Hîp-popa Kurdan û ala Kurdistanê

Berzan Berwarî-17/12/07-Elmanya- Me wek xebatkarên Lotikxanê biryarek standibû ku emê di van demên zîz de rexneyên giran li tu kesayet û rêxistinên  Kurdan negirin. Lê heke bûyer û doz ya şeref û sembola welat be, divê herkes li dij raweste û rexneya ku şennê (laiq ) kesên bi şeref in, li wan bike.

 Ciwanên Kurd li hev dicivin  û dibêjin: Li dewsa em herin dîsko û lotikxanên Almanan û li ber muzîka Almanî lotikan bavêjin, em ji xwe re cîyekî bigirin, ban hûnermendên Kurd bikin û lotikên Kurdewarî bavêjin. Û jibo lotikhavêtinê jî 14.12.2007. Roja înê  li bajarê Koln a Almanya, li Euro salê  digirin. Hunermend Serhedo, Rizgar, Ayhan, Kawa, Sîpan û Dîno li şeva ciwanên Kurdistan amade dibin. Çend xortên başûr  ala Kurdistanê li ser dikê dadiliqînin. Paşê çend apoyî hatin Ala Kurdistanê anîn xwar û ala PKK ê û resmê Ocalan li şûna wê dadiliqînin.Çend kes dixwazin li wan xin û ala PKKê bînin xwar, lê berpirsê ciwanên başûr nahêle û dibê: “Ew dixwazin şevê xirabikin û ciwanan ji hev belavkin da ku di navbera ciwanan de dan û sitandin û yêkîtî çênebe. Ev lîztikên dijmin in û divê em neyên van lîstikan”. Bi vî awayî xortan dide sekinandin.

Ev bûn 180 salin bê rawestan em şerê dijmin dikin . Gundên me xirabe dibin. Xwîna me wek coyan diherike. Zarên me di zikê dêya wan de tên singû kirin.Qetlîamên wek Helepçe, Dêrsim, Agirî, Palo û bi sedan wekî wan li me dibin. Em derbeder li dinyayê belav dibin û bi sedan tiştên din tên serên me. Ma ev hemi jibo çi ne? Ma ne jibo ku em jî wek milletên din serfiraz bin û ala xwe li welat û serê çîyayên xwe bidin pêlvedan? Ala her milletekî şeref, namûs û sembola wî milletî ye. Her millet xwe ji bo ala xwe dide kuştin . Lê hûn werin ala milletekî ji ser dikê daxin û di şûna wê de ala partîyekê û wêneyê kesekî ku ev 30 salin bûye bela serê milletê Kurd di şûna wê de daliqînin!? Ma ev karê aqila ye? Li welatê xwe em ji ber dijmin nikarin ala xwe bilind bikin. Lewre me, ala xwe li ser dilê xwe kolaye. Li derveyî welêt dijmin bi me nikarin. Em di mal û komel, şahî û meşên xwe de, alên xwe bilind dikin. Lê mixabin li deverên ku dijmin bi me nikarin, meramên xwe bi kesên cahil û xeşîmên Kurd didin kirin.

Kurdino! Ala xwe, li şeref û sembola welatê xwe xwedî derkevin! Kî dibe bila bibe, gava ala we daxist, qet û qet li ronahîya çavê wan nenêrin û lotikekê li wan xin. Ji bîr nekin, ew Kurdên ku nahêlin Ala Kurdistan bilind bibe,wê dadixin jêr, pêpes dikin, didirînin û  dişewitînin, kesên xwefiroş û lîztokên destê dijminên Kurd in û hûn sax!