Tacdîn Baran

lotikxane@hotmail.com

17 santîman xeyalên Şivanê me jî têk bir

Bawer bikin 17 santîmên otêla Îmralîyê tir ji gellek kesan berda û xeyalên wan ser û binê hev kir. Lê şikir ji xwedê re, daweta 17 santîman ferikî û berbûk jî hetikî. Heta carek din xwedê kerîm û rehîm e werhasil..

Herî zêde ez li ber çi dikevim hûn zanin gelî xwendevanan? Li ber Şivan Perwerê me. Bawerim heta îro tu kesekî wek vê malmîrata 17 santîmên Îmralîyê lotik li Şivanê me nexistiye.  Şoreşa 17 santîman xeyal, plan û projeyên Şivanê me serûbinê hev kir û mecbûr kir ku Şivanê me konsera xwe ne li Amedê, lê li Awistûryayê li dar xe.

Belkî tê bîra we, Şivanê me ji bo li Amedê konserek aştîyê li dar xe, projeyek dabû hikûmeta başûr û ew proje ji alî Nêçîrvan ve hatibû qebûlkirin (di rojnama Çawdêr de ev mijar belav bû). Li gora rojnamên başûrî digot, ji bo projeyê li dora 250 hezar euro alîkarî wergirtibû.  Şivanê me ji bo vegera xwe rojev, şert û şirût germ kiribûn. Hem lempe ji hikûmeta Erdogan re pêdixist û hem jî derdiket şev û festîvalên hevalan ji bo ku di vegerê de serê wî neêşînin.

Axir, xwezî ji mîrê keremê re ku Şivanê me vegeriya welêt û ji vê xerîbî û mihacirîyê xelas bibûya. Xerîbî zehmet e. Lê xwedê ahê Şivanê me ji 17 santîman re nehêle rebbî. Piştî ku şoreşa 17 santîman dest pê kir û dinya bû mij û dûman, plan û projeyên Şivanê me jî ketin avê û vegera wî bû xeyal (ez ji bo vê demê dibêjim, belkî di pêş de dîsa şert rê bidin ku Şivanê me vegere).

Ez serê we neêşînim cîgerlerim, piştî ku şoreşa 17 santîman rojev kir şorbe, ê helbet wê Şivanê me jî rûnenê û hêsran li ser şoreşa 17 santîman nebarîne. Mecbûr e tiştekî bike ku vê tirê ji 17 santîman re nehêle û projeya xwe têxe jiyanê. Ji ber vê jî, piştî şêwr û mişêwrên giran, 17 santîman Şivanê me mecbûr kir ku konsera xwe ne li Amedê lê li Awistûrya li dar xe.

Ez serê we bêşînim, mesela 17 santîman û Şivanê me jî ev bû qurban.

De xwedê ahê Şivanê me ji 17 santîman re nehêle rebbî. Ev Şivanê me çi bextreş e yaho, weledddd! Çi cara ku dixwaze berê xwe bide welêt û li welêt lotikan bavêje, hew we dît ecacok lê rabû û dinya li ser serê wî kirin mij û dûman.

De neyse, xwezî bi wê roja ku Şivanê me vegere welêt û em jî li ber dengê tembûra wî govendê bigrin û hûn sax…..

Haaaaaa, wextî min ji bîr bikira kuro. Fitne û fesadên internetê dibêjin ku wê Şivanê me di konsera xwe de stranek bi Tirkî jî bistrê. Îcar fitne û fesad dibêjin „çima Erdogan stranek bi Kurdî nastrê, lê wê Şivan bi Tirkî bistrê, ev çi şorbe ye qardaşim“ filan û fîstan.

Halla hallaaa  ya siphan alla! Law ev Kurdên me jî ecêb in ha.

Yaw babam, ma strana „bûresî Mûştir û yolî yoqûştir“ li dengê Şivanê me ne dihat? Belê bi xwedê tir jê berda, ihi! Ma ku stranek bi Tirkî nestrê, wê çawa xwe li ber dilê hikûmeta Kasimpaşalî şîrîn bike qardaşim? Ma veger bê stranên Tirkî dibe yaw, wîî!

Kuro ev Kurdên me xeşîm in, zikreş in. Çavê wan bar nabe Şivanê me vegere welêt, îcar li mahne û sebeban digerin ha, ya starrrrrr!

23.12.2009- Alamanya

 Braderê me sola xwe bir ser textor!

Roja çarşemê (09.12.2009) generalê malpera Avestayê go „zirrrrrrr“ û telefonî min kir. Piştî silav û kulavan, go: „Xeyo, Brader em dawetî Hollandayê kirine, dibêje bi qerpika stuyê wî belqityê Tacdîno jî bigre û werim em şamborekan bixwin“.

Min pirsî:

-         Kuro kîjan Brader cîgerim?

-         Kuro Brader Mûsikî lo, çawa tu wî nasnakî malnexerab, ne hûn hevalên hev ên sala ne law..

-         Wîîîîîîîî, kuro tu çêl Braderê me dikî, ewê go tembûra xwe dike kelek û gemî û pê behr, çem û golan derbas dike?

-         Erê lo…

Axir, piştî ez bi wezîra karê hindur, yanî bi jina xwe, şêwirîm û min fitû jê xwest, me go temam û me soz da go em roja înê sînorên Alamanya biqelêşin û xwe li sînorê Hollanda xin, li Braderê me bibin mêvan.

Ez serê we bêşînim, em li kera Dilbixwînê me siwar bûn, min hefsar xist destê xwe û min zixtek li der qûna kerê xist. Piştî du seetan, ez û wezîra xwe, Dilbixwîn û wezîra xwe û herdu „badygard“ ên me, me ji Braderê xwe re got: Selamunaleykum!

Piştî ramîsan û alastinê, em derbasî hindur bûn, xoş û bêşê dest pê kir û me kir çirik û virik. Piştî seetekê, xanim û wezîrên karê navxweyî derbasî midbexê bûn û em hersê general jî derketin nav sûka bajêr.

Werhasil, di nav sûka sergirtî de me çend tûr û voltayên wek ên hepisxana Diyarbekirê virde wêde avêtin. Ê helbet jinik minikên xweşik û seksî jî di ber me re derbas dibûn û bêhna parfûma wan em bê eraq serxweş dikirin. Lê xwedê heye,  jinên Hollandî jî wek hespên kihêl in ellahwekîl. Tama wan ji şebeşên Diyarbekirê û bastêqa Mêrdînê jî xweştir in. Gerçî min li tama wan nenerî ye, lê dibêjin xwedêgiravî lotikvanên temam in. Li ser bextê xelkê be lo..

Axir, carekê hew me dît va li ser tabelaya dikanekê nivîsandiye „Dr. Shoe“. Yanî „Textorê Solan“. Textorê Solan kuro!?

Law ev Hollandî pir biaqil in ha, de binerin bê kes bîra „Textorê Solan“ dibe kuro!

Gava me çav li „Textorê Solan“ kir, Braderê me sola xwe ji lingê xwe derxist û got:“Aha va em hatin ser textor. Baş bû go em hatin law, bi şeş telaqan ev du hefte ne serê sola (şekal, pêlav) min dêşiya û nexweş ketibû, de madem em hatine ber lingê textor, bela textor beg çend aspîrîn û dermanên serêşê bide sola min“ filan û bêvan.

Ez serê we dêşînim, piştî me sola Braderê xwe derman kir, em li kafeteryakê rûniştin û me qehweyek bi ser kezeba xwe de berda û kezeba xwe pê reş kir. Piştre hew me dît telefona Braderê me go „zirrrrrrrrrr“ û em veciniqandin. Wezîra Karê Navxweyî Necla xanim ferman da û got: „Zû werin va kutilk û şamborek hazir in de“ û ziravê me qetand.

Axir, em hatin malê. Me dî hayhoooooo, va Necla xanimê ser û binê masê kiriye xwarin. Lê tenê xwarinek wê bala min kişand. Şamborek! Şamborek ewqasî bi qeys û pîvan hatibûn çêkirin go nayê gotin. Te digot qey santîm bi santîm hatine pîvan. Lê ez di texmîna xwe de xelet derneketim. Piştre min bihîst go li Hollandayê jî moda 17 santîman dest pê kiriye û şamborekên li ser masa me jî ne kêm û ne zêde, tam 17 santîm bûn bi dîn û îman. Erreeeekkkkk! Law sola Braderê me 17 santîm bû, şamborekên Necla xanim 17 santîm bûn, masa wan 17 santîman nizim bû, dîwanên (qoltix lo) wan 17 santîman bilind bûn, ma çi û ne çi! Ya rebbî star û hew….

Werhasilî kelam, em heta derengî şevê rûniştin. Braderê me dîsa tembûra xwe kir kelek û gemî, em lê siwar kirin û hûrik hûrik, hêdî hêdî em pê gerandin. Piştî em rabûn û me xatir xwest, em hatin devê derî, min sola xwe xist lingê xwe û qeytana wê girê da.

Lê çi sosret qewimî hûn zanin gelî xwendevanan?

Tew min dî sola min jî bûye 17 santîm!

14.12.2009- Alamanya   

Ev salek e 500 euro deyndar e

Li ser bextê fitne û fesadên bajarê Bonn ê be, dibêjin berî çendakê li bajarê Bonn ê „Mîhrîcana Helbestên Kurdî“ çêbûye û Kurdên me yên rojavayê Kurdistanê îmana helbestan teneke kirine, tir ji helbestan berdane. Lê mesela me ne li ser helbest û çîrokan e. Dibêjin berpirsê Komela YASAyê Arif Cabo, berî destpêkê derketiye ser dikê û hinekî behsa komela YASA û lidarxistina mîhrîcanê kiriye.

Li ser bextê xelkê be, dibêjin Arif Cabo, li ser dikê û li himber kamerayê lotikek bêîman li hunermend Şivan Perwer xistiye û ew gêjo mêjo kiriye. Çima hûn zanin? Xwedêgiravî Arif Cabo bi sê telaqên jinberdanê sûnd xwariye û gotiye:

„Jina min ji min berdayî be, bi hersê telaqên jinberdanê, Şivan Perwer berî bi salekê soz dabû ku 500 euro wek alîkarî bide me da ku em mîhrîcanê li dar xin. Lê ev salek e soza xwe neanîye cîh û me ev mîhrîcan bi tir û fisan li dar xistiye. Ma wilo dibe babam? Yan sozan nedin û yan jî go we soz da, stuyê xwe bişkînin û wek ciwamêran sozên xwe bînin cîh“ filan û fîstan.

Werhasil, birastî min nedixwest ez li ser vê mijarê binivîsim. Lê fitne û fesadên bajarê Bonnê emaîl li ser emaîlê ji me re şandin, gazind kirin û gotin:“Na, em wilo qebûl nakin! Lotikxane hevalbendîya Şivan dike û dengê xwe jê re nake. Yan wê Lotikxane li ser soza wî binivîse û yan jî em nema Lotikxanê dixwînin“ û em tehdît kirin.  

Ez bi xwe  zanim ku kekê me Şivan Herûwer feqîr e, miflis e û nikare ji xwe re têlên tembûra xwe jî bikire. Erê car caran diçe başûr û virde wêde çend çewal bastêq û mewîj dide hev jî, lê dibêjin incex ew bastêq û mewîj têra projeyên wî bikin. Birastî di vê dema qrîz û birçîbûnê de 500 euro perakî pir zehf û zêde ye. Ji ber vê, min nedixwest ez di vê qrîza aborî de doza soza 500 euroyî li Şivanê xwe bikim, lê bi ellawekîl fitne û gelacên bajarê Bonnê bêhn li min çikandin û tir ji min berdan.

Ez serê we neêşînim,  dibêjin Şivanê me ev salek e 500 euro deyndarê Komela YASA û Arif Cabo ye. Soz daye lê soza xwe neanîye cîh. Birastî xurcika Lotikxanê jî vala ye, qirûşek têde tune. Yan na, meyê bi xêra dê û bavê xwe 500 euro deynê Şivanê xwe bidaya û gotin netanî ser wî. Lê mala feqîrîyê bivirite, ne hikûmeta Soranekanim alîkarîya me dike û ne jî lotto û toto ji me re lêdikeve.

Îcar Şivano, tembûrvano, soza xwe bîne cîh û serê xwe û Lotikxanê bera erdê nede qurban. Xwe û me neke benîştê devê xelkê, 500 euroyê xwe bide û eşheda xwe bîne û tu sax…

06.12.2009- Berlîn

Xwezî bi dilê wî, jina kir wek keçikek 14 salî

 Operator û neştersaz Reza Vossough ê 48 salî, li bajarê Berlînê lotikek kesanedî avêt û dilê xwe rehet kir.

Li ser bextê esrarfiroşên bajarê Berlînê be, dibêjin jina Reza Vossough ewqasî nexweşik û ne li gor dilê wî bû ku, li ber çavê bûbû wek tenîya binê beroşê û gava diket nav livînên wê, weke ku têkeve ber pîrek 70 salî. Ewqasî ku dilê wî ji jina wî xeliyabû û bi dîtina wê berşoşkî dibû.

Axir, dibêjin Reza Vossough rabûye jina xwe xistiye bin kêr û meqesan û weke ku Pîcaso tabloyekê li gor dilê xwe bineqişîne, jina xwe li gora dilê xwe neşter kiriye û ew kiriye wek keçek 14 salî.

Li ser bextê pêxwaz û qewadên bajarê Berlînê be, dibêjin niha jina Reza Vossough ji manken û modêlek Ewrûpî xweşiktir û bedewtir bûye, memikên wê bûne wek şebeşên Diyarbekirê û Reza Vossough bi şev û roj ji ser sîng û berên wê ranabe, ha ha lotik û zîtirkan dide xwe.

Werhasil, piştî min serpêhatîya Reza Vossough û jina wî xwend, timayî ji min re jî çêbû û şeytanê naletlêhatî tilîya xwe avêt bin qûna min jî.  Şeytan ji min re got:” Kuro Tacdîno, ma tu ji Reza Vossough kêmtir e oxlim? Jına te bûye wek pîra perçiqî, rabe tu jî jina xwe bike mankên qûnde” û ez xapandim. Min jî rabû jina xwe ya 48 salî li ser masa xwarinê dirêj kir, min rahişt kêra goşt û ez pê ketim, kurp û hey kurp, min tam 125 kêr lêxistin û min hûrê wê bera erdê da.

Axir, piştre min çend kîlo bez û parçeyên goştê zêde ji bedena jina xwe jêkir, min rahişt ta û derzîyê û min dest bi dirûtina laşê wê kir. Nıha jina min bûye wek çewalê pînekirî û wek Frankenştayn parçe parçe dirûtî ye.

Ez serê we neêşînim gelî xwendevanan, niha jina min di komayê de ye û ez nizanim ne wê bimre ne wê bimîne. Lê ku mir, ji xwe ezê wek Halis Topraq ji xwe re keçek 17 salî bînim û kêfa xwe bikim. Lê ku ji komayê rabû û wek jina Reza Vossough xweşik bû, ji xwe dîsa xwedê da min û ezê jî lotik û zîtirkan bavêjim.

Lê tembiya min li we be gelî xwendevanan, bi şeytan nexapin û wek min bêaqilîyan nekin. Min jina xwe xist qomayê lê hûn heman qesabîyê nekim law, eman eman....

04/11/09- Almanya

Mala xwedê ava, KOMKAR ji Dolar derbasî Euro bû

Tacdîn Baran- 19/10/09- Almanya- Li ser bextê fitne û fesadên eşîreta KOMKARê be, dibêjin xwedêgiravî eşîreta KOMKARê esker û başçawîşên xwe kom kirine û bi navê „Komcivîna salane“ Ewrûpa hejandine. Herweha dibêjin ku gellek general û mareşalên bê esker û gellek siyasetmedarên ku zimanê wan metro û nîvek dirêj e lê emelê wan siiifirrrrrrrrrrr e, hatine vexwendin û bi taxim û qirewat şeref dane komcivînê.

Axir, li gora saloxdanên sîxurên Lotikxanê yên di nava eşîra KOMKARê de dibêjin, dibêjin KOMKARê dev ji gundîtîyê berdaye, bûye bajarî û navê xwe jî kiriye KOMKAR EU. Ango, KOMKAR EURO. 

Xelet fêhm nekin ha qardaşim, ne KOMKAR DOLAR, KOMKAR EURO!! Yanî, KOMKAR ji Dolar derbasî Euro bû.

Werhasil, sîxurên me bi sê telaqên jinberdanê sûnd dixwin ku eşîreta KOMKARê biryarên zêde baş girtiye û bi serê Hecî Mesût sûnd xwariye ku ji îro û pêde tenê bi zimanê Kurdî biaxivin û lotikên xwe bi zimanê Kurdî bavêjin.  Herweha dibêjin KOMKARê biryar daye ku Kurdên herçar parçeyên Kurdistanê di bin navê KOMKAR EU de bigihîne hev û berê wan jî bide Lalişa Nûranî, wan jî bike hecî.

 Werhasilî kelam, dibêjin 19 kes ji bo rêvebirina KOMKAR EURO hatine hilbijartin û 2 kes jî bûne azayên muxtaran. Herweha tê gotin ku KOMKARê mûlidek mezin daye mêvanan, xwarin û vexwarin kirine çirik heta ku zikê mêvanan bibe wek meşka koçeran.

De xwedê lotika KOMKAR EU qebûl bike û her yekê 25 jinên Alamanî bike qismetê rêvebirên wê rebbî....

Rûdawê em ji nêza kujtin

Tacdîn Baran- 27/09/09-Almanya- Lidarxistina”kokteylan” êdî di nav Kurdan de bû mode. Lê mode û tradîsyonek xweş. Berê me salvegera partîya xwe yan komela xwe li dar dixist. Lê ew hilat (rabû) û niha jî îcar em salveger yan jî roja malper û rojnameyên xwe li dar dixin û bi kokteylan pîroz dikin. Helbet ev kokteylên bi vî awayî wesîleya hevdîtin û dan û stendinê ye, baş û xêr e.

Berî bi çendakê em dîsa çûbûn kokteyla malpera “Kurdistan-post”ê û me çend lotik avêtibûn. Doh jî dora tenûrê ya rojnama Rûdawê bû.

Werhasil, Dilbixwîn Dara yanî generalê malpera AvestaKurd, dîsa bi qerpika stuyê min girt û got:”Yaw cîgerim, Rûdaw kokteylekê li dar dixe. Bi sê telaqan ger Lotikxane neyê kokteylê tama wê namîne” filan û bêvan. Ê ji ber ez jî merivekî germik û nermik im, min dilê wî nehişt û rabû min xwe kar kir û me berê xwe da kokteyla Rûdawê.

Axir, em li kera Dilbixwîn Dara siwar bûn, ciwamêr “navîgasyona” kera xwe vekir û me hella hella berê xwe da bajêr ciyê kokteylê. Lê yabo navîgasyona kera wî tiştek wilo anî serê me nayê gotin. Te digot qey navîgasyona Dilbixwîn Dara li flîmê “Hespên serxweş” yê Bahman Gobadî temaşe kiriye û ew jî pêre serxweş bûye. Çep û rast tevlihev dikir û berê me dida kolan û kuçeyên nenas û xalî. Bi ellawekîl serxweşên ku 10 şûşe eraq vexwaribûn ji navîgasyona Dilbixwîn Dara xweştir karîbûn rê nîşanî me bidana lo.

Werhasilî kelam, em bi sax û selametî gîhan qonaxa xwe û me eşheda xwe anî.

Ê helbet em Kurd gava diçin şahî yan pîrozbahîyekê, em bi zikê birçî dirin lo. Me jî xwarin nexwar û me got.”Yaw de çawa be wê girgirekên Rûdawê bi xêra xwe xwarinekê bidin me, ma em ji nêza (birçîna) namrin” û me bi zikê birçî zimanê xwe li dora devê xwe xist û alast.

Axir, em hatin devê derî, me silav û kulav da haziran û Dilbixwînê me em bi gellekan dan naskirin. Ê yabo gava bihîztin ku ez ji Lotikxanê me, te digot qey cin û melkemot raserî wan hatiye lo, ewqasî ku hem kêfxweş dibûn û hem jî xwe ji Lotikxanê disitirandin.

Ez serê we neêşînim, piştî xoş û bêşê axavtina sernivîserê Rûdawê kek Ako dest pê kir.

Ako ji eyaleta Soranistana Kurdistanê hatibû û helbet bi Soranî dest bi lotikan kir. Cara yekem bû ku min Ako nas kir. Lê bawer bikin Ako ne Ako ye, wek şekirekî nava kaxezê ye. Xweşmirov, xweşxeber û Kurdekî ji min germik û nermiktir e.  

Piştî axavtina kek Ako, rojnamevan û başçawîşê beşê Kurmancî yê Rûdawê kekê me Faysal Dagli, dest bi axavtina xwe kir û bi wê Kurmancîya xwe ya şîrîn virde wêde çend lotikên Alamanî avêtin. Lê kek Faysal Dagli jî sax be, bi xweşhalî pêşewazîya me kir û em bi tenê nehiştin. Navê gellekan nayê bîra min, lê bi vê minasebetê sipasîyên xwe pêşkêşî temamê beşdarên hazir dikim. Birastî di rojnama Rûdawê de xizmet û kedek mezin û pîroz didin.

Werhasilî kelam, îcar em bên ser fêda fasûlîyên hişk û birçîbûnê.

Hûn zanin lo, em Kurd mirîyê du tiştan in. Yek jê em mirîyê doxînê ne û ya din jî em mirîyê zikê xwe ne. Ji xwe ma me Kurdistan nekir qurbana van herdu tiştan babam? Belê.

Ji ber ku em bi zikê birçî ji malê derketibûn û me pişta xwe bi xwarina Rûdawê girê dabû, me digot:”Sedî sed wê xwarinek xweş bê ber me canim”. Meselen wek “Kutilk, goşt û savar, hûr û rovîyên heşandî, kebab, serûpê” filan û fîstan lo.

 Em hê di xeyala xwarina hûr û rovîyên heşandî de bûn, me dî garsona xanim nazik nazik dest bi gerandina xwarinê kir. Lê yabo ne bêhna goşt û savarê tê me, ne bêhna hûr û rovîyên heşandî û ne jî bêhna serûpê.

Çi bê ber me başe?

Çend dîlim meze û pêşxwarinên şiklo miklo, şor û tirş û tehl, darikek diranan (kûrdank) tê de çikandî û de yalla bixwin. Xwarina sosyete û mosyeteyan lo.

Law ma zikê Kurdan bi van meze û pêşxwarinan têr dixwe babam? Tobe. Kuro ma Kurd û xwarinên sosyetîk bavê min? Qure qura zik û rovîyên me ye lo. Min bixwe ji dîlimek meze pêve tu quzilqurtek nexwar û bi ellawekîl heta niha jî ez nizanim ka ew tiştê ku min xwar çi quzilqurt bû.

Ez serê we neêşînim, qure qura zikê min, Dilbixwîn û Hemdulla ye. Hêvîdara me dîsa li xwe nedima heyirî, hema destê xwe virde wêde dirêjî tiştina dikir. Rebenê dinerî ku nexwe wê birçî bimîne, digot “de hema ji tunebûn çêtire wî” û davêt devê xwe.  

Her tişt li alîyekî, lê herî zêde dilê min bi kê şewitî hûn zanin? Bi Newrozê PSK î. Newrozê me lo, ewê ku zêde ji xwarinê hez dike û gava xwarinê nebîne kare keviran jî bixwe ha. We ew nas kir ne?

Piştî ku kokteyla me xilas bû, em û kek Newroz li derve ketin xoş û bêşê. Lê xuyabû ku bêhna wî teng bû û tew “qurequra zik û rovîyên” wî wek dengê tirektora ku bê dohn bimîne û motor lêxe. Ewqasî ku rebeno birçî bûbû ha, weledddd weledddd, xwedê birçîbûnê neke qismetê kesî rebbî. Bi ellawekîl, we wê kêlîkê kevir danîba ber Newrozê me, ne digot na û wê bi niyeta kutilkan ew kevir bixwara.

Ez serê we neêşînim lê ku êşîya jî ji xirrê Rûdawê ve, li devê derî em û mam Yaşar Kaya rastî hev hatin. Lê ecêb e, vê carê ne bi bedl û qirawat bû. Lê bedlê (taxim) lê jî bedl bû haaaa, pehhhh! Bedlekî jeans (cîns-kot) û tam jî lê hatibû. Bi dîn û îman xortên 18 salî jî wek mam Yaşar Kaya ji xwe hez nakin û li xwe nanerin kuro, pek!

Werhasilî kelam, em bi zikê birçî çûn kokteyla Rûdawê û dîsa  bi zikê birçî vegerîyan mala xwe. Bereketa xwedê li eprax û goştê mirîşkan be û hew. Ez hatim malê û min kerbê Rûdawê di serê mirîşka reben re derxist ellawekîl, bixweeeee û hey bixwe. Min xwar heta zik li min bû meşk û xelas.

Îcar kek Ako û kek Faysal Dagli

Hûn deyndarê me û xwarinekê ne qurban. Yan zikê me têr bikin û yan jî Lotikxane li axretê dawedarê dîn û îmana we ye û hûn sax.....

Kurdistan-Post 5 salîya xwe pîroz kir, çend lotik û motik

Tacdîn Baran- 06/09/09- Almanya- Malpera Kurdistan-Post ku mam Yaşar Kaya û cîgerim Hasan Bildirici nivîskar û generalên wê ne, doh (05.09.09) li bajarê Koln a Almanya, pênc salîya malperê bi kokteylekê pîroz kirin û çend lotik avêtin.

Di şahîyê de bi qasî 50 qirasên zilam û xaniman hatibûn û dê weledê xwe avêt. Xwarin, çay û qehwe wek çemê Dîcle û Feratê diherikî û car carnan jî eraq û şerab li ser hinek masan xuya dibû.

Werhasil, mamê me Yaşar Kaya, Lotikxane jî dawetî kokteylê kir û me jî dilê mamê xwe nehişt û bi dilxweşî beşdarî kokteyla Kurdistan-Postê bûn. Piştî ku Dilbixwîn Dara, Hêvîdar Zana û kurê wan Robîn Hod bi def û zirne hatin dû Lotikxanê, em li kera xwe siwar bûn û me berê xwe da ciyê kokteylê.

Lê zêdebûna ser kezebê ew bû ku li bajêr dîtina parkên belaş zehmet bû û Dilbixwînê me çû restoranta ku kokteyl lê çêdibû, mifta derî anî û berê kera xwe da parka binê erdê. Min jî di wê navberê de cixareyek qûnsor vêxist, bû kuşkuşa min û min pê kezeba xwe reş kir, dûman bi ser kolanê xist.

Axir, Dilbixwînê me nehat. Ne ew hat û ne jî serê kera wî xuya bû. Min ji xwe re got:”Heye neye parka vala nedîtiye û rebeno li parkê digere”. Piştre dîsa min cixarek qûnsor vêxist û dûmana wê bera ser kezeba xwe da, lê Dilbixwîno dîsa nehat.

Vê carê min dîsa got:”Ihiii, bi sê telaqan heye neye Dilbixwîn û Hêvîdarê bi sol û şimikan bi hev ketine, serê hefsarê kerê ji destê wan filitîye û xwedê zane bê kera wan berê xwe daye kîjan bajarî” filan û bêvan.  Lê şikir ji xwedê re, piştî nîvseetê min dî wa serê wan xuya bû û şûna derbên kujtinê di laşê wan de tuneye.

Werhasil, piştî ketine hundur, me gelek dost û nasên qedirbilind dîtin, silav û kulav dan hev û em li ciyê xwe, li ser qûna xwe rûniştin. Xanima garson dest bi kişandina xwarinê kir û yeko yeko danî ber me. Lê xwarin jî xwarin bû haaaaaa, ne kesî pê têr xwar û ne jî ket ber diranê kesî. Wek qeretûna berî kişandina cixarê bû lo. Lê mala wan ava, destê Yaşar Kaya û Hasan Bildirici sax bin ku ev dost û hogir anîn cem hev û bayek ji ber serê xwe berdan.

Ez serê we neêşînim, tan min xwarin dixwar, hew min dît koma general û başçawîşên PSK ketin hundur. Mesût Tek, Yilmaz Çamlibel, Beko, Newroz û du-sê xortên wan (belkî jî badygard bûn kî zane). Piştî selam û kelamê li masa tenişta me rûniştin û ketin xoş û bêşê. Ji berê de kêfa min ji Beko û Newroz re dihat. Xwedê heye, herdu jî Kurdên xalis muxlis in, Kurdayetî û welatperwerî ji wan difûre û lotikvanên baş in. Ji xwe qet şika min ji kek Mesût Tek û Yilmaz Çamlibel jî tuneye. Ciwamêran barek dane ser milên xwe û ji bo armanca xwe û partîya xwe xizmetên baş ji doza Kurd re dikin.

Werhasil, Newrozê me, yanî Newrozê PSK lo, li vir jî ket bin barê fedakarîyê û himaltî kir. We go himaltîya çi?

Himaltîya vexwarina çayê. Ji xwe ji tirsa ku Lotikxane li ser wan nenivîse, ne eraq vexwarin û ne jî şerab. Rebenan zikê xwe bi vexwarina çayê kirin meşk û wek zikê mam Celal nepixandin. Tew Newrozê me qedeh û îskanên çayê ji ber kêm nedibûn. Xanima garson çayê tanî û digot:

”Çay îçen varmi cîgerlerim?” 

Gava deng ji kesekî dernediket, hema Newrozê me xwe çend dikir îskana çayê û digot:”Bextê min reş e, fedakarî dîsa bû para min rebenê xwedê, ka wê çayê bide min” û dibû zinge zinga dengê kevçîyê wî.

Birastî ji derveyî çend kesan pêve min kesek nasnedikir. Tenê ji çapemenîyê min şikl û dirûvên wan nasdikir û hew. Lê min dît ku serokê Navendê Metîn Încesû zikê xwe ji zikê mam Celal jî mezintir kiriye. Ji ber dev ji cixarê berdaye, xuyaye hema zorî daye xwarinê û zikê wî nîv metroyî li pêşîya wî dimeşiya.

Xalitê me yê Ereb ( bawer nekin ku Ereb e ha, eman eman. Di dema xwe de Abdullah Ocalan navê “Ereb” wek toqa naletê pêve zeliqandiye û navê wî maye Xalitê Ereb. Lê Kurdekî qirase, boxê berana ye) dîsa bêhna Kurdewarîyê jê difûrîya. Ji roja ku min Xalit nas kiriye, hilfa min çûye ser û birastî jî yek ji wan kesaye ku Kurdayetî jê dibare, bi mejî û ruhê xwe Kurd e û wek Lotikxanê dijminê dagîrkera ye. Di dema xwe de gerîlla bûye, di encama teqîna bombeyekê de lingekî xwe winda dike, lê derhemek jî ji Kurdayetîya xwe winda nekiriye, qiraseyekî mêra ye.

Tew ji xwe parêzer Weysel!

Piştre hat ser masa me. Li welêt jî parêzerîya PKK kiribû û xuyabû piştî derketina Ewrûpayê navbera wan nexweş bûbû, niha ew û xanima xwe li bajarê Frankfûrtê parêzerîyê dikin. Kurdekî sempatîk, xweşxeber û kedkar e. Ji xwe piranîya kesên beşdarî kokteylê bûbûn kesên ku ji PKK veqetiya bûn. Lê parêzer Weysel bi hest û tevgera xwe bala min kişand ku Kurdekî dilşewat, dilpak û lotikvanekî baş e.

 Helbet şika min ji tu kesê ku beşdarî kokteylê bûbûn tuneye. Lê ev navên ku min nivîsandin di serê min de mabûn û ji ber wê min tenê navê wan wek nimûne nivîsandin.

Di eslê xwe de lidarxistina kokteylên bi vî awayî hewcedarîyek e, wesîleyek e ku meriv bê cem hev, hevdu binase û kêm be jî hinekî bêhna xwe bi dost û nasan re derxe.

Hêvîdarim wê temamê malperên Kurd kokteylên bi vî awayî lidarxin û bibin wesîleya hatina cem hev.

Çurukkaya lotikek qirase li cîgerim Ocalan xist

Tacdîn Baran- 14/08/09- Alamanya- Li ser bextê çapemenîya Tirk û rojnama Zamanê ya Fethûllah Gulen efendî be rebbî. Dibêjin xwedêgiravî Selîm Çurukkaya abêmiz,  serokê Kurdên sererd û binerd sayin û pir mezin Avdullah Ocalan daye ber şeg û pegan û bi kulm û boksan ketiye ser zikê wî.

Li ser bext û namûsa rojnama Zamanê û Fethûllan Gulen efendî be, dibêjin Çurukkaya bi sê telaqên jinberdanê sûnd xwariye ku Abdullah Ocalan endamê çeteya Ergenekonê ye û li Îmralîyê dek û dolabên kesanedî li serê Kurd û Tirkan digerîne.

 Xwedêgiravî Çurukkaya gotiye:“Bi namûsa mêrê berê, ez bi gora Mazlûm Dogan û Kemal Pîr kim, Abdullah Ocalan endamê Ergenekonê ye û Ergenekon bi rêya parêzerên wî têkilîyê pêre datînin. Bi sê telaqên bê fitû, heta Ocalan li Îmralîyê be wê Ergenekon wî li ser tilîya xwe bizîzikîne û wî wek Nisredîn Hoce paşûpê li kerê siwar kin. Ji ber vê, heta Ocalan neqlî girtîxaneyek sifîl nebe û nekeve bin çavdêrîya wezareta dadê, wê Ocalan ji tora Ergenekonê xilas nebe û wê şer jî raneweste ellawekîl“ filan û fîstan.

 Werhasilî kelam,  Selîmê me bi dewamî dibêje ku ji 2004an û virve fermana şer ji Îmralîyê derdikeve û ji ber ku em rûyê Ocalan ê rastîn eşkere dikin, mirîdên wî me wek Ergenekoncî bi nav dikin û dixwazin erka Ocalan a di nava Ergenekonê de neşê eşkerekirin.   

Wille yabo ez bi xwe bûme wek mirîşka gêj û nizanim ka destê kê di bêrîka kê de ye. Lê ez tiştekî wek îmana xwe zanim ku ew jî ev e:

Dîrok kesekî efû nake. Her wê rojekê qûna reş û spî derkeve meydanê….. 

Heyecana xortê 14 salî û hûr û rovî

Tacdîn Baran- 14/07/09-Almanya- Generalê Avestakurd.net ê Dilbixwîn Dara, hunermend, rewşenbîr û siyasetmedarên me dane ber lotikên 25 pirsan û dora tenûra wî kîlometroyekê dirêj bûye. Vê carê jî Serekerkanê “Ozgur Mirovler Toplilixî” cîgerim Şukru Gulmuş bersiva pirsên Avestakurd daye.

Bi dîn û îman, ellahime kîtabime, heta îro tu kesekî wek Şukru Gulmuş a dilê xwe negotiye ellawekîl. Tam ji kezebê gotiye haaaaa! Îcar nizanim ne ji kezeba Fransî yan ji kezeba Kurdî. Lê ez dibêjim sedî sed ji kezeba Kurdî gotiye.

Ji berê de dibêjin “Dil pîr nabe”.  Tu kezeba xwe jî biguherî dil pîr nabe, tu firşika xwe jêkî jî dil pîr nabe, tu “di ber de jêkî” jî dîsa dil pîr nabe. Ev dilê malmîrat pîr nabeeeee û pîr nabe-

Cîgerim Şukru di bersiva pirsa: Çi te bi heyecan dike? de gotiye: Maçkirina qîzekê.

Maçkirina qîzekê kuro! Offffffffffff, law ma ji vê bersivê xweştir bersiv heye qerdeşim? Bi sê telaqên jinberdanê, ev bersiva cîgerim Şukru xoce ji şorba nîskê jî xweştir e law, pekkkkkk li vê ecêbê!

Yaw qerdeşim, îkî gozim, te kezeb li ser cîxarê kir maye dil. Binere tu dilê xwe jî li ser heyecana maça qîzekê nekî haaaa, eman eman! Ji xwe dil maye, dilê te jî bibe qurbana heyecana maça qîzekê, wê Ozgur Mirovler Toplilixî bê sermiyan bimîne babam, wîî! Yox qerdeşim yox, Piştî vî emrî xwe nêzîkî qîzik mîzikan meke. Bi ellawekîl vê carê Fransî jî nikarin bi hawara te ve bên ha, ok!

Werhasil, cîgerim Şukru dîsa bersiva xalê me şûjin Dilbixwîn Dara daye û dibêje: “Jina min ji min berdayî be, ez ji xwarina hûr û rovîyan hez dikim”

Hûr û rovî law!

Yaw cîgerim, di Lotikxanê de hûr û rovîyên belaş pir in. Rojekê bibe mêvanê dîwana Lotikxanê, bi sê telaqan emê hûr û rovîyên xaltîka Fatê û Sofî Xelef ji te re biheşînin û deynin ber te. Bixweeeee û ha bixweeeeee! Bixwe heta go zikê te binepixe bibe wek zikê mam Celal. Ma ne başe cîgerim?

Axir, cîgerim Şukru Gulmuş, di pirsa cixarê de jî dibêje:” Dînime îmanime cixarê dikşînim. Hem jî dûmana cixara min wek dûmana terektorê bilind dibe. Ma çima ezê cixarê nekşînim babam? Dikşînim ji ber ku li dinyayê tu kêfa min nemaye” filan û fîstan.

Weleddddd weledddd! Law madem kêfa te li dinyayê nemaye, çima maça qîzekê te bi heyecan dike qerdeşim? Yan ji bo ku te qîzek maç nekiriye kêfa te nemaye iki gozim?

Ê law were Lotikxanê qerdeşim! Were emê xêrekê bi xwe û te bikin û emê bikin go tu heta sibê xaltîka Fatê maç bikî law, wey! Were wê hisreta maça qîzekê ji dilê xwe derxîne babam, bila ew hisret bi te re neçe gorê haa, ok! Lê maçên xaltîka Fatê jî maç in haaaaa, pehhhh! Bi ellawekîl maçên xaltîka Fatê wek agirê cehnemê meriv dişewitînin dînime îmanime, oxxxxxxx!

Ê de were cîgerim were...Were emê hûr û rovîyên heşandî jî bidin te û emê bikin go tu û xaltîka Fatê hevdu bidin ber lotik û zîtirkên maç û ramûsanan cîgerimmmmmmm!

Perda keçkanîya wê di 10 hezarî de teqinî

Tacdîn Baran- 25/04/09- Almanya- Alîna Percea a Romanî, ji bo ku mesrefa xwendina xwe ya li koleja Almanya derxe, qîzanîya xwe di internetê de dabû ber bazarê û ji bo lotika şeva pêşîn 50 hezar pound dixwest.  Ê tabî ehmeq û qûnekên têr pere jî pir in, hinek ketin dora tenûra wê, pif kirin tenûrê û xwe lê germ kirin. Lê piştre li wan sist bû û şeytanqûnî bûn.

Piştî ku mamosteyê Alîna Percea daxuyanîyek da înternetê û got:”Guh medin wê teradînê, bi sê telaqan perda wê çiryaye û diryaye, hema bêjin bûye wek bêjing û seradê”, mişterîyên wê sisto misto bûn û bi xwe de rîtin. Yanî, kesî ji 10 hezar poundî zêdetir di perda wê neda.

Axir, li ser zimandirêjîya mamosteyê wê, Percea xanim radibe diçe ser textorekî qirase û dibê:” Aha saxtî bike textor beg, destê xwe deyne ser wîjdan û wî xiyarê nav şeqê xwe. Heger ez ne keçik bim ezê xiyarekî bi guhê xwe vekim” filan û fîstan.

Ez serê we neêşînim, piştî ku textor ser û binê tenûra wê saxtî dike, virde wêde lê dinere û çend carî bêhn dike, raporê didê û dibê:”Bi serê Îsa û Mûsa kim wek zêrê zer e, mêşekê jî xwe li ser dananîye” filan û xeftan.

Erê Percea xanim rapora xwe di înternetê de eşkere kir jî, lê derba mamosteyê wê ciyê xwe girt û kesî ji doxînsistê bawer nekir. Hetta hinekan digot:”Kuro de dev ji perdê merdê berdin looo, heye neye wî qûnekê textor lotikek lêxistiye û piştre jî perde dirûtîye qerdeşim” û xwe ji dora tenûrê didan alî.

Axir, perda keçkanîya Alîna Percea xanim di 10 hezar poundî de teqinî û nebû 11.

Îcar heta ehmeqekî xwedê lê rast bê û di qorzîkek reş û tarî de wê perdê çîrvîrî hev bike, wê aqilê Percea xanimê jî bê serê wê ellawekîl....

Yan na, heta serê mero li dîwêr nekeve meriv biaqil nabe law, wîî!

Ciwan Haco dîsa ket ser zikê wê

Tacdîn Baran- 08/03/09- Almanya- KOMKARê di 7ê Adarê de (yanî doh) li bajarê Wuppertal a Almanya 30 salîya xwe pîroz kir û got;“Bi sê telaqan ji vê fersendê xweştir fersend tuneye, hem ezê 30 salîya xwe pîroz bikim û hem jî ezê Newrozê pîroz bikim. Ezê ji ku li benda 21ê Adarê bisekinim loooo“ û bi kevirekî du çûk kujtin.

Welhasil, di şevê de general û serekerkanên KOMKAR û HAK-PARê hatibûn û dê weledê xwe davêt. Lotikvanên wek Şivan Herûwer, Ciwan Hechecîk, Çopî, Mîkaîl Ezraîl û çend melkemot û melayîketên din beşdar bûn. Lê xwedê heye, lotika herî xweş Ciwan Haco avêt.

Hecî Ciwan Haco bi strana „dil ketmê dil ket mê, şeva pêşî dil ketmê. Serê memka xwê daye, ez ketim ser zikê wê. Me hevdu gindirand, bû qurqura rovyên wê“ tir ji mêvanan berda.  Stran ewqasî seksî got ku girêza devê mêvanan metrokê dirêj bû, doxîn li wan sist bû û derpîyê wan şil û pil bû. Hetta piştî vê strana erotîk, millet êrîşî avdestxanê kir û rê di avdestxanê de nema. Ê ji xwe berda, ê derpî dagirt û ê girêza dora devê xwe paqij kir. Ewqasî ku strana Hecî Ciwan qûn li mêvanan qetand.

Lê hinek mêvanan jî dixwest hêk û bacana bavêjin serê Ciwan Haco û digotin:“Wîî, kuro em xwedî jin û namûs in. Evê pozmezin çawa di vê şevê de behsa memik û zik û piştê dike law, waweylê“ û rexne li KOMKARê digirtin ku carek din pozmezinê mala Haco neyne şevên xwe.

Welhasil, virde wêde nizanim, lê KOMKARê lotikek qirase avêt.

Her çiqasî hatina şevê bi piranî ket bêrîka humermendên çavbirçî jî, lê KOMKAR dîsa birçî birçî li ser dûvê xwe rûnişt, wek „Zugurt Axa“ toz li axatîya xwe dananî û navek ji navê Hisênkê Omerî mezintir bi dû xwe xist wesselam.

Wille heyran te kir tirrrrrrr!

Tacdîn Baran-08/02/09- Almanya- Stranbêjê popê Tîm Petras ê Alman, di 16 salîya xwe de zayenda xwe guhert û xwe kir jin. Petrasê ku ji zaroktîya xwe de lê ranedibû û meyla wî li ser keç û jinan hebû, dermanên hormonî bikar tanî û di 16 salîya xwe de giha miradê xwe, xiyarê xwe jêkir, kunek di xwe de vekir û bû yekem transseksuela ciwan. Piştî ku mêro xwe kir jin, îcar navê xwe jî kir Kîm.

Kîm xanim ji rojnameyên Alman re dgotiye:“Ofyannnnnnn, ez ji wî xiyarê çermolaqî xelas bûm lo. Ê ji xwe li min ranedibû û parçeyekî zêde bû, hema bela bi qulekê be û ne bi xiyarekî sisto-misto be“ filan û fîstan.

Îcar gelî lotikvanan, hûn bi qedrê xwedê û pêxember kin, ev Kurdên me yên ku li wan ranabe û ji sibê heyanî êvarî ji zimandirêjî, fesadî, dijminayî û bêbextîyê pêve tişyekî din nakin, wek Tîm efendî xiyarê xwe di berde jêkin û qulekê di xwe de vekin ne bixêrtir e?

Almanya Lotikek li Tirkan xist

Tacdîn Baran- 22/12/08- Almanya- Wek hûn zanin, dewleta Almanya, Awistirya û Swîsre dixwestin kredîyek nêzîkî milyarek euro bidin Tirkiyê ji bo ku li Hesenkêfê Bendava Ilisûyê çêkin. Helbet bi çêkirina bendavê (barajê) wê Hesenkêf û gundên derûdora wê di bin avê de bimana û ji dîrokê winda bibûna. Ji xwe armancek ji çêkirina vê bendavê jî windakirin û tunekirina Hesenkêf û dîroka Kurdistanê bû.

Dewleta Tirko naxwaze tu berhem û delîlên ku dîroka Kurdan piştrast dike li ser ruyê erdê bihêle. Ji ber vê jî Tirkan xwest bi tunekirina Hesenkêfê dest bi qetlîama dîroka Kurdan bikin û bi bahaneya avakirina bendava Ilisûyê milyarek euro kredî ji dewletên Ewrûpî bistînin. Helbet milyarek euro pereyek pir û pir e. Çavê wan lê bû nîvê peran têxin bêrîka xwe û bi nêvîyê din jî Hesenkêfê û dîroka Kurdan ji holê rakin.

Welhasil, xwedê û pêxember ji Komeleyên Paraztina xweristê razî be. Dibêjin hingî van komelan mîrkutên xwe li serê dewleta Almanya xistine û gotine “Tirk barbar in, hirç û hov in, dixwazin bi tunekirina Hesenkêfê dîrokekê tune bikin qerdeşim, ma hûn kor in oxlim” û rayedarên dewleta Alman gêjo-mêjo kirine.

Îcar rayedarek ji wezaretên Almanya bi navê Erîch Stather, ji rojnama Frankfûrter Rûndschaû re gotiye:” Yaw babam, me 180 roj wext daye Tirkan ji bo ku şertên paraztina xweristê bi cîh bînin. Heger ew şertên me bi cîh neynin û xwerista Hesenkêfê neparêzin, ewê bi kîrê me bigrin û qirûşekî ji bo dermanê çavan jî ji me nastînin” filan û fîstan.

Welhasilî kelam, dewleta Alman niha kredîya ku wê bidaya Tirkan sekinandiye.

 Û Tirk?

Tirkan jî pê girt û di ser xirrê kalkê min Seroxan re hatin û hûn sax!

Şivanê me vedigere welatê xwe „Turkîye“.

Tacdîn Baran- 16/12/08- Almanya- Televizyona Tirk TRT8 serê salê dest bi lotikên Kurdî dike û lotikvanê me Şivan Perwer xistiye lîsta xwe. Dibêjin xwedêgiravî parlamenterên di nava AKP de jina xwe ji xwe berdane û gotine.“Bi sê telaqên jinberdanê, heger Şivan Perwer neyê di TRT8 de nexebite, em qebûl nakin qerdeşim“ û doz li rayedarên TRT kirine ku Şivan Perwer dawetî vekirina TRT8 bikin.

Li ser vê lotikê, Şivanê me jî rabû daxuyanîyek qirase, daxuyanîyek wek „lempa kesk a trafîkê“ belav kir û destê xwe ji dewleta Tirk re hejand. Piştî gotinên şahîk, germik û nermik, Şivanê me di daxuyanîya xwe de Kurdistan-Murdistan ji bîra kir û „Turkîye“ wek welatê xwe bi nav kir.  

Şivanê me di dawîya daxuyanîya xwe de dibêje:“ Vegera Şivan Perwer a Tirkiyê, yanî vegera welatê wî, bi Weqfa Çand a Şivan Perwer û Şîrketa Çanda Şivan ve girêdayî ye. Ji bo vegerê alîkarî û hevkarîya her dezgehekê wê me bextewar bike“ filan û fîstan.

Welhasilî kelam, serok û siyasetmedarên me dibêjin „Tirkîye, Tirkiyetî, Yekîtîya sînorê Tirkiyê“ filan û jehr û ziqûm. Sosyalîstên me dibêjin „Xelklerin qerdeşlîxî“, misilmanên me dibêjin „Ji xwe misilman birayên hev in canim, ji me re çi Kurdistan-Murdistan, ellah û ekber“. Şivanê me mabû wa wî jî dest bi lotikên biratîya cewrikên Asenayê, biratîya Tirk û Kurdan kir û navê welatê xwe kir „Turkîye“.

Helbet vegera Tirkiyê maf û heqê Şivan Perwere jî. Belkî ji her kesî zêdetir mafê wî ye. Lê Şivanê ku wextekî bi strana „Lo me çi kir me çi kir, me xwelî li serê xwe kir“ pirça serê hinekan diweşand, wê çi stranê li ser vegera xwe û welatê xwe Tirkiyê bêje ciyê meraqê ye.

De a bi xêr.

Hêvîdarim wê Şivanê me di TRT8 de bibe xwedî meqam û gotin û xizmetek baş ji çanda Kurdî re bike. Lê ku ew jî wek Rojîna Omerî danekeve xişxişê û dest bi çêkirina klîpên Tirkî jî neke başe.  

Wey maşelle, kûçik jî bûn xwedîyê otêlên pênc stêrk

Tacdîn Baran- 11/12/08-Almanya- Ev Ewrûpî mirovin ecêb in. Qîmet û qedrê ku didin heywanan, bi taybet kûçikan, nadin mirovên wek min û we.

Dibêjin xuşk û brayên bi navê Sabîne û Thomas Gerteistê Alman, li bajarê Munîhê devera Freîsîngê otêlek pênc stêrk ji bo kûçikan ava kirine û wektî ji kêfan re bifirin. Otêla pênc stêrk ha, pekk!

Dibêjin wê navê otêla pênc stêrk „Canîs Resort“ be. Xwedêgiravî wê kûçikên dinyayê îcar di vê otêla pênc stêrk de lotikan bavêjin û li ser doşek û balîfên nermik cewrikên xwe bînin dinyayê. Herweha herdu xuşk û bra dixwazin li seranserî Almanya 15 otêlên pênc stêrk têxin xizmeta kûçikan û xizmeta cemeeta kûçikan bikin. Wê her çûkikek xwedîyê odeyek 45 metrekare be. Wê di otêlê de serşok, avdestxane, dîsco, bar û xwarinxane jî hebin ku kûçik karibin  li gora dilê xwe têde biewtin û tir û fissan bikin. Şeva otêlê di navbera 65-80 euroyî de ye.

Îcar qurban, Kurdên ku xwedî kûçik bin û bûbin wek Almanan, bila dilê kûçikên xwe nehêlin û wan ji nîmetên vê otêla pênc stêrk mehrûm nekin.

Çawa be me xêr ji jiyana xwe nedît û em di otêlên pênc stêrk de raneketin. Qe nebe bila seg û kûçikên me di van otêlên pênc stêrk de bibin mîr û wezîr û bi azadî tir û fissan bikin.

Aferîn Cem beg aferîn!

Tacdîn Baran- 24/11/08- Almanya- Hevserokê Partîya Keskan Cem Ozdemîrê Tirk, di hevpeyvîna xwe a bi rojnama Bîld ê re çend lotikên Tirkane avêtin. Cem Ozdemîr efendî di hevpeyvîna xwe de doza perwerdeya zimanê Tirkî li dewleta Alman kir û xwest ku zimanê Tirkî jî bibe zimanê xwendin û nivîsandinê.

     Îcar hinek malperên me lotikên paşûpêşkî davêjin, xwa aciz dikin û dibêjin.“Peeekkkkk, kuro Ozdemîro, çima tu doza perwerdeya bi zimanê Kurdî jî naki oxlim“ û rebeno didin ber lotik û pehînên bergîlkî.

Yaw qerdeşim, ma serê Ozdemîr ê Tirk bi zimanê Kurdî dêşe? Ma xwestina perwerdeya bi zimanê Kurdî wezîfa wî ye yan wezîfa Kurda ye? Ma di parlamento û beledîyên Almanya de Kurd tunene? Belê. Ma bîra doza perwerdeya zimanê Kurdî nabin? Belê. Ma nizanin nasnama milletekî zimanê wî ye? Belê. Ma li Almanya milyonek Kurd najîn? Belê.

   Êêêêêê? Çima em xwelîyê li serê xwe û 101 bavê xwe nakin, doza perwerda zimanê Kurdî li dezgehên Alman nakin, ranabin ser pîyan, dernakevin kolanan û xwedî li nasnama xwe dernakevin qerdeşim?

   Çima wê Cem Ozdemîr doza perwerda zimanê Kurdî bike cîgerlerim, ma Kurdên Almanya ji sedî 75-80 ên wan ne bi Tirkî diaxivin? Ma go Kurd li qûna xwe xwedî dernekevin, serê Tirkan bi zimanê me û nasnama me ketiye babam, hella hellaa ya siphan ella!

   Law aferîn Cem Ozdemîr beg aferîn. Bi telaqê bê fitû tu kurê bavê xwe yi û xelas!

Tiirrrrr li bin qûna Kurdên go qaşo di parlamentoya Almanya û Ewrûpa de parlamenterin û zîtirkan didin xwe, tirrrrrrrr…..  

----------------------------------------------

Qenc û xweş kirin

Tacdîn Baran- 16/10/08- Frankfûrt- Lotikxane herdem dibêje “Heta civaka Kurd û Tirk nebe dijminê hev, heta Kurd û Tirk silavê ji hev qut nekin, heta Kurd û Tirk wek Cihû û Filistînîyan hevdu wek dijmin nebînin, wê serê me Kurdan her di nava qûmê de û qûna me jî belbelotî be. Bila tu Kurdek xwe bi gotinên wek “bratîya Kurd û Tirk nexapînin”.

Welhasil, di dinyayê de tu çapemenî û medya wek a Tirk bêbav, dêqehp û provokator tuneye. Çi provokasyon û kujtin li Tirkiyê û Kurdistanê bibin, ji sedî 95 ê wan medya Tirk dibe sebeb.

Piştî ku medya dewşîrmeyan antîpropaganda fûara Frankfûrtê û standa Kurdan kir, dibêjin bîjîyên dêlegura Asenayê êrîş birine ser standa Kurdan û nexşeya Kurdistanê çirandine.

Ê qenc û xweş kirin.

 Li Almanya zêdeyî milyonek Kurd dijîn. Yanî milyonek Kurdên ku nehêjane pîvazek xerabe. Ê başe, ma Kurdên xwelîliser nizanin ku Tirk fersendê bibînin wê êrîşî standa wan bikin cîgerlerim? Ma hîna Tirk nasnekirine?

Axir, bîjîyan êrîşî standa Kurdan kir û nexşeya Kurdistanê çirandin. Qenc û xweş kirin. Heta em Kurd ev bêxîret û pozneşewat bin, wê Tirk di qûna me nin jî û hûn sax!

------------------

Bênamûso 1 milyon euro da qehpika Tirk

Tacdîn Baran- 15/10/08- Almanya- Jinika Tirk Feyza Z li bajarê Ûlm ê qehpîtîyê dike, yanî qehpejin e. Midurê Daîra Alîkarîya Avedanîyê Helmût W dil dikeve qehpika Tirk Feyza Z. Mêro radibe 581 hezar euro ji qasa dewletê û ê mayî jî ji bêrîka xwe dide Feyza xanim û Feyza xanim jî bi wan peran li bajarê Kemptenê kerxaneyek qirase bi navê „Haus 4“ ava dike.

   Welhasil, piştî kerxana wê li pataxê dikeve (top davêje), Feyza Z vedigere Tirkiyê û li Tirkiyê îcar dest bi qehpîtîya xwe dike.

Niha dewleta Alman Helmût efendî daye mehkemê û dibêje: „Te evqas pere dan qehpika Tirk, em virde wêde nizanin, tu van peran ji qu…diya xwe derdixi, qûna xwe didi, çi diki bike lê perê dewletê paşde bide me“.

Helmût efendî jî gotiye: „ Min ji wê dêlika Tirk hez kir. Lotikên wê wek lotikên ker û bergîlan xurt bûn. Ez bi xwe ve zeliqandim û kirim wek mirîşka gêj“ filan û fîstan.

Ez serê we neêşînim, hay ji xwe û jinên Tirk hebin qerdeşim. Bi ellawekîl kesê ku bi Tirkan ve bizeliqin, wê ji rebenê Helmût xerabtir bê serê wan û xelas!