Agahdarîyek ji Lotikxanê

Lotikxane-26/11/07-Kurd di demek pir zîz û hessas re derbas dibin. Dijminên Kurd bi her rê û awayî hewl didin ku Kurdan bera hev din û şerekî navxweyî di navbera wan de derêxin. Ji ber vê, divê Kurd hişyar bin û neyên lîztika dewletên dagîrker.

   Bi taybet divê nivîskar û rewşenbîrên me pêvajoyê baş binirxînin û êrîşî tu alîyên Kurd nekin, alîyekî negrin û nebin dijminê alîyê din. Di demên wilo hessas de her provokasyon karin bên kirin û divê em nekevin xefka dijminên xwe. 

   Gellek kes dixwazin bi nivîsên xwe piştgiriya Lotikxanê bikin. Bê hed û hesab nivîs ji me re tên şandin. Em spasîya wan kes û nivîskaran dikin. Lê ji ber ku gellek kes yek alî difikirin, yan PKK digrin û êrîşî PDK-YNK dikin, yan PDK digrin û êrîşî PKK dikin, em wan naweşînin û rê nadin ku bibin fesad û Beko ewanên navbera partî û dezgehên Kurdî.

  Me gellek caran gotiye û dîsa dibêjin: Em wek Lotikxane dijminatîya kesayet, dezgeh û partîyên Kurdî nakin. Rexneyên dostanî erê lê dijminatî na! Emê rê nedin ku di Lotikxanê de kêfa dijmin li xwe bînin.

  Em hêvîdarin wê ew kes û nivîskarên ku nivîsan ji me re dişînin me fahm bikin û dilê xwe negrin. Êdî tehamula me Kurdan ji dijminatî û şerê navxweyî re nemaye û hûn sax!