Zarokên xwe bi M.Arif bilorînin

Hozan Vitvito-22/08/07-Akademîya Muzîka Kurdî- Niha hûnê bêjin:”Ya starrrrr, ma ev Hozan Vitvito jî nav e gidîîîîî!” û ecêbmayî bimînin. Ê yabo heçê çend gotinan didize û dibe hozan, radibe navekî qirase li xwe dike û xwe dike Ristemê Zal. Hozan Filankes, Hozan Bêvankes, Hozan Teyrê Baz, Hozan Başoke, Hozan Zirne, Hozan Piling, Hozan Fîlo, Hozan Deve, filan û bêvan. Min jî rabû navê xwe kir Hozan Vitvito! Ma qebhete qey? Na!

   Werhasil, em vegerin ser mijara xwe. Dibêjin li Amerîkayê lêkolînek li ser muzîkê çêbûye û derketiye holê ku zarokên muzîka klasîk guhdarî dikin zûtir mezin dibin. Ne tenê mezintir, şarezatir jî dibin û lotikvanên qirase ji wan derdikevin. Dibêjin muzîk bandorek mezin li psîkolojî û tenduristîya bedena insên dike. Hem stresê kêmtir dike, tenduristîya ruhê insên diparêze û hem jî şewqê bi insên re çêdike. Yanî bi gotinek kurt; muzîk ji bedena insên re wek av û xwarinê pêwist e.

   Dibêjin li gora lêkolînê zarokên ku muzîka klasîk (wek a Gerepêtê Xaço, Mihemed Arif Cizrawî, Miradê Kinê, Şakiro, Kawîs Axa ûwd) guhdarî dikin, biaqil, şareza û jîrek dibin. Zarokên ku muzîka rock, rap, hîphop ûwd (wek a Ciwan Haco) guhdarî dikin, dest bi kişandina esrarê dikin, eraqê vedixwin û didin zîtirkan. Zarokên ku muzîka Arabesk yan muzîka bêserûber guhdarî dikin, (wek Îbo Tatlises û gellek hunermendên ku teqlîta wî dikin) dibin lehmecûncî û carna jî kêr û cilêtan li xwe dixin. Zarokên ku muzîka şoreşgerî guhdarî dikin, (wek Şivan Herûwer) carna germ dibin û carna sar dibin.

   Werhasil em serê we neêşînin, îcar heger hûn dixwazin zarokên we şareza û jîrek bin, muzîka klasîka Kurdî bi wan bidin guhdarî kirin. Heger hûn dixwazin zarokên we lotikvan û zîtirkvan bin, muzîka Ciwan Haco bidin guhdar kirin. Heger hûn dixwazin zarokên we bibin lehmecûncî û di serşokên xelkê de bên girtin, muzîka Arabesk bidin guhdarî kirin. Û heger hûn dixwazin zarokên we bibin bombeyên zidî û xwe biteqînin, muzîka Şivan Herûwer bidin guhdarî kirin.

   Lê na ger hûn dixwazin zarokên we hem şoreşger û hem neteweperest bin, şîretên Lotikxanê ji wan re bixwînin. Ma tiştekî din ma heyran?