Şivanê me beşdarî pêşangehan jî dibe

Tacdîn Baran-24/01/08-Elmanya- Dibêjin wê lotikvanê Kurd ê navdar û şandar Şivan Perwer beşdarî pêşangeha pirtûkan a KOMKARê bibe û li bajarê Wuppertalê çend lotikên Elemanî bavêje. Li ser bextê Kurdên Wuppertalê be, hinek dibêjin “wê Şivanê me bi strana Kîne Em dest bi lotikan bike”, hinek dibêjin “de here loooo, wê sedî sed Şivan lê dotmam bêje”, û hinek jî dibêjin “bi telaq me di xewna xwe de dîtiye, wê Şivan Kirîvê bêje” filan û fîstan. Ez serê we neêşînim, wê Şivanê me sedî sed beşdarî pêşangeha KOMKARê bibe, lê wê bistrê yan nestrê ew û tembûra xwe zanin. Ê de berdewamê bixwînin cîgerlerim...

Şivan Perwer di peşangeha pirtûkan ya KOMKARê da

Filîtê Quto-24/01/08- Elmanya-

Hunermendê Kurd yê bi nav û deng Şivan Perwer, beşdarî pêşangeha pirtûkên Kurdî ya KOMKARê dibe. Pêşangeha Pirtûkên Kurdî ya 4., ku Yekîtiya Komelên Kurdistan-KOMKAR di 1-2-3´yê Sibatê li bajarê Wuppertalê amade dike, ji bilî nivîskarên Kurd, her usa xêrhatin li hozanê gewre yê Kurd Şivan Perwer û fonda wî dike.

Fonda Şivan Perwer, ku navenda wê li bajarê Bonnê ye, di berdewamiya pêşangehê da 3 rojan wê standa xwe veke û berhemên xwe raxe. Her usa Şivan Perwer jî wê beşdarî pêşangehê bibe û CD û fotografên xwe îmza bike.

Wek tê zanîn, nivîskar Dr. Eskerê Boyîk, Yilmaz Çamlbel, Mehmet Bayrak jî beşdarî pêşangehê dibin û pirtûkên xwe îmza dikin.

Her usa di pêşangehê da Dr. Îbrahîm Mahmûd li ser hunermendê Kurd yê nemir Yilmaz Guney konferansek pêşkêş dike û fîlmê Yilmaz Guney „Rê“ tê nîşandan û bi beşdariya rojnamevan Oral Çalişlar (Cumhuriyet), Nevzat Karakeçî (Dema Nû) û M. Şefik Oncu (Net-Kurd) wê li ser pirsa çapemeniyê panelek jî di nav bernama pêşangehê da cîh digre.

Wêne û tabloyên nivîskar û wênesaz Arîf Sevînç, ku karê xwe li Amedê didomîne û gerînendeyê giştî yê rojnama Dema Nû ye, wê di pêşangehê da bên raxistin.

Di pêşangehê da her usa, pirtûkên weşanxana KOMKAR, Roja Nû, Deng, Veng, Riya Azadî wê heta di sedî da 50 erzantir bên firotan.