Orkestra Demokratîk

Zinar Qelemşûr

Wextekî gotina “HEVAL“ bûbû mode. Ji zarokên bi çêl bigirin heta bi 70-80 salîyan ji hev re digotin heval. Gotina heval jin û mêr kiribû dijminên hev, rêz û hurmet, qedir û qîmetê di nav piçûk û mezinan de nehiştibû, zarokan ji mezinan re nedigotin yabo, xalo, amo-apo, xaltî û metê, digotin heval. Jin ji mêrê xwe re digot heval, mêr ji jina xwe re digot heval. Bi vî haweyî nirxên civaka Kurd tar û mar kirin û ji hev xistin. Helbet ev jî plan û projeyek ji projeyên dewletê û PKK bû û bi vê projeyê civaka Kurd ji nirxên wê şût û rût kirin.

Niha jî lotika “DEMOKRATÎK“ kirine mode. Hemû nirxên ku bêhna doza azadî û serxwebûna miletê Kurd jê tê, gotinek demokratîk bi qûna wê vedikin û dixwazin Kurd û civaka Kurd ji doz, ji hest û hişmendîya azadî û serxwebûnxwazîyê dûr bixin. Bi paradîgma û xeyalperestîyên wek Komara Demokratîk, Konfederasyona Demokratîk, Entegrasyona Demokratîk, Xiyaneta Demokratîk,Teslîmîyeta Demokratîk, Tirşik û Savara Demokratîk û gelek demokratîkên din, dixwazin mejîyê Kurdan biçelqînin, wan bikin wek mirîşka gêş da ku doza azadî û serxwebûnê nekin û wan di nav civaka Tirkîyê de bimihînin, asîmîle bikin û wek gelek neteweyên din Kurdan bikin Tirk.

Axir, ev qeyûmên ku ji alî dewleta Romê ve bûne mîr û wezîr, bûne serok û serwerên Kurdan, ji bo Kurdan ji rê derxin, gotina demokrasî û demokratîkbûnê di devê xwe de kirine benîşk (qajik). Wek ku 100 hezar Kurd ji bo demokrasîya Tirkîyê hatibin kujtin, wek ku 4 hezar gund ji bo demokrasîyê hatibin şewitandin, wek ku 11 bajarên Kurdistanê ji bo demokratîkbûna Tirkîyê hatibin herifandin (şerê xendekan) û gelek jehr û ziqûmên din, didin lotik û zîtirkan û xizmetek baş ji dewleta xwe re dikin. Piştî şer û siyaseta demokratîk, ma çi? Ma Orkestra demokratîk!

Orkestra Demokratîk bi Silhedîn Demîrtaş û bi tembûrê dest pê kir û bi gîtarê encam da. Qeyûmên DEMê û hevserokên germik û nermik û demokratîk Tuncer Bakirhan begefendî û Tulay Hatîpogullarî xanimlerî îcar rahiştin gîtarên xwe û mizgînîya damezirandina Orkestra û Senfonîya Demokratîk dan me. Wek dibêjin “Piştî Tirê Kezîkurê“. “Siyaseta Demokratîk“, bidestxistina “Mafên Kurdan yên Demokratîk“, mafê“ Perwerdeya Zimanê Kurdî yê Demokratîk“ bi dest xistin û safî kirin, îcar dora “Tembûr û Gîtara Demokratîk“ e.

Ê de ya bi xêr…

Belkî demokrasîya ku hevserokên me nikarin bi Siyaseta Demokratîk bînin Tirkîyê, bi Orkestra û Senfonîya Demokratîk bînin ma kî zane..

Stenbol