Lotikxane    

           <<  Magazîn, henek, gilî û gazin  >>

Bi tirşikê virikî bûn, dest avêtin firşikê

Ehmed Beyan-26/07/07-Enqere- Belê, hilbijartin hat û derbas jî bû. Kasimpaşalî Receb hemi partîyên Tirkiyê dan ber lotik û pehînên bergîlkî û bi serê xwe bû mîr û wezîr. Tiştek balkêşe ku ji dema Ednan Menderes û heta niha, ev cara duyem e ku partîyek bi serê xwe dibe desthilatdar û cara duyem rayên xwe zêdetir dike.

   Helbet Recebo û partîya wî kêm yan zêde tiştên baş kirin û çend lotikên demokratîk avêtin derûdorê. Jibo berjewendîya dewleta xwe be jî, hinekî çavê Yekîtîya Ewrûpayê bi herîyê seyand û piçekî dilê Kurdan jî xweş kir. Lê helbet ev çend lotikên seyandî têra me Kurdan nakin, lê mixabin ji ber ku em Kurd di meydanê de tunene û hefsarê me ketiye destê Demokratîk Cimhûrîyetçîyan, qedera me di navbera herdu lêvên Îmralîyê de maye û wek mirîşka gêj li me hatiye.

   Werhasil, Kurd jî ne bêaqilin haaaa! Erê ji bêçaretî dengê xwe nakin, lê dibînin û gava dem bê helwesta xwe jî datînin. Dibêjin 20-30 milyon Kurd li Tirkiyê û Kurdistanê dijîn. 20-30 milyon!!!!!!?????? Êêêêêê? DTP çend ray girtin? 1.04.910 (milyonek û çar hezar û 900 û 10 ray). Yanî, riba riba Kurdên bakur. Ev jî tê vê maneyê ku Kurdên bakur êdî ji xwarina tirşikê têr bûne û dest avêtine firşika AKP. Ê ji xwe zêde ferqek mezin di navbera daxwaza herdu alîyan de nemaye. Herdu alî jî Demokratîk Cimhûrîyetê diparêzin û herdu alî jî pesnê Mistoyê Kor didin, Kemalîzmê diparêzin û li dijî “Neteweparêzîyê-Îlkermîllîyetçîtî” ne.

   Werhasilî kelam, ez serê we neêşînim û dilê we reş nekim, heger ez hindik û rindik bêjim; Kurdan dît ku doz û armancek Kurd û Kurdistanî nemaye. Mixabin qedera Kurdên bakur bi qedera Îmralîyê ve hatiye girêdan û ew jî li gora xwe tevna xwe dirêse. Geh jehrî dikeve, geh laşê wî duxre û geh jî radyoya wî xera dibe. Ev jî dibin pirsgirêkên netewî, pirsgirêkên ku gerîlla karibin xwe di ber de bidin kujtin.

   Haaaa, berî go ez ji bîr bikim lo, ka digotin 3 milyon Kurd îmze kirine û gotine “Ocalan îrada me ye?”  Birastî ew 3 milyon Kurd bi ku de çûn? Ma go di şûna milyonek ray de wan sê milyonan ray bida DTP û di şûna 23 wekîlan de 69 wekîl bişandina meclîsa Virqo ne çêtir bû gelo? Yaaaaa brakoooo! Di vir de jî dixuye ku Kurdayetî ji qirikê û bi jor de ye û êdî Kurd ji xwarina tirşikê virikî bûne wesselam!

   De bila dîsa Xwedê alîkarê DTP û çend Kurdên welatperwer be rebbî!