Firokewanî kiştukalî Kurdistan:

Le amade başîdan bo rûberûbûnewey hemû derd û afatêkî kiştukalî

Kiştukal binemay serekî aborî hemû wilatêke, le Kurdistanî xoşmanda diwa be duway raperîn û dananî planî stratîjî wezaretî kiştukal bo pêdaçûnewe le girift û tegerekanî berdem pêşkewtinî em kerte zînduwe, hewl û koşekan hemîşe be arastey bûjandinewey em binemaye bûn, le nawbirdin û qelaçokirdinî afat û derdu nexoşiyekan berhemî kiştukal yekêke le bernamey stratîjî em wezarete, diyare le nawbirdinî em derdaneş pişt be amêr û hokarî pêşkewtuwî zanist debestêt. Boye firokewanî kiştukalî rûyekî dîkey em hewlaneye.

ûrey berz û sûrbûnî berdewam

Le 18.2.2007 û ber le salêk be destpêşxerî wezaretî kiştukalî herêmî Kurdistan û bo yekem car le mêjuwî em wezarete û le ser astî Êraq be giştî xulêk bo pêgeyandinî firokewananî kiştukal le berêweberayetî firokewanî kiştukal le şarî Silêmanî kirayewe lem maweyeda twanra 18 endazyarî kiştukal le kuran û keçan le xulêkî çirupirî tîorî û praktîkîda le ser çoniyetî firîn be firoke beşdarî biken lem maweyeşda bo yekem car jimareyek lem firokewanane twaniyan be asmanî Kurdistanda bifirin û ew xewney heyane bîhênine dî.

Afretî Kurd le berdem ezmûnêkî nuwêda

Le beyaniyekî sardî şarî Silêmanî û le rojî 24.1.2008 da sercem kenalekan û medyakanî Kurdistan le çawerwanî firînî firokekanda bûn, le firokxaney kiştukalî le Erbet nizîk Silêmanî, maşênî yekem firoke beger kewt, Xatû Sozan Mihemed derçuwî kolejî kiştukalî zankoy Silêmanî be yawerî rahêner Eqîl Beyat serkewte naw firokeke, hemûman waman dezanî ke renge bişlejê û şerm daybigirê, belam be sûrbûn û hêzu twanawe, duway royiştinî bo çend metrêk le zewî firokexaneke, berew asman berz bûwewe. Duway ewey mawey 20 xulek beser deverekeda surayewe, înca her le gel dabezînda yekser ruwî pirsiyarman lê kird:

* Eme yekem carte be asmanda defirît?

- Eme (11) emîn care, tenya dûcar yan sê carî dîkem mawe, ew kat rahênerekem biryar dedat bo diwacar leser derçûnim û tiwanistim bo firokewanî, sebaret be hestî Sozanxan le katî firînda gutî:

madamekî be arezuwî xom hatûmete em xule, supasî wezaretî kiştukal dekem bo rexsandinî em hele, hawkat le xo radîtinî berdewamim bo serkewtin lem kareda, boye em kare be erkêkî nîştîmanî û neteweyî dezanim ke xizmetî Kurdistanî pê bikem.

Endazyar Salim Cefer, xelkî Dihoke û derçuwî kolêjî kiştukale, yekemî ser xulekeye, ewîş le duwem forokeda be asmanda sûrayewe û supasguzarî xoy bo wezaret û berêweberayetî firokewanî kiştukal derbirî ke be piştgîrî û handanî berdewam twaniyan astî fêrbûn û zanyarî firîn lay min û hemû hawrêkanim berz bikenewe.

Sebaret be progiramî xwêndinîş rûnîkirdewe: her çende xwêndin be zimanî Îngilîzî û Erebî bû, belam êmey endazyar twanay zanînî em dû zimaneman heye û hîç giriftêk lem ruwewe nehatote berdemman.

Destpêşxerî û bedî hatinî xewn

Yekem afret le firokewanan ke bo yekem car be asmanî şarî Silêmanîda surayewe, Samane Umer bû, ke em xuley be serkewtuwî tewawkirduwe, daway le afretanî Kurd kird ke rû lem taqîkirdineweye biken û lem barewe xizmetî wilatekeyan biken.

Emeşî bo ewe gerandewe ke keçan û kuran le sûrbûn û koş û hewlî çespandinî twana û lêhatuwîda yeksanin, êsta katî eweye be hemû layek xizmetî Kurdistan bikeyn.

- Şadan Cemalî hawrêyî Samaneş le lay xoyewe gutî: katê nûsrawman bo hat ke xulêkî lem şêweye dekirêtewe ber le hawrêyanî kur, min yekem kes bûm nawî xom nûsî û peywendîm pêwekird. Êstaş be çawî xotan debînin, çon lem ezmûneda serkewtûbûm.

Firokewanan amaden bo raperandinî erkekaniyan

Berêz Newroz Ebdulqadir berêweberî firokewanî kiştukal le wezaretî kiştukalda ke serpereştiyarî xulekeşe sebaret bem ezmûne rûnîkirdewe, ke bîrokey kirdinewey xuleke bo berêz Ebdulezîz Teyib wezîrî kiştukal degerêtewe duway rexsandinî rêwşuwênî guncaw (78) endazyar hatine xuleke, le layen lîjneyekî taybetewe pişknîn kira, yekêk lew mercaneş ewebû ke nabê beşdar bû, temenî le 28 sal ziyatir bêt, boye 22 yan serkewtûbûn, le 18.2.2007 da xuleke be xwêndinî programî teorî destî pêkird ke 6 mang berdewam bû, 15 kesiyan twaniyan be serkewtuwî em xule tewaw biken.

Înca çûne naw xwêndinî programî praktîkî, berêweberayetî firokewanî kiştukal 5 firokey kiştukalî heye, wezaretîş be supasewe be niyazî kirînî jimareyekî dîkeye le corî Hêlîkopterî pêşkewtû bo bekarhênaniyan le rişandinî berûbûm be mebestî le nawbirdinî derdu nexoşî kiştukalî, le welamî pirsiyarêkda sebaret bewaney ke le xule derneçûn, gutî: ew endazyarane wek stafî teknîkî û çawdêrî firîn û kontrol le lay xoman demêninewe û sûdiyan lê werdegirîn, herweha be niyazîn le ayindeyekî nizîkda eger boman rexsaw helumercî teknîkî le barbû xulî dîkeş bo pêgeyandinî firokewanan bikeynewe, diyare ew firokewananeş ke êsta pêgeyiştûne, eger her haletêkî derdu afatî kiştukalî le her parêzgayekî Kurdistan hate pêşewe, beşdarî deken û bepêyî twana xizmetî kertî kiştukalî Kurdistan deken.

Hevpeyvîn: Behadîn Celal - Silêmanî

Çavkanî: Rojnama Xebat / Hemdem.com