Îcar wê têr goştê elokan bixwin

Cemîl Cewher JI bo ku referandûma serxwebûnê neyê lidarxistin û ji bo ku Kurdistan serbixwe nebe, ji her alî de êrîşî PDK û Barzanî tê kirin. Cehş, nîvcehş, çep...

Cemîl Cewher

JI bo ku referandûma serxwebûnê neyê lidarxistin û ji bo ku Kurdistan serbixwe nebe, ji her alî de êrîşî PDK û Barzanî tê kirin. Cehş, nîvcehş, çep û rep, misilman û kominîstên her çar dewletên dagîrker ha ha êrîşî PDK û Barzanî dikin da ku rê li ber Barzanî û armancên Barzanî bên girtin û Barzanî ji çap bikeve.
cemil-cewher
Di serî de sofîk û melayên Tehranê, fitne û fesadên her çar dagîrkerên Kurdistanê, bi rêya lotikvan û zîtirkvanên xwe xefik û kemînan li pêşîya Barzanî datînin û dixwazin qeyd û bendan têxin dest û lingên wî, wî ji desthilatdarî û serokatîya Kurdistanê dûr bixin. Helbet armanc ne tenê kesayetîya Barzanî ye. Armanca mezin rêlibergirtina referandûma serxwebûnê û serxwebûna Kurdistanê ye. Serxwebûna başûrê Kurdistanê bixwazî nexwazî wê bandora xwe li parçeyên din jî bike û wê serê dagîrkerên Kurdistanê bêşîne. Ji ber vê jî, xêrnexwaz bi rêya hinek kesayet, partî û dezgehên Kurdî ve hewl didin ku kam û merama dilê xwe bînin cîh.

Axir…
ynk goran

Ne li ser bextê me be, li ser bextê hinek zikmezin û porreşên nava YNK be, dibêjin bi hewl û daxwaza sofîk û melayên Tehranê, serok û merokên YNK û Goranê li hev civiyane û li mala Mam Celal dest bi lotikên tifaq û hevkarîyê kirine. Li gor fitne û fesadên nêzîkî xaltîka me Hêro Îbrahîm radigihînin, dibêjin ev tifaq û hevkarîya ku li ser daxwaza sofîk û melayên Îranê çêbûye, du-sê-çar- pênc armancên wê hene.

1- Bi tifaq û hevkarîya YNK, Goran, PKK, Yekgirtû û partîyên din, cçh bi Barzanî bê tengkirin, di parlamentoya Kurdistanê kursî û dengên zêdetir bên bidestxistin da ku referandûma serxwebûnê ne ji alîyê gel ve, lê ji alîyê parlamentoyê û dengan ve bê kirin. Gava deng û rayên van partîyên Îranî ji yên PDK zêdetir bibin, helbet wê parlamentoya Kurdistanê têkeve destê wan û wê rê li ber referandûmê û serxwebûna Kurdistanê bê girtin. Bi vî awayî wê dilê dagîrkerên Kurdistanê xweş û geş bibe û ewê bigihên armancên xwe, ewê temenê peymana Sykes-Pîkotê dirêjtir bikin.

2- Hêro Îbrahîm, ango xaltîka YNK û Goranê Hêro Talabanî, ji roja roj de kîndara malbata Barzanî ye û dixwaze heyfa bavê xwe Îbrahîm Ehmed ji Barzanîyan hilîne. Û helbet vê jî bi rêya sofîk û melayên Îranê dike. Bedel û berdêlê vê alîkarîyê jî helbet ne belaş e. Xelat û berdêl, Xizmetkirina ji bo Îranê û armancên Îranê ye.

3- Hz. sofîk û melayên Îranê dixwazin bi rêya beşek ji YNK, Goran, alîgirên PKK û grûpên li dijî PDK û Barzanî, herêma Silêmanîyê ji Kurdistanê cuda bikin, PDK û grûpên xwe bera hev din, aramîya Kurdistanê serûbinê hev bikin û alozîyan di nav Kurdan de derêxin.

4- Di serî de Îran û dewletên din, dixwazin bi çêkirina Kongreyek Netewî (ku PDK û Barzanî ne di navê de be, di navê de be jî bê hêz û bi tenê be) rêxistin, partî û dezgehên her çar parçeyên Kurdistanê têxin bin xizmet û bandora xwe. Ji ber vê yekê jî, piştî tifaq û hevkarîya YNK û Goranê, PKK bi lezgînî ji bo Kongreya Netewî bi partîyên derveyî PDK re ( wek Yekgirtû û yên din) dest bi hevdîtinan kiriye.

5- Hinek jî bi namûsa xwe sûnd dixwin ku Îran ne ji bo xirabîyekê van lotikan davêje. Li gora wan, Îranê xwestiye ziyafet û şahîyekê ji YNK û Goranê re çêke, bi xwarina goştê elokan wan li hev bîne.

Wek hûn zanin gelî lotikvanan, berî ku lotikvanên YNK û Goranê goştê elokan bixwin û bi daxwaza Îranê tifaqa xwe çêkin, berpirsekî bilind yê paraztin û mixabarata Îranê serdana Mesûd Barzanî kiribû û ji bo Iraq parçe nebe, hinek pêşniyazên dewleta Îranê danîbûn ber Barzanî. Wek „zêdekirina pişka Kurdistanê ji %17 bibe %30, herêmên ku niha ne girêdayî Kurdistanê ne, dîsa vegerin ser Kurdistanê“ û filan. Û piştî vê serdanê bi demek kurt, civîn û tifaqa YNK û Goranê, û ji bo Kongreya Netewî hevdîtinên PKK dest pê kir. Û ji bîr nekin, Kevneserokwezîrê Iraqê Nûrî Malikî, bi rêya Twîtterê peyamek belav kir û kêfxweşîya xwe ji tifaqa YNK û Goran re anî, lotika wan ji bo yekîtîya Iraqê wek lotikek pîroz qebûl kir.

Gelo ev tev lihevrasthatin in, yan dek û dolabên sofîk û melayên Îranê ne?

Yan YNK, Goran û PKK ji betalî û acizî van lotikên lezgîn davêjin?

Ez serê we neêşînim kezebno, wek RSeydayê Tîrêj gotibû, „Çar hawîr me diz û keleş in tev dane dijmin. Me ji hev re diqetînin bir bi bir heyf û mixabin“.

Bi kurt û Kurmancî; kek Mesûd Barzanî ketiye nav diz û çeqelan û çar hawîrên wî dijmin in. Ka ewê çawa xwe ji nav dest û lepên wan çeqel û keftaran xilas bike, xwedê zane.

Xwedê alîkarê wî be wesselam…

Hewlêr

Beş
Cemîl CewherKadînQuncik

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.

Zêdetir

%d Bloggern gefällt das: