hunermend wêrîbû xwe nêz bike. Wele, dûvîkê kemaçê hazir bû! Her wiha vexwendiyên dawetê jî dan ber pihîn û dûvikê kemaçê ku, di nav lotikan de xwe winda kirin.Behramoyê bi eşqa dolaran şabaş li ser şabaşan dikir, hişt ku rebenê nizamçikoyê mêrdînî ku bi orkestraya xwe ji Şivanê Kurdî û Îboyê zikbirçiyê dengbiberz distra, ji dikê bi reva rev dakeve.

Di vê navberê de Sosyeteya Ataköyê li van dengên muzîka modern a Kurdî ecêbmayî mabûn. Rebena nizanîbûn gelo li ber van dengên şabaşan û memikên gihayî çawa lotikan bavêjîn. Xwedê alîkarê wan be. Bila hinek din sebr bikin, hindik maye mirtibên Kurdistanê bibin çandeke populer. Wê çaxê şabaşmendên weke Behramo û Simbêlbadayiyên wek Şemo jî wê bi qedirbilindî derkevin sehneyên Plaza û diskoyên sosyeteyên jixwerazî. Hûnê wê çaxê lotikvanên çîptazî bibînin ku çi lotikan davêjin li ber dûvikê kemaçeya Behramo!

Neyse, Cemaeta Seyîdan bi serkêşiya bavê zavê Seyîdê Kumikkeskî mezinê malê Mistefa, li ber kemaçe û stranên gelêrî heta berê sibê govend gerandin. 'Wê ocaxa seyidan bi me vede yabo! Em nikarin bibêjin stranên bêehlaqî ango argo jî!' Daweta birayê malbata karmend Ednan Çelîk û xwediyê Martıp'a Mêrdînê textorê hêja Kenan, roja yekşema borî hate kirin.

 Di vê daweta navborî de, Nisêbîniyan xwe bi govendê weke hevîr

                                   Şemsedîn (Şemo)

nermijandin.

Em li ser van hemû gotinan dîsa jî dibêjîn; ji zava û bûka me Hecî û İpek re ji ber ku bûne hinceta populerkirina şabaş û kemaçê û lotikvanên sosyetê hesidandine xwe, jiyaneke bextewarî hêvî dikin.

                                            Behramo