Li Kurdistana bakur qezayên trafîkê

Cembelîyê Botî-16/02/08- Colemêrg-

Em dibêjin “li welatê me şerê qirêj heye, gelek kes tên kuştin û birîndarkirin”. Dê werin em li statîstîkan binêrin, ka di şer de yan jî di qezayên trafîkê de pirtir kes tên kuştin û brîndarkirin.

Li gor raporên  statistikên trafîka 2007 an, tenê li rojavayê Kurdistana bakur “Tirk jêre dibêjin Doxû Anadolû “  21 hizar û 19 qeza çêbûne. Di van qezayan de 270 kes mirine û 9513 kes jî birîndar bûne. Îcar we dît neeee! Ka mirî di kîderê de zêdene? Bêgoman ev mirî û brîndar jî beşek ji yên şerê qirêj in.

Kurdên me yên ku ji cih û warê xwe bûne; êdî ne cotkarîyê, ne pezxwedîkirinê ne jî dikarin rêncberîyê bikin. Ew ked û xebat, şerê qirêj ji destê wan standin. Yên ku pez û heywanên xwe firotin, ji neçarî ji xwe re tirimbêl (seyare – erebe) kirîn, da ku bişên hinek petrola qaçax bi wan bikirin û bifroşin an jî barkêşîyê pê bikin. Bi wê hêvîyê bişên debar û risqên zaroyên xwe jê derxin.

 Heta lêre temam û bê qisûr e. 

 Lê ya xelet ewe ku ev biraderên me di rêyên qanûnî de ehlîyetê (îcazet) nastînin.  Piranîya wan bi bertîlan ehlîyetê distînin. Lewma jî qaîdeyên trafîkê nasnakin û dibin sedemên qezayan. Ca ji xwe yên li ser tixûbên Îranê bi firotina çend kîlo  “çortan” hema dibêjin “ du kîlo toz yek otobos” û trimbêlekê dikirin. Ehlîyeta bi bertîl destxistî dikin berîka xwe.  Li ser tirimbêlê dinivîsin “Allaha Emanet” (Emanetî Xudê ) an jî dinîvîsin “Allah Korusun” (Xudê Bistirîne).  Ji boy ku çav lênexin jî çend morikên şîn an jî nalek hespan pê vedikin û derdikevin ser rê.

Êêêêêê brayên ezîz, ez heyrana çavê we , ma hûn nabêjin xwe wê xudê kê ji we biparêzit û kê ji we neparêzit? Heke balefir, tirimbêl, keştî û debabe li ser nivîsîna xudê biparêze meşîyabana, ne hewceyî pîlotan, qaptanan û şofêran bû qurban! Ewê fêrî hajotinê nebana, li malên xwe rûniştibana û gotibana “felekê  kelek“ brayên mino!

Hajotin û qaîdeyên trafîkê baş fêrbibin û paşê hajotvanîyê bikin. Ne bibin sedemên mal, can û seqetbûna xelkê û ne jî bibin sedemên mal, can û seqetbûna xwe. Ji me gotin, hûn dikin an nakin hûn dizanin.