Belê, Mazlûmê me berê xwe da Şama Şerîf û çû tewafa Şêx Ehmed el Colanî ibin Elkaîde ibin el DAÎŞ. Li Şamê bi refîq Colanî re çay û qehweyek vexwar, peymana xwe îmza kir, Colanî hembêz kir û vegerîya Rojava nav hevallerên xwe.
Çûna Mazlûm û îmzakirina peymana Sûrîyeya Ekolojîk û Demokratîk kêfa gelekan anî û hinek jî aciz kirin. Li gor fitne û fesadên siyasî dibêjin, xwedêgoravî wê ev peyman destê Kurdan xurttir bike û di pêşerojê de cok û bendavên firehtir ji wan re veke. Hinek jî dibêjin na wele Mazlûm Kurd û Kurdistan bi pîvazekê firotiye û daxwaza Ocalan û dewleta Tirk bi cîh anîye. Nîqaş û nirxandin didomin. Wê di encamê de çi pelûl ji tûrik derkeve ez jî nizanim.
Axir, hinekan digotin „Mazlûmê me li qantirê siwar bûye û çûye Şamê“, hinekan digotin „na wele bi kerê çûye“, hinekan jî sûnd dixwarin û digotin „bi telaq bi pisiklêt çûye“. Lê piştre hat dîtin ku hemû vir û derew in û tohmetan dixin stuyê generalê me.
Sîxur û ajanên Lotikxanê dan dû vê mijarê û piştî lêkolînek sererd û binerd rastî derxistin holê. Mazlûmê me ne bi qantir, ker û pisiklêt çûbû, Horîyên Amerîkî ew revandibûn û firandibûn Şamê. Û hetta morîkên xewê jî xistibûn guhên wî. Piştî îmzakirina Peymana Lozan û Sykes Pîcotê, dîsa wan horîyên germik û nermik ew vegerandibûn welatê wî Rojhilat û Bakurê Sûrîyeya Ekolojîk û Demokratîk.
Ez serê we neêşînim gurçikno, Mazlûmê me bi saxî 2 horîyên germik û nermik yên Amerîkî misoger kirine. Her du horî di emrê wî de ne û li dora wî dibin perwane. Mazlûmê me wek van oldar û dîndarên kor û doxînsist ne xeyalperest e û nade dû 72 horîyên bihuştê. Dizane ku horîyên rasteqîn li vê dinyayê ne û yên herî bedew jî horîyên Amerîkî ne.
Ê de çûn û hatina General Mazlûm pîroz û bimbarek be rebbî, xwedê xêra wî bi tîpên mezin binivîse..
Ezmanê Hefta
Tir ji Îmamoglû jî berdan
Divê em xwe li ber barana xelkê şil nekin
Leyloka me jî ket nav karwanê aştîxwazan