Bimre goştê heywana, bijî goştê insana

Hecî Cimo-03/03/08- Kurdistan- Yaw qardeşim, piştî go min Lotikxane nas kir û bûm mirîdê wê, êdî exlaq û hisûsîyetên min jî hatin guhertin ellawekîl! Ez sê caran çûme mala Xwedê, yanî Hecê. Lê babam, rastî û xweşîya ku min di Lotikxanê de dîtiye, li Siûdî Erebîstanê jî tuneye, wîî! Ma ez rabim piştî vî temenî derewan bikim? Naaaa!

De neyse ez bêm ser mesela xwe û vegetaryanan. Piştî ku min Lotikxane nas kir û ez çav li wan jinikên xweşik ê wek horîyên bihuştê ketim, xwîna min kelya, ez li xortanîya xwe vegeriyam û min simbêl badan. Ji xwe wan model û lotikvanên ku xwe ji Rêxistina Mafê Heywanan (Peta) re tazî dikin henin ya, ewan malik li min şewitandine û ez har û dîn kirime. Bi sê telaqan ez niha bûme wek ciwangeyekî nava garanê û ha ha poş û qiloçan li nogon û çêlekan dixim, wille û bille loo! 

Îcar ez serê we neêşînim, min sûnd xwariye ku ez dev ji xwarina goştê heywana berdim û bibim endamê rêxistina PETA yê.

We go çima?

Yaw canim cîgerim, ma heta goştê wan jinikên xweşik û taze hebin ez qîma xwe bi goştê heywan-meywanan tînim? Ma ez dîn im, wîî!

Na na, min ahd xwariye go bibim endamê PETA yê û bi xanimên PETA yê re lotik û zîtirkan bavêjim. Yan na, ez hew karim her roj tirşikê bixwim brê minooooo!