Hemû rovîyên qulekê ne

Nûrî Çelîk Yekrêzî, yek alî, yek welat, yek ziman û yek miklletîya Tirkîyê armanc û xala sor ya hemû partîyên dewleta Tirk in. Çi AKP be, çi CHP be,...

Nûrî Çelîk

Yekrêzî, yek alî, yek welat, yek ziman û yek miklletîya Tirkîyê armanc û xala sor ya hemû partîyên dewleta Tirk in. Çi AKP be, çi CHP be, çi MHP be û çi jî HDP be, hemû li heman zirneyê dixin û rêwîyên rêyekê ne. Ew rê jî yekîtîya xaka Tirkîyê, yek ziman, yek al û yek millet e. Yanî, Tirkbûn û Tirkîyebûn e.

Em AKP, CHP û MHP fêhm dikin. Ciwamêran vekirî dijminatîya doza Kurd û Kurdistanê dikin û venaşêrin. Lê ev gur û dêlegurên ku li ser navê çepîtî, sosyalîzm, enternasyonalîzm û bratîya xelkên dewşîrme bûne serok û hevserokên Kurdên xwelîser û di devê wan de dirîn, aha xetera mezin û bingehîn ew in allahwekîl.

Hevseroka me Kurdên xwelîser û çepa Kemalîst Fîgen Yuksekdag, li meclîsa Tirko, di civîna partîya xwe de, av li destê Erdogan, Davutoglu, Kiliçdaroglu û Bahçelî kir û dîsa Kurd ji wan re kirin dûvik û terî.

Wek hûn zanin, ev her çar serokên ku dewleta Tirko bi rê ve dibin (Erdogan, Davutoglu, Kiliçdaroglu û Bahçelî) parçenekirina Tirkîyê ji xwe re kirine xeta sor û siyaseta xwe li ser wê lotikê dikin. Û xaltîka we Kurdên xwelîser û Hevseroka Partîya Xelkên Dewşîrme HDP Fîgen Yuksekdag xanim efendilerî jî bi devê wan gurên boz axivî û heman lotik û zîtirk avêt.

Fîgen Yuksekdag a ku temamê malbata wê ji partîya MHP ne (faşîstên Tirkîyê) û Tirkan qîmetê pîvazek xerabe nedidan wê, bi paraşûtê daxistin ser serê me Kurdên xwelîser û kirin serok û rêvebira me.

Fîgen xanim efendîlerî, di civîna partîya xwe de wek Erdogan, Davutoglu, Kiliçdarodlu û Bahçelî da zîtirkan û got: “Bela kêfa kesekî neyê, emê vî welatî (Tirkiîye) nedin parçekirin” û di xwelîya heft gundan li serê Kurdên xwelîser kir. Fîgen xanimlerî û serokên wê yên sererd û binerd bawer dikin ku Erdogan bi vê siyaseta xwe dixwaze Tirkîyê parçe bike û ev parçekirin jî wê rê ji cudabûna bakurê Kurdistanê û Kurdistanek serbixwe re veke. JI ber vê tirsê, xanimê û xanimokên HDP dixwazin bi vê siyaseta Tirkîyebûnê di devê Kurdên xwelîser de birîn û bi çîrokên bratîya xelkleran wan bi dewleta Tirk ve pîne bikin.

Ez serê we neêşînim kezebno, her çar partîyên sîstema dewleta Tirk, yanî AKP, CHP, MHP û HDP (kesayet, dezgeh, cemaet, partî û rêxistinên din ên dewletê jî helbet) li hember Kurdan heman siyasetê dimeşînin. AKP bi navê îslamê, CHP bi navê sosyal-demokrasîyê, MHP bi navê nîjadperestî û Tirkîtîyê û HDP jî bi navê çepîtî û sosyalîzmê di devê me Kurdan de dirîn wesselam.

Bav û kalên me belasebeb negotine: “Heke hefsarê meriv di destê xelkê de be, wê hertim devê meriv di nav gû de be”.

Aha halê me Kurdên xwelîser jî ev e qurban..

Hefsarê me di destê xelkê de ye û hûn sax..

Categories
KadînNurî ÇelîkQuncik
No Comment

Leave a Reply

*

*

RELATED BY

  • STRANA MEZRA BOTAN

    Mezra Botan.. Tu karî bêjî berî niha bi çend hezar salan tiliyên me di zeviyên te de şûn vedane. Ka bihêle ku dîroka derewîn li berxwekeve, bê ji hewdikê...
  • Kız Kereçi Xatun Olmaz!

    Mêro boxboxakî mêran bû, çû dil ket qîza qereçî, wek yê ku heft salan dil ket çavên beqê! Di bîr û baweriya wî de, wê keçika qereçî jê re...
  • Amerîka bi mastê Kurdekî têr dixwe

    Hesen Almas Nebêjin mast bi kêrî tiştekî nayê û meriv bi firotina mast dewlemend nabe. Kurdê Ezircanê û paşayê eşîreta mastê “Chobanî” ê AmerîkayêHamdî Ulukaya, bi firotina mast bûye...
  • Ekolojîk hevaller

    Hevallerên me ji bo go serê Kurdan bişon û wan ji bîr û hizrên netewayetî dûr bixin, ji 101 bîran avê dikêşin, wan bi fikir û îdeolojîyên berî hezar...
Lotikxane