Xaltîka Fatê dest bi lotikan dike

Lotikxane-14/10/07-Ev demek dirêje me digot wê xaltîka me Fatê bê û di Lotikxanê de dest bi lotik û pehînan bike. Lê malxerabê xwe giran kir, giran kir û wek Çiyayê Bagokê ji ciyê xwe neleqiya. Me bi dehan qasid û nûnerên xwe şandin mala wê û doza destpêkirina lotikan lê kir, lê xwedêjêstendê te digot qey kerr û lal e û deng nedibir xwe. Werhasil, piştî danûstendin û bertîlek giran, me xaltîka Fatê qanih kir û em li hev hatin. Me di lihevhatina xwe de peymanek qirase îmze û mohr kir û em vegerîyan mala xwe. Çend xalên peymana me û xaltîka Fatê ev in. Wê xaltîka Fatê rojê:

1-Pakêtek cixara Marlboro ji wanên qûnsor

2-Bi taştê re; semawerek çaya qaçax, kîlok zeytûnên Efrînê, nîvkîlo hingivê Bedlîsê, 250 gram dimsa Mêrdînê û 25 hêkên qelandî

3-Bi firavînê re; 3 mirîşkên heşandî, 15 bacanên sor, 3 serî pîvaz, 10 nanên tenûrê û 25 şûşeyên ava cemidî

4-Bi şîvê re; 5 kîlo goştê berxan, 7 kîlo savar, zebeşek Diyarbekrê, 15 îsotên Ruhayê, 4 kîlo beqlawe û 2 kîlo jî benîyên gwîza

5-Paşîvê; 2 kîlo dendikên zebeşa, nîvkîlo dendikên kundira, semawerek qehwe û şûşek wîskîya Jonny Wolker

6- Her serê mehê; mesrefa himam û serşûştinê, 10 kiras û derpî, 5 cot şekal (pêlav.sol), 25 cot gore, 30 kitan û şerpe

ji Lotikxanê bistîne.

Yanî, mesrefa xaltîka me Fatê li ser me ji mesrefa dewleta Sûrî girantir dibe ellahwekîl! Lê ji ber ku me soza lotikavêtina xaltîka Fatê dabû xwendevanên xwe, me xwe da ber barê wê û stuyê xwe li ber wê kezebşewityê tewand.

Werhasilî kelam, xaltîka me Fatê niha li kera xwe a piştkurmî siwar bûye û ji Mêrdînê berê xwe daye Lotikxanê. Heger sîxurên dewletên dagîrker tu kemîn û dek û dolaban neynin serê xaltîka me û bi saxî û selametî giha Lotikxanê, emê 7 roj û 7 şevan govendê lidarxin û bidin zîtirkan.

De çend rojên din jî bêhna xwe fireh bikin û duakarê xaltîka xwe Fatê bin.