Malperek bê sansûr e, hay ji xwe hebin!

info@lotikxane.com

 

 

 

 

 

Rojda Aydin

Ez jî ketim Lotikxanê

 Li ser pêşniyaza hevaleke xwe min Lotikxane nas kir. Berê şaş mam,ev çi nave îcar, Lotikxane!? Berê min got qey hevala min yariyan bi min dike. Lê piştî ez ketim malperê, min dît ku birastî jî Lotikxane ye, rexnexane ye û hema bêjin her tişte. Ji ber ku ez di malbatek neteweperest de mezin bûme, Lotikxanê bala min kişand û xîtabî hestên min jî kir. Ji wê rojê û pê de ez bûme nexweşê Lotikxanê û têde ji xwe re lotikan diavêjim. Hem dikenim, hem rastîya xwe têde dibînim, hem jî carna dilê min bi me dişewite û kelegirî dibim. Dikenim çunkî; têde henekên ku hêdî hêdî ji nava civata me wenda dibin, rastiya civaka Kurd dibînim û ji kul û xeman bidûr dikevim, giraniyê ji ser xwe diavêjim. Rastiya xwe têde dibînim çunkî; rastiya civaka Kurd ev e, henekin, şer e, siyaset e, zimandirêjî ye û gellekên din. Kelegirî dibim çunkî; di Lotikxanê de rastiya civaka xwe, partiyên xwe, kesayetên xwe dibînim û bi halê wan dêşim, li zora min diçe û gellek caran naletê li qedera me tînim.

 Birastî li gora min, malperek bi vî awayî hemareng û hemaheng pêwist bû. Malperek ku têde her awayên nûçe û magazînê hebin, henek hebin, rexnegirtin hebin û pêre nivîsên ku karibe bandorê li hestên neteweperestiya Kurdî bikin hebin. Bi taybet ev ji bo xort û keçên nûhatî, nifşên ku di nava civata biyanî de tê pişavtin û ji hestên neteweperestiya Kurdî bidûr dikeve, pêwistiyek e. Nexasim li Ewrûpa ku xort û keçên me di bin bandora derûdora xwe de dimînin û zimanê xwe zû jibîr dikin, Lotikxane ji bo wan alîkariyek erênî ye. Ez gellek dost û nasan dinasim ku pesnê Lotikxanê didin û bi Kurdiya wê a sivik hêdî hêdî fêrî Kurdî dibin. Ev ciyê şanaziyê ye,xebatek pîroz e. Herweha çendan dinasim jî ku carna rexneyan li Lotikxanê dikin û dibêjin ku hinek resim û zimanekî erotîk bikartîne. Lê ev jî rexneyên normal in û rexneyên dostanî ne. Helbet kesê ku nizanibe erotîzm çiye, yan jî çi maneyê dide, li stranên Kurdî guhdarî nekirine, yan jî di civaka Kurdî de belkî baş nemane. Mabin jî di bin bandora siyasetê de mane û êdî rastiya civaka xwe jibîr kirine. Gava mirov li stranên govend û dawetan, li stranên hunermendên herêmî guhdarî dike, dibîne ku erotîzma mezin di wan stranan de hatine gotin. Ji dev û lêvê jinê bigrin heta bi sîng û beran tev di stranan de hatine zimên, lê tucaran jî kesî xwe nexeyidandiye û li ber wan stranan govend hatiye girtin. Ango; tiştê ez dixwazim bêjim eve ku, civaka Kurd civakek sosyal e, wek hinek civakên Rojhilata navîn ne civakek girtî bi sansûr e. Bi taybet li gellek herêmên Kurdistanê henekên erotîk bûye wek parçeyekî wê civakê. Gellek herêm û gund bi henekên xwe ên erotîk tên naskirin. Hema ji Amedê bigrin û heta biçe başûrê Kurdistanê ev henek û stran hene.

 Birastî tiştê ku zêde ez bi Lotikxanê ve girêdam, rexneyên wê ên erênî ne. Tiştê ku heta niha min dîtiye, Lotikxane rexneyên erênî li hemû kesî digre û dijminatiya tukesî nake. Helbet wê hinek rabin û tehamulî rastiyan û rexneyan nekin, lê ev jî rastiyek civaka me ye, ji ber wê ye ku dibêjin rastî tehl e. Em Kurd hê fêrî demokrasiya navxweyî nebûne. Demokrasiya ku em ji xelkê din re dixwazin di nava me bixwe de bicîh nabe, ev jî jê re dem û kat lazim e.

 Ez bawerim xet û şopa ku xebatkarên Lotikxanê dane ser, rêyek rast e û divê di vê xebata xwe de berdewam bin. Civak bi hebûna xwe, bi qencî û xirabiya xwe, bi şaşî û rastiya xwe civak e. Millet jî wisa ye. Ger mirov karibe hebûn û rastiya civakê li ciyekî kom bike, rastî û qenciya civakê biparêze, şaşî û xirabeyên wê jî rexne bike û sererast bike, wî çaxî xizmetek baş derdikeve holê. Lotikxane bi henekên xwe xizmetê ji çand û kultura Kurdî a mîzahî re dike.Bi Kurdîya xwe xizmeta zimanê Kurdî dike û bi rexneyên xwe jî balê dikşîne ser kêmasiyên civaka Kurd û xizmetê ji rastiyê re dike. Ji ber vê xebata hêja jî ez xebatkarên Lotikxanê pîroz dikim û ezê jî li gor xwe carna bi nivîsên xwe lotikan di Lotikxanê de bavêjim...