Îlkel Milliyetçî » yên zimanê kurdî û enternasyonalîstên kurd (!)
 Kurdistan Post-17.Eylül 2006 

Jîr Dilovan

 jirdilovan@hotmail.com

Ev demeke dirêje ku di nava dudiliyekê de li ber xwe didim... Gelo ez vê mijarê binivîsim an nenivîsim? Lê hinek bûyer û rûdanên balkêş ez mecbûr kirim ku binivîsim.

Em kampanya li ser kampanyayan li dar dixin, em daxuyaniyan li ser daxuyaniyan didin û dibêjin : «Zimanê me rûmeta me ye ...» Lê ev ji gotinê û wê de naçe. Mixabin bi xweziyan kesekî ranehiştiye baqên keziyan. Bi gotinên bi vî rengî yên bê hewldan û tevger, em ne xwe bi tenê em gel jî dixapînin. Êdî demeke wisa hatiye ku gel jî hew pênc qurûşan bi gotina me bide.

Bûyer yek : Ez li xwaringeha Televizyona Roj bi hevalan re rûniştîme û firavînê dixwim. Li kêleka min a rastê hevaleke me ya ku bernameya kurdî çêdike û li kêleka din hevalekî me yê ku nûçeyên kurdî pêşkêş dike jî xwarina xwe dixwin. Serê çend xeberan  bi tirkiyeke bêteşe bi hev re diaxivin. Min hêdîka rahişte tepsîka xwarinê û ez çûm li ser maseya li hemberî wan rûniştim. Min xwe negirt û got : «Hûn du bernameçêker û axaftvanên kurdî ne. Bi ser de jî hûn di saziyeke kurdî de dixebitin û bi hezaran kîlometro dûrî Tirkiyeyê ne. Ez wateyekê nadim vê rewşa we!» Keçka me ya nazik çi bersivê bide min baş e : «Ben ilkel milliyetçi degilim» (Ez ne neteweparêza kevneperest im!)

Li gorî keçika me ya bernameçêkera kurdî lê axivgera tirkî, axaftina bi kurdî kevneperestî ye!!!

Bûyer dudo : Hevalê me nivîskar û bernameçêkerê radyoya Dengê Mezopotamya Diyar Botî, beşdarî civînekê dibe. Berî civînê li dalana xanî rûdinin û hinekî diaxivin. Hevalê me Diyar jî mîna min şor e û ji kurdî pê ve li tu zimanê din nabanê. Piştî qasek axaftina bi kurdî, hevalê ku yê civînê bi rê ve bibe, li hevalê me Diyar vedigere û digel kurdiya xwe ya baş jî dibêje : «Heval, artik resmiyete geçelim ve Turkçe konuşalim!»

Li gorî rêveberê me yê hêja axaftina bi tirkî fermî ye lê ya kurdî pûç e!!!

Bûyer sisê : Dîsa em li kafeterya Televîzyona Roj in û ez û hunermend Rotînda diaxivin. Mijar dîsa bû zimanê kurdî û bi carekê axîn ji devê Rotînde bilind bû. Bi axîna xwe re got : «Mamoste karê me zor e! Berî çend rojan me civîna komîsyona çand û hunera kurd li dar xist. Berî civînê min dîtina xwe anî zimên û min got hevalno, em civîneke bi navê çand û hunera kurd çêdikin. Pêwîst e em tenê bi kurdî biaxivin. Bawer dikim di vê dema kampanyaya zimanê kurdî de ev yê hê bêtir watedar be...» Bersiva hunermendekî kurd ê li wira dibe ev : «Sende mi ilkel milliyetçi takimina transfer oldun?» (Tu jî transferî tîma neteweparêzên kevneperest bûyî ?)

Li gor hunermendê kurd ê ku li ser pişta kurdî dijî lê tirkî qajikê devê wî, kesên bi kurdî diaxivin di nava tîma neteweparêzên kevneperest de ne!!!

Heta ku hejmara enternasyonalîstên kurd (!) yên bi vî rengî, ji kurdîaxêvên kevneperest(!) zêdetir be, bi hezaran kampanyayên ku werin lidarxistin jî, vala ye!

Heta ku saziyên me di bin rêveberiya kesên tirkîaxêv de bin jî, pêşketina kurdî ji bîr bikin!!!