Malperek bê sansûr e

Malperek bê sansûr e, hay ji xwe hebin!

info@lotikxane.com

Îroj li cîhanê û nemaze jî li Rojhilata Navîn pêvajoyeke nû peyda bûye ku ji bo guhartinên mezin û nehêlana neheqîyên dîrokî rê hatiye vekirin. Ev pêvajoya hanê pêvajoyeke fersendan e û ji bo gelek etnîsîteyan û herweha ji bo neteweyê kurd jî pêvajoyeke qederguhêr e. Di vê pêvajoyê de bi pêkanîna hêvîyên neteweyekî re, xewnên etnîsîteyên din jî rast digerin ku qedera wan bi xwe jî bi pêngav û serketinên kurdan ve hatiye girêdan. Loma em ne bi tenê bi destketîyên xwe yên neteweyî serbilind in, herweha bi bidestxistin û bikaranîna maf û azadîyên hemû etnîseteyên li Başûrê Kurdistanê jî serbilind in û ji bo hewildanên berfirehtirkirin û xurttirkirina van maf û azadîyan jî giringîya amadekirina îmkanan û piştgirîyeke xurt tînin zimanî. Divê bête dîyarkirin ku ne neteweyê kurd û ne jî tu etnîsîteyên Başûr di tu demên dîrokê de, bi maf û azadîyên xwe ew qasî şad nebûne û ji bo pêşerojeke ewle ew qasî hêvîdar nebûne.

Neteweyê kurd ji bo xurtkirin û ewlekirina desthilata xwe û rizgarkirina hemû deverên başûrê welatî gihaye qonaxeke pir giring. Di vê qonaxê de, em dibînin ku îradeya neteweyî bi daxwaza bicîkirina madeya 140î, şertên pêkanîna wesîyeta pêşîyên me amade dike ku dê pêşeroja me ewletir bike. Ji ber wê wesîyetê ye ku îroj kurd hemû bi hevdu re dibêjin “Kerkûk dilê Kurdistanê ye” û ji ber wê helwêsta dîrokî û neteweyî ya biistiqrar e ku îroj herkes xwe bihêztir û bihêvîtir dibîne.

Ji ber sedemên dîyarkirî, neteweyê kurd di pêvajoyeke qederguhêr re derbas dibe. Ev 15 sal in ku kurd li beşekî welatê xwe desthilatdar in û bi kêmanî li wî beşî ji bo nehêlana neheqîyeke dîrokî bi îmkanên peydakirî di nav kefteleftekê de ne. Lê di vê pêvajoya qederguhêr de roj tune ye ku gef li hebûna kurdan, li maf û azadîyên wan û herweha li deskeftîyên wan nayên xwarin. Her ku li quncikeke welatê me kulîlkek dibişkive û bihar xwe amade dike ku hêdî hêdî bi rengînîya xwe bi kurdan re bibişire, hingê çavnebarîya dorhêlê, gef û êrişên wê yên piralî jî bêtir dibin.

Îroj ev gef û êriş di pêşengîya Tirkîyeyê de ji her demê bêtir xuya dibin. Lê helwêsta serokê Kurdistanê birêz Mesud Barzanîyî ya ku ji bo neteweyê kurd xeteke zelal nîşan dide û li hemû alîyên welatê me dibe sedema coşeke mezin û hisên neteweyî digihîne bandevê jî wek panzehîra van gef û êrişan fonksîyonê dilîze.

Em, kesên ku navên wan li binê vê daxuyanîyê ne, dîyar dikin ku piştgirîya helwêsta serokê Kurdistanê dikin û li dijî hemû gef û awayên destdirêjîya dewletên herêmê ne ku hertim dixwazin çavsorîyan li kurdan bikin û hertim li dijî azadî, aramî û aştîya navçeyê ne. Em piştgirîya peyivên birêz Barzanîyî dikin ku dibêje; “Em tehdîdê li tu kesî nakin û tehdîdê ji tu kesî jî qebûl nakin. Em destê xwe naxin nav karûbarên hinekên din û vê yekê ji hinekên din jî qebûl nakin.”

Em jî dibêjin ku “Heqê tu dewletên biyanî tê de nîne ku xwe tevlî meseleya Kerkûkê bikin”. Em jî dibêjin ku “ji aliyê tarîxî û cografî ve nasnameya Kerkûkê kurdistanî ye” û “Her midaxeleyeke ku bixwaze rê li ber bicihkirina madeya 140î bigire dê bibe sebeba felaketa herî mezin” û hêvî dikin ku ev mesele tu caran negihêje qonaxeke weha.

Em nemaze heqaretên ji alîyê berpirsîyarên Tirkîyeyê yên ku li birêveberên kurdan û bi taybetî jî li şexsîyeta serokê Kurdistanê tên kirin û destdirêjîya wan a ku di van rojên dawîyê de bi awayekî nedîtî xuya dibe bi tundî rûreş dikin û herweha bale dikişîne ser uslûba piranîya medyaya tirk ku di pirsa maf û azadîyên gelê kurd û daxwazên wan ên meşrû de “qerqûdeyên xwe yên biapolet” dîsan derdixînin meydanê.

Em bangî hemû hevwelatîyên kurd dikin û dibêjin ku dev ji hişyarbûna xwe bernedin û herweha bawerîya xwe dîyar bikin ku neteweyê kurd dê tu carî destûrê nede pêkanîna wan planan ku îradeya kurdan ya meşrû paşçav dikin.