Ji raya giştî re

Roja 16.12.2007an berdestî sibehê, balafirên cengî yên Artêşa Tirkiyê derbasî nav xaka Başûrê Kurdistanê bûn, li wir hin navçe û gund bombebaran kirin.

Di encama vê bomberankirinê de, li Suredê, Qeletukan, Lewjê û hin gundên derdorê Qendîlê, bi tevahî deh gund, xaniyên sîvîlan û çend jî gomên pez hatin wêrankirin. Jinek şehîd bû û çend kes jî birîndar in.

Em vê êrîşa Tirkiyê, bombebarankirina navçeyên Başûrê Kurdistanê bi tundî şermezar dikin.

Em bala Amerîkayê dikşînin ku ew bi tu şêweyî nehêle ku Tirkiye sînor û asmanê Başûrê Kurdistanê îhlal bike; ji ber ku ew dever di bin parastina Amerikayê û hevpeymanên wê de ne; divê Amerîka vê yekê qebûl neke.

Herweha em bala hikûmeta Îraqê dikşînin ku ew jî berpirsiyariya xwe ya ji bo parastina sînorên Başûrê Kurdistanê bi cîh bîne û nehêle ku Tirkiye careke din êrîşan bibe ser Başûrê Kurdistanê.

Tirkiye PKKê dike hincet, lê ew bi derbasbûna sînoran û bi bombebarankirina welatekî azad careke din jî peymanên navnetewî binpê dike. Hincet çi dibe bila bibe, Turkiye û hîç dewleteke din, ne xwediyê mafê bombebarankirina xaka Başûrê Kurdistanê ne.

Ev êrîşa ku çû ser aramtirîn herêma Îraqa Federal, terororîstên nava Îraqê xurt dike, xwîneke nû û hêvî dide terorîzma navnetewî.

Turkiye kefteleftê dike ku bibe endamê Yekîtiya Ewrûpayê; soza bicîhanîna krîterên demokrasiyê dide. Lê ew bi van êrîşên xwe, hem li Başûrê Kurdistanê û hem jî li Îraqê li hember aştî, aramî û pêşveçûna demokrasiyê astengiyeke mezin derdixe.

Divê Turkiye ji tecrûbeyên xwe jî fêm kiribe ku kêşeya Kurd ne bi tang, top û bombebeyan, lê bi dialog, bi riyên aştî, bi demokrasiyê û bi tedbîrên siyasî çareser dibe.

17.12.2007

- KOMÎTEYA HEVKARÎ YA HÊZÊN SIYASÎ YÊN KURD Û KURDISTANÎ LI SWÊDÊ

 (Ji her çar beşên Kurdistanê, temsîla 21 partî û rêxistinên siyasî dike)

- ÎNSIYATÎVA KURD LI SWÊDÊDÊ

- FEDERASYONA KOMELEYÊN KURDISTANÊ LI SWÊDÊ